Sakariyaa̱ 9
9
Én xí tsi̱ꞌe̱ Néná xi kanangiyaa̱ na̱xi̱ńdaá
1Eén Néná xí katsóyà jáchji̱ni̱e̱ꞌe̱én, tsó nga Néná jè kondra̱ tikónnii̱ nangi Andraa̱k, ko̱jo na̱xi̱ńdáꞌniú Ndamasko̱ nínga tsꞌénkjaꞌyá. Tsi̱ꞌe̱ Néná boá na̱xi̱ńdáꞌniuú nangi Araa̱n, ko̱jo ngayeje xota̱ tji̱e̱e̱ Israee̱l. 2Ko̱jo jè ki̱a̱ chji̱a̱ni Amaa̱t, ko̱jo Tiroo̱, ko̱jo Sindoo̱n, kui na̱xi̱ńdáꞌniú xi achichí xota̱ xi kjínkón tjiín.
3Na̱xi̱ńdáꞌniú Tiroo̱, ngo ngi̱ndie xi ꞌniú je kiniꞌánda,
kó jaꞌátjó to̱ntiboaa̱, xikó maá chojo,
ko̱jo to̱nsinieé, xikó maá ndásee̱ ngi̱ya ndi̱yàtié.
4Ta̱nga Ndi̱a̱ná boá xi kjo̱a̱ꞌáxiín,
kó ngi̱jin ndáchíkoón kꞌo̱jmijin kjo̱a̱cho̱o̱n,
kó xikó maá tsi ndi̱xcho̱ kixí xi tí ngi̱jin ndiꞌií ka̱ma.
5Kó xota̱ xi chji̱a̱ni na̱xi̱ńdáꞌniú Askaloo̱n sku̱i̱e̱,
kó kjo̱tsiè má, kó nga sku̱i̱e̱ xota̱ na̱xi̱ńdáꞌniú Ngasa̱,
achichí nda̱ ka̱maa̱, ko̱jo na̱xi̱ńdáꞌniú Ekroo̱n nda̱ ka̱maa̱ nga,
ngatꞌa̱ kjo̱a̱chiyaá, kjo̱a̱soboá ka̱ma.
Ki̱a̱ na̱xi̱ńdáꞌniú Ngasa̱ ko̱yà nda̱ ree̱,
kó na̱xi̱ńdáꞌniú Askaloo̱n, ngiti̱ jmíjín xi kꞌuíndo ngase,
6kó xota̱ ndso̱o̱ ki̱a̱ kꞌuíndo ki̱a̱ na̱xi̱ńdáꞌniú Asndoo̱nd.
Bo̱a̱ tsꞌén nga sa̱ꞌinkjié an kjo̱a̱nkꞌakoo̱n xota̱ Filisteaa̱.
7Tsꞌoa kjoaꞌaxínñáa̱ yojo jín xí ndyi̱kjinie,
ko̱jo ngi̱jii̱n ṉꞌni̱u̱ kjoaꞌaxínñáa̱ ni xi ndajín xi ndyi̱tsꞌèn,
ta̱nga ngo tjín kuí xotaa̱ xi tsi̱ꞌe̱ Néná ka̱ma,
kó kuí boá xi xota̱ xi ngito̱ko̱ xi botixómá ka̱ma ngi̱jii̱n xota̱ tji̱e̱e̱ Jundáa̱,
kó xota̱ na̱xi̱ńdáꞌniú Ekroo̱n xikoó tsi xota̱ Jebuu̱ ka̱ma.
8Nga ngo foaꞌatjiyajoo̱n Ndiꞌana kotíjña̱ an,
xikó maá ngo xi koo̱n ngo ndiꞌa,
tsi̱ꞌe̱ nga ngojín xi kjo̱a̱ꞌa tsi xi fí ko̱jo tsi xi ndibá,
kó xota̱ xi ꞌniú ndajiín ngiti̱ ka̱májín ki̱a̱ kjo̱a̱ꞌani,
ngatꞌa̱ ndyikón án má xi skondá.
Nga kjo̱chó nda̱ ree̱ na̱xi̱ńdáꞌniú Jerusalee̱n
9¡ꞌNiú tsjangatamaa̱ ji na̱xi̱ńdáꞌniú Sioo̱n!
¡Cheꞌeyé tsjá má ji na̱xi̱ńdáꞌniú Jerusale̱n!
Tsitsíjìi̱n rèe̱ nga je tsꞌénfochó, kui xi kixi̱i̱,
ko̱jo xi je katsꞌeén, nga ni̱ma̱ kjiꞌi nga tikónsoón ngo bórró,
ndií ngo bórró chjo̱on.
