UMOZHIGO 26
26
Ga Azik Jɛjɛ ni Gera, Baa Twa-unu na Abimɛlɛk
1Na aka ga imunɛ layananɛ na cɛnjɛ ta ata, imunɛ ɛtɛ namɛ swooŋ ni inɛɛ nɛ layɛ la na aka Abraham. Ga Azik zhe Gira pa Abimɛlɛk agwuma Afilistia. 2Nazhɛ AGWANGWAMA mama bacɛnganɛ bụ, bɛɛ hiɛŋ bụ, To zwo ni Ijipti o, gɛga na cɛnjɛ tu ga no ofwo na Ngɛɛ zhɛ mɛ bi hiɛŋ maa gɛga. 3Zokwu na cɛnjɛ tu ga, nazhɛ Ngɛɛ zhɛ ma nama na bụ, Ngɛɛ zhɛ ma bu pana-uwebiye. Gabụ na ajalalo bu Ngɛɛ zhɛ ma pana cɛnjɛ tu ga kpaaŋ. N zhɛ ma ụrɛcɛnga kaa unu na Ngee shileni la bishi bu ga Abraham. 4N zhɛ mo lononono maa ajalalo bu gembi ufwugwo gana mkpasu ma azuba. N zhɛ kaa ma pana ajalalo bu cɛnjɛ tu ga kpaaŋ, edenji elele na namɛ na cɛnjɛ tu unyizo ga kpaaŋ zhɛ a kwụba uwebiye tedure na ajalalo bu.#Umoz 22:16-18 5Iwɛnɛ ti ga Abraham hwụjɛ la unu mu, baa untanganɛ kaa n-ndumwa mi mi, no shikpogo shi mi keeni andwa elele na Ngee peni bu kpaaŋ. 6Ga Azik jɛjɛ ga ni Gira.
7Aka na ta atwa ụshɛpwụ ata heŋteni bu iwɛ biyikwo bwa, bɛɛ hiɛŋ aŋ, Bụngwụfwụ mi baa shɛ, bɛ njɛ inyɛsɛ maa duma maa biyikwo bwa ta. Bi hiɛŋ, iwɛ aka na atwa ụshɛpwụ ata zhɛ ma n kwụna, a shapa Rebeka, iwɛnɛ ti ge Rebeka pilanụ igbɛtɛtɛ.#Umoz 12:13; 20:2
8Ama aka na ti bee ilegeji apata, ga Abimɛlɛk agwuma Afilistia shepi eshe na agbahwụ, baa kwụbɛ ti ga Azik ba nda iyɛrɛ ne biyikwo bwa ge Rebeka. 9Ga Abimɛlɛk suyanɛ Azik, bɛɛ hiɛŋ bụ, Biyikwo bu baa shɛ gom, iwembe po ɛbi hiɛŋ maa bụngwụfwụ bụ baa shɛɛ? Ga Azik hiɛŋ bụ, Iwɛnɛ ti Ngee heŋshi maa yaa shɛ Ngɛɛ hiɛŋ biyikwo mi baa shɛ, ɛ zhɛ ma n kwụna iwɛ ubwa.
10Ga Abimɛlɛk hiɛŋ bụ, Imbe nɛ abɛ tɛ njɛɛ? I ga vwɛ cwɛŋ maa bụtụ bu ko na ashashɛ atwa ga, woto ne biyikwo bu, gabụ kaa bi gɛ zhɛ bu ma tu patana tụwụma ti ibɛ.
11Ga Abimɛlɛk tɛtaganɛ atwa ubwa unu kpaaŋ, bɛɛ hiɛŋ, Bụtụ be elele na timengeni bụtụ ga kwo kaa biyikwo bwa, i shɛ tilɛɛ maa ga kwụnɛ bụtụ ata.
12Ga Azik bɛrɛ iyimɛyɛ na cɛnjɛ ta ata, iyi nɛ bee jwe nu uywa ata, hwuri gana na tu baa ga bɛrɛ iŋ karɛ dipi yebi. Iwɛnɛ ta AGWANGWAMA peni bu uwebiye. 13Iyi kaa ya zhɛmana bu, baa kaana bɛzhɛgba tisha ga tɛkaana uuwa baa shɛ bɛzhɛgba bụ 'wụtụ 'wụtụ. 14Iyi ibwɛ mabiga i shɛ agwụdụ ni inɛ, i gembi kaa ufwugwo, ta miaụŋ-mu-ugondu bwa kaa mi gembi ufwugwo duwa. Ibɛ po Afilistia kwuni isɛbwɛngwɛ tɛnda nu bwa. 15Ibɛ po du kaa Afilistia suji ahwayɛ aa sụpacanjɛ a'ibwa meni elele na miaụŋ-mu-ugondu me bishi bwa ga Abraham hinenji la na aka na baa ta namɛ.
16Ga Abimɛlɛk hiɛŋ Azik, Bana ya na cɛnjɛ tu tu, iwɛnɛ ebi tu hwuri ya ni ikɛnyi ti'yaga duwa.
