UMOZHIGO 14
14
Ga Abram Lɛshijɛ Lụt
1Shɛgwuma shi neshi, ga Amrafɛl agwuma Shaina, na Ariok agwuma Ɛlasa, nɛ Kɛdolaomɛ agwuma Ɛlam keeni Tidal agwuma Goim. 2Shi zhe shaa sukakanɛ Shɛgwuma shi nya shɛ ta nu ujasa: ge Bera agwuma Sụdụm, ne Bisha agwuma Gụmụra, na Shainab agwuma Adma, nɛ Shɛmibɛ agwuma Zɛboim keeni agwuma Bila, (ibɛ gɛtɛtɛ i shɛ Zoa). 3Atwa ga kpaaŋ twa nu ulomu Sidim (ibɛ gɛtɛtɛ i shɛ Itekwu Manɛ). 4Shiywa umpwa-na-shɛba-shi-yebi a shɛ ajama Kɛdolaomɛ, ama nu uywa u'umpwa-nu-ba-tatụ aa lacɛ ya. 5Ti yaa namɛ shiywa umpwa-na-shɛba-shi-neshi, gɛ Kɛdolaomɛ keeni shɛgwuma shi nya shɛ na shi medenji bu, shɛ zhajɛ ne ejeshi aba, ee kebi Arifɛim a na namɛ na Ashtɛrot-kanaim keeni Ezuzim a na namɛ nu Ham, keeni Emim a na namɛ nu Shave-kariataim. 6Keeni Aho a na namɛ ni ihiŋhiŋ Ishɛmɛ ya aba, nɛ ɛ hiɛŋ Sei tutu Ɛl-param a na namɛ no tugwungwu tụ ụshɛka. 7Nazhɛ ee gwuri me kwunyi kwunyi, aa zhajɛ Ɛn-mishpat (ibɛ gɛtɛtɛ i shɛ Kadɛsh), ee kebi cɛnjɛ ta Amɛlɛk keeni du A'amo a na jɛjɛ nu Hazazon-tama.
8Nazhɛ agwuma Sụdụm, na agwuma Gụmụra, na agwuma Adma, na agwuma Zɛboim keeni agwuma Bila (ibɛ gɛtɛtɛ i shɛ Zoa), ee beni aa twa nu ujasa nu Ulomu Sidim. 9Medenji Kɛdolaomɛ agwuma Ilam, ne Tidal agwuma Goim, na Amrafɛl agwuma Shaina keeni Ariok agwuma Ɛlasa, shɛgwuma shɛ ga shi neshi shi sukakanɛ shɛgwuma shɛ ta nu ujasa. 10Ogodo na 'yajɛ tuko kaa barɛ nu Ulomu Sidim. Gana na ta shɛgwuma shi Sụdụm keeni Gụmụra shi gezhiji, emeseyi aba oko 'waŋ no ogodo ata, ibɛ po atwa vwɛ aba gezhiji, ee zhe nu nshama. 11Ibɛ po atwa i'ime ya aba suji i'wɛŋnɛ ya atwa Sụdụm keeni inɛ ya atwa Gụmụra kpaaŋ keeni iyimɛyɛ ya aba, ee hwuri. 12Ee shepi du Lụt, yɛu buhongwu Abram, na ga jɛjɛ nu Sụdụm ti i'wɛŋnɛ ibwɛ ee hwuri.
13Nazhɛ bụtụ bu ko na bananganɛ nu ujasa ata zhajɛ, bee mbishi Abram Bihibru ata, na namɛ to dongwu i'wɛ'wɛ ɛtɛ ekpekpeshi inɛ Mamre na shɛ Bu'amo ata, yɛu-bino Ɛshkol keeni Anɛ. Atwa ga lemeni Abram amɛ. 14Aka na ti ga Abram hwụjɛ maa ujasa yɛ ba yɛu buhongwu bwa, bee zeriji atwa ubwa a na seshi ujasa, atwa kpakwụ-ni-dipi-yebi-ne-eshe-umpwa-na-ba-tụndatụ (318), a na ee meci ni ihwɛ ibwɛ. Baa sanɛ bee urigeni aŋ tutu Dan. 15Boo dwotwogonu atwa ubwa nụ ụjita maa aa sukakanɛ aŋ keeni miaụŋ mu bwa mu ugondu, bee kebi aŋ, bee urigeni aŋ tutu Hoba, tuzuba tu Damaskos. 16Nazhɛ bee gwuricinje i'wɛŋnɛ ye elele, bee gwuricinje du yɛu buhongwu bwa ga Lụt medenji i'wɛŋnɛ ibwɛ, keeni eyikwo keeni atwa ata hwɛɛ.
17Na aba na tu ga Abram gwure no olugwo na bɛɛ kwunɛ Kɛdolaomɛ keeni shɛgwuma shɛ na shɛ namɛ nɛ Kɛdolaomɛ. Nazhɛ agwuma Sụdụm beni maa taga bụ uhwaŋna nu Ulomu Shave (ibɛ i shɛ Ulomu wa agwuma).
Gɛ Mɛlkizɛdɛk Peni Abram Uwebiye
18Gɛ Mɛlkizɛdɛk agwuma Salɛm suje iyimɛyɛ keeni meni mu tụ'walụ ta afwafwa. Ubwa kaa shɛ bunongbo bụ 'wụtụ ba Agwatana na Hwuri Kpaaŋ.#Ehib 7:1-10 19Bee peni Abram uwebiye bɛɛ hiɛŋ, Ga Agwatana na Hwuri Kpaaŋ, na njɛ azuba keeni cɛnjɛ tu unyizo peni Abram uwebiye!
20Go zhemonjino Agwatana na Hwuri Kpaaŋ, ubwa na njɛ maa eri atwa i'ime bu. Ibɛ po ga Abram peni bu iyi-u'umpwa iyi elele nɛ bɛɛ lɛshijɛ nu ujasa ata. 21Nazhɛ agwuma Sụdụm hiɛŋ Abram, M peni atwa ga maa suji tuba i'wɛŋnɛ iwɛ ikɛnyi bụ.
22Ama ga Abram hiɛŋ agwuma Sụdụm, N to AGWANGWAMA na shɛ Agwatana na Hwuri Kpaaŋ, na njɛ azuba keeni unyizo, 23maa N zha shɛ ma lashɛga okwo uhwohwo bizhe uko, kwo kaa u'waba ubida uko, kwo kaa iyi elele nɛ i shɛ inɛɛ bu o. Iwɛ aka na ɛbi zhɛ bɛ hiɛŋ hwuŋ maa, Gamba n njɛ Abram bɛzhɛgba. 24N zha shɛ ma shapa iyi elele, semi iyi nɛ miaụŋ mi tisemberi mi yɛwa kiri keeni urobwo wa atwa na zhe ne mi. Ga ga Anɛ, nɛ Ɛshkol keeni Mamre, a na m mepeni iwɛ suji urobwo wa aba.
Currently Selected:
UMOZHIGO 14: RBT
Označeno
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008