UMOZHIGO 29
29
Ge Jekob Shɛdɛnjɛ Tahaŋnụ tu Bwa
1Nazhɛ ge Jekob to tuhwulo tu tahaŋnụ tu bwa, bee ci cɛnjɛ ta atwa uwaŋna-banụ. 2Gana na tu baa mbiyanɛ baa kwụbɛ u'ibwa meni uko na namɛ ni itimɛ ike, baa kwụbɛ tu unyama wa agwụdụ weteji to dongonu uŋ orubwo atatụ, iwɛnɛ po nu u'ibwa ata ɛɛ piɛ agwụdụ ata meni. Utayɛ na kaa ubi nu unu u'ibwa ata gembi duwa. 3Aka na tu unyama wa agwụdụ ata ụlwatagwụ apata kpaaŋ, nazhɛ a'iywa-agwụdụ zhɛ o ushigo utayɛ nu unu u'ibwa ata, nazhɛ ɛɛ zhɛ ɛ piɛ agwụdụ meni, nazhɛ o gwuricingo sasana utayɛ ata nu unu u'ibwa ata.
4Ge Jekob heŋteni a'iywa-agwụdụ ata, bɛɛ hiɛŋ, Eyejilo mi, cee ahiɛ banɛɛ? Ɛɛ jishijɛ bụ, ɛɛ hiɛŋ, Tu banɛ nu Haran.
5Bee heŋteni aŋ, bɛɛ hiɛŋ, Hi mepi suu bụtụ ata ɛɛ hiɛŋ ga Laban yɛu Naho? Ɛɛ jishijɛ bu, ɛɛ hiɛŋ, Iiŋ ti mepi bu.
6Bee heŋteni aŋ, bɛɛ hiɛŋ, Bu namba lapiya kaa?
Ɛɛ jishijɛ bụ, ɛɛ hiɛŋ, bu namba lapiya, kwụba, ge Rechɛl yɛu ibwɛ yo o ta ye ci na agwụdụ!
7Bɛɛ hiɛŋ aŋ, Hioko ma, uwaŋna te gembi, shɛ aka na maa o sotulonu iyimabiga urubwo uko na o, pana ma agwụdụ meni, maa hi suji aŋ na tiyaga.
8Ama ɛ jishijɛ bụ, ɛɛ hiɛŋ, Ti te eri shi o, semi aka na unyama wa agwụdụ sotulonu hwayɛ kpaaŋ, ee ushiji utayɛ nu u'ibwa, nazhɛ ɛti zhɛ ta pana agwụdụ meni.
9Aka na ti ge Jekob ta duma n-ndumwa na aba, ti ge Rechɛl pushe na agwụdụ bishi bwa, iwɛnɛ po ubwa ba ngbaraka aŋ. 10Aka na ti ge Jekob kwụbɛ Rechɛl yɛu Laban na shɛ ikwenyi bino bwa, bee munji bee ushiji utayɛ ata nu unu u'ibwa, bee peni agwụdụ Laban ikwenyi bino bwa meni. 11Nazhɛ ge Jekob ruwanɛ Rechɛl, bee shepi rụhwụŋ na azuba baa cwɛ-u'wo iwɛ unyasa ụ'wụtụ na baa 'yajɛ. 12Ge Jekob mbishi Rechɛl maa ubwa 'yajɛ ụmatụ ne bishi bwa, maa ubwa kaa shɛ yɛu Rebeka, ge Rechɛl gezhiji bee mbishe bishi bwa.
13Aka na tu ga Laban hwụjɛ unabarɛ Jekob yɛu bụngwụfwụ bwa, bee gezhiji maa twa nu bwa, baa ruwanɛ bụ, bee kwutenji unu ubwa nu una ubwa, bɛɛ zɛrijɛ bu ni ihwɛ ibwɛ. Ge Jekob mbishi Laban iyi elele kpaaŋ.
14Ga Laban hiɛŋ bụ, Tu'waba ti mi abɛ shɛ gom! Ge Jekob jɛjɛ nu bwa upiana uko.
Ge Jekob Zeni Lia keeni Rechɛl
15Ga Laban hiɛŋ Jekob, Iwɛnɛ abɛ 'yajɛ ụmatụ ne mi hŋ ɛbi zhɛ bu ma ndana ugondu arahaŋ? M mbishi gana na aba jala maa mu na bu tụpa. 16Ga Laban kaa 'yajɛ miaụŋ-mo-o mi yebi. Ɛ hiɛŋ izeci inɛ i'wɛtwɛ ge Lia, ɛɛ hiɛŋ izeci inɛ tidice ge Rechɛl. 17Eshe Lia gwuriseni suu, ama ge Rechɛl pilanụ tebiye. 18Ge Jekob lubi Rechɛl, bɛɛ hiɛŋ Laban, N zhɛ ma bu ndana ugondu shiywa shi cenje iwɛ ma ma zana yɛu bụ tidice ge Rechɛl.