17Ibɛ po ga Azik beni apata bee hwuri, boo to udulo ubwa nu ulomu Gira, na baa ga gɛgawa la aka oko. 18Ga Azik bukereci a'ibwa ata ee hini la na aka bishi bwa, a gata Afilistia sụpacanjɛ la na aba tu'wo ta Abraham, bee pegeni aŋ nzeci ma ata bishi bwa po aŋ la kpaaŋ.
19Miaụŋ-mu-ugondu Azik mi hini kaa u'ibwa nu ulomu ata, aa kwụbɛ meni ti mɛ cwɛ na cɛnjɛ. 20Ibɛ po a'iywa iyimabiga atwa Gira sukakanɛ a'iywa iyimabiga Azik nu uwuru, ɛɛ hiɛŋ, Atuba ti hini meni mu ga. Ibɛ po boo po u'ibwa ata izeci maa, Uwuru, iwɛnɛ ta a sukakanɛ bụ apata nu uwuru.
21Nazhɛ miaụŋ-mu-ugondu Azik mi hineneni u'ibwa meni unya, ee 'wegeneni iwɛ una ata, ibɛ boo po una ata izeci maa i'ime. 22Baa ishɛjɛ apata, bee hineneni u'ibwa meni unya, e 'weji shi ya iwɛ una ata o, ibɛ boo po una ata izeci maa, Tumama 'yaga, iwɛnɛ po bi hiɛŋ, AGWANGWAMA ti peni tumama 'yaga maa ta nama na cɛnjɛ tu ga.
23Ga Azik beni apata bee zhe Biɛ-shiba. 24Nazhɛ AGWANGWAMA mama bacɛnganɛ bụ nụ ụjita ata gbaa, bɛɛ hiɛŋ, Gamba n shɛ Agwatana bishi bu ga Abraham, ta nda inyɛsɛ o. N namɛ na bụ, N zhɛ kaa ma bụ pana-uwebiye, Ngɛɛ zhɛ kaa ma kaana ajalalo bu ufwugwo, iwɛ unu na Ngee shileni la yɛu mi ugondu ga Abraham.
25Ga Azik mo utukwu-ụrụpɛ apata, baa zhɛbɛ AGWANGWAMA, boo to du udulo ubwa apata. Nazhɛ miaụŋ mu bwa mu ugondu mi hineneni u'ibwa.
26Ga Abimɛlɛk na Ahuzat biyejilo bwa bu ko keeni Fikol na shɛ uhiu we ejeshi ubwa banɛ ni Gira, ɛɛ zhɛ maa a kwụbɛ Azik.#Umoz 21:22
27Ga Azik hiɛŋ bụ, Iwembe po ahiɛ zhajɛ pi mi gana na ehi n to ni i'ime, ehi n unzhe no olugwo hiiŋ?
28Ɛɛ jishijɛ bụ, ɛɛ hiɛŋ, Tụ kwụbɛ caakwụ maa AGWANGWAMA namɛ na bụ, ɛti hiɛŋ, Ti zhɛ ta twa-unu na bụ ta 'yajɛ ikɛnyi. 29Maa bi zha shɛ bu ma tu nda umungwuta gana na eti bi timengeni shi, atụ bụ njɛ shɛ kaa iyi iwɛ ye elele o, semi uwebiye kiri, eti bu leneni kaa sasana maa hwuri na amɛ-olom. Hwuwayɛ go AGWANGWAMA na kaa ubu peni-uwebiye.
30Ga Azik njɛ iyimɛyɛ baa 'imɛ aŋ ugaiŋ, aa yɛ iyimɛyɛ, ee swe meni. 31Nazhɛ aa gbatụ ti'ishijɛ nu uvwungwa dididi, ti iyi heri aa twa-unu. Ga Azik she aŋ, ee beni no olugwo ubwa na amɛ-olom.
32Gunu ụjita ata gbaa miaụŋ-mu-ugondu Azik mi zhajɛ, mee mbishi bu iwɛ u'ibwa meni uko na ee hini, ɛɛ hiɛŋ bụ, Tu kwụbwa ya meni. 33Boo po uŋ izeci maa, Unu-tutwa, iwɛbɛ po ɛɛ hiɛŋ izeci ụshɛpwụ ata Biɛ-shiba tutu taa hwayɛ.#Umoz 21:31
Ge Isụ Zeni Yɛu cɛnjɛ ti Nya, Ga Azik 'yajɛ amɛ-tụhaŋtụ
34Aka na ge Isụ zhɛrɛ shiywa buhanda te e meci bu, bee zeni eyikwo eyebi, a na shɛ miaụŋ mɛ Ɛhit. Ɛ hiɛŋ izeci bu na bu ko go Judit yɛu Beri, ɛɛ hiɛŋ bu na bi yebi ga Basɛmat yɛu Ilon. 35Eyikwo ata kaa heshigeni Azik keeni Rebeka amɛ.
Currently Selected:
UMOZHIGO 26: RBT
Označeno
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008