10Án boá xi sa̱ꞌinkjatsón án karro̱ kjo̱a̱xcha̱án Efraii̱n,
ko̱jo ndi̱je̱ tamá xí chji̱a̱ni na̱xi̱ńdáꞌniú Jerusalee̱n.
Yáchjonyá xi chꞌiá nga fí kjo̱a̱xcha̱án xtꞌó,
ngatꞌa̱ ree̱ boá xi ku̱i̱chji̱a̱jo xota̱ na̱xi̱ńdaá kjo̱a̱a̱ kjo̱a̱xioó,
kó ndeskande ngo ndieè ndáchíkoón,
ngaskande xi ingo ndieè nga ko̱tíxoma kui,
ko̱jo ndeskande ndejeèꞌ, ngaskande nínga fetꞌanii̱ tꞌanangii̱ nga.
Néná sa̱ꞌíntja̱tsi̱e̱ya xota̱ na̱xi̱ńdaá
11Kó ko̱jo kjo̱a̱a̱ ji, ta̱ngatꞌanii̱ jín xí indajoo̱,
nga kꞌuindondé án xota̱ xi ndyi̱a̱ꞌniú, ki̱a̱ ngi̱yaa̱ ndáńchꞌi̱ xi jmí ndáfoajiín.
12¡Jún xota̱ xi ndyi̱a̱ꞌniú xi to̱kó tjínjnú kjo̱a̱chiyá,
ndibá nginíjnú ki̱a̱ ndi̱tse̱n xi ꞌniú tikoón!
Ngotꞌe̱ ꞌne̱, xi ma joó chji̱ni̱e̱ꞌén tsꞌéntsangiyaa.
13Xota̱ tji̱e̱e̱ Jundáa̱ jè xikoó tsi tji̱e̱nxtioꞌniúna xikó maá ngo yáchjonyá,
kó xota̱ tji̱e̱e̱ Efraii̱n kuí boá xi xikoó tsi yáyojó ka̱mana.
Kó jí na̱xi̱ńdáꞌniú Sioo̱n, jí boá xi xikoó ngo ki̱cha̱ndojó xi boaꞌa já xí chꞌokon, sa̱ꞌiin ji.
Án boá xi sa̱ꞌin an nga ndíi̱ skjánjo̱ xota̱ xi chji̱a̱ni na̱xi̱ńdá Ngresia̱.
14Kó Néná xcha̱ nga kuí boá xi tikóntjoón,
ko̱jo xcha̱ nga skji̱ní yáyojoó xikó maá ndiꞌícho̱ꞌo̱n,
Néná boá xi sa̱ꞌínkjanie ndi̱ja̱a̱ cho̱tsa̱nga̱a̱,
kó ki̱a̱ ko̱e̱je̱jin ngi̱jii̱n ndyíkí xi chji̱a̱ni nínga na̱ngii̱.
15Néná xí tsi̱ꞌe̱ jájuún, kuí boá xi ka̱ma ni xi ꞌbíchjaá yáyojoó,
sa̱ꞌínkjié ko̱jo sa̱ꞌínkjítie xi beꞌé ndi̱jo̱ndayojoo̱,
kó kꞌuí ko̱jo ko̱jno̱kie xikó má tsꞌénná nga ꞌyó binoo̱,
kó sꞌi̱kitsie má tasa̱ yiꞌii̱, xikó maá ndi̱ja̱ xi síndo nga̱són ṉchaa̱n.
16Kui ni̱xtjin jàn Nejnú boá xi kꞌo̱xiéꞌájnú,
xikó má tsꞌén ꞌboxiéꞌá cho̱tsa̱nga̱a̱ xota̱ na̱xi̱ńdaá,
kó kuí boá xi ka̱ma xikó maá ndi̱jo̱ tsjakon xi ꞌbíndoo̱ ni xi ꞌbíjñaá xtjien ínchjiín,
kui xi ꞌna̱ má ka̱má tꞌanangii̱.
17¡Achichí tsie kjo̱a̱tsja xi kꞌuieé, ko̱jo achichí ꞌniú tsjá kꞌuié!
To ndso̱ko̱a̱n ṉño̱paa̱n ko̱jo binoo̱, kuí boá xi sa̱ꞌínxchá já xo̱ngo̱ò, ko̱jo ínchjín xo̱ngo̱ò.
Trenutno izbrano:
Sakariyaa̱ 9: MAIX
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014