19Ga Laban hiɛŋ bụ, I zhɛmɛ maa Ma bu pana bụ uhwuri maa ma pana bụ binya bụtụ, gɛga pi mi. 20Ibɛ po ge Jekob njɛ ugondu shiywa shi cenje iwɛ Rechɛl, i shanɛ bu du gana maa ijitɛ ɛtɛ twa sụ ufwugwo, iwɛnɛ tu boo lubo bu.
21Nazhɛ ge Jekob hiɛŋ Laban, M peni ya biyikwo mi maa Ma zana bụ, iwɛnɛ tu Ngoo hwuwo ugondu mu. 22Ga Laban sotulonu etwenyi ụshɛpwụ ata kpaaŋ, baa njɛ iyimɛyɛ unyasa. 23Ama tụ ụrụmɛ shɛ, bee shepi yɛu ibwɛ ge Lia no ofwo Jekob, shɛ ge Rechɛl ya o, ge Jekob weci nu bwa. 24(Ga Laban shepi Zilpa bujama bwa bo o, bee peni yɛu ibwɛ ge Lia maa bu no mbiyono bu.)
25Ti iyi heri nu uvwungwa, yaa shɛ ya ge Lia. Ge Jekob hiɛŋ Laban, Imbe nɛ abɛ n njɛɛ? Shɛ iwɛ Rechɛl suu Ngaa bu ndanɛ ugondu? Iwembe po ebi n helekecii?
26Ga Laban jishijɛ bụ, bɛɛ hiɛŋ, Tɛ njɛ shɛ gana ata na cɛnjɛ tu tu o, maa peni buhongwu bụtụ tụmbụla hiiŋ na batagwụ bwa o. 27Asha ụrɛcɛnga ulade uko na bu na ata, nazhɛ ta bụ pana Rechɛl maa n ndanɛ ugondu shiywa shi cenje shi nya.
28Ge Jekob njɛ ga gana ata, baa ụrɛcɛnjɛ ulade uko na bu na ata, nazhɛ ga Laban peni bu yɛu ibwɛ ge Rechɛl maa zana sasana. 29(Ga Laban shepi Bilha bujama bwa, bee peni yɛu ibwɛ ge Rechɛl maa bu no mbiyono bu.) 30Gabata ge Jekob weci du ne Rechɛl, bu lubi tuba Rechɛl bee hwuri Lia. Ibɛ po baa ndanɛ Laban ugondu shiywa shi cenje shi nya.
Miaụŋ mi Jekob
31Aka na ta AGWANGWAMA kwụbɛ maa o imo Lia, bee kepishinji igwune ibwɛ i tumata maa mata miaụŋ, ama ge Rechɛl tuba shɛ bu'ulo. 32Ge Lia le ofubo, bee meci yɛu-ye-eyi, boo po iŋ izeci ti gɛ Rubɛn,#29:32 Rubɛn: Egini te Rubɛn ne Rihibru i shɛ, bụ kwụbɛ yɛu-ye-eyi, baa kwụbɛ du ụbaụta mu. bi hiɛŋ, AGWANGWAMA kwụbɛ ụbaụta mu, bwolo mi kaa zhɛ mo n lubo ya hwuwayɛ gom. 33Bee le ofubo sasana, bee meci yɛu-ye-eyi, bɛɛ hiɛŋ, iwɛnɛ AGWANGWAMA hwụjɛ maa o mo n imo, ibɛ po bee m peni yɛu gɛ ye eyi sasana, boo po iŋ izeci ti ge Simion.#29:33 Simion: Egini te Simion i shɛ, AGWANGWAMA hwụjɛ. 34Bee le ofubo sasana, bee meci yɛu-ye-eyi, bɛɛ hiɛŋ, Bwolo mi zhɛ bo togwu ne mi na aka ga, iwɛnɛ ti Ngee metenji bu miaụŋ-me-eyi mu tatụ, iwɛbɛ po boo po iŋ izeci ti ge Livai.#29:34 Livai: Egini te Livai i shɛ, tutogwu. 35Bee le ofubo sasana, bee meci yɛu-ye-eyi, bɛɛ hiɛŋ, N zhɛ ma shɛtana AGWANGWAMA na aka ga, iwɛbɛ po boo po iŋ izeci ti go Juda,#29:35 Juda: Egini ta Juda i shɛ, ashɛtwa. nazhɛ bee genji ya tumata.
Currently Selected:
UMOZHIGO 29: RBT
Označeno
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008