Sakariyaa̱ 14
14
Nga sa̱ꞌín ndi̱yà Néná
1Ngotꞌe̱ ꞌne̱, jè ndibá ni̱xtjii̱n Néná, kó ngamasiee̱n ndi̱yàtiée̱ si̱ꞌankabi ni xi kachjeꞌéxín kjo̱a̱ꞌniú jí, 2ngatꞌa̱ án boá xi kꞌuitiko án ngayeje na̱xi̱ńdaá tsi̱ꞌe̱ nga skjánjo̱ na̱xi̱ńdáꞌniú Jerusalee̱n, kó kui na̱xi̱ńdáꞌniuú si̱ꞌaa̱n, kó ndiꞌaa̱ xotaa̱ si̱ꞌanchejeé ni xi tjiín, kó chꞌo si̱ꞌanjo̱kjo̱aꞌniú ínchjiín, kó masien xota̱ xi síndo ki̱a̱a̱ xi kongínjo̱ꞌniú, kó xota̱ xi ngasee̱ ki̱a̱ kꞌuíndora ki̱a̱ na̱xi̱ńdáꞌniuú.
3Sꞌe̱ jaskan Néná kjo̱taxie, kó skjánjo̱ kui na̱xi̱ńdaá, xikó má tsꞌén bixkán nga ma kjo̱a̱xcha̱án. 4Kó kui ni̱xtjin jàn, Néná ki̱a̱ ko̱siénsón sé ki̱a̱ na̱xi̱ nínga tjín yáꞌoliboo̱, kui xi tikón kje̱n na̱xi̱ńdáꞌniú Jerusalee̱n, ki̱a̱ xtji̱e̱e̱n nínga fotjo tsꞌueé, kó kui na̱xi̱ nínga tjín yáꞌoliboo̱ jó tjín ka̱ma, ngamasiee̱n má nga ko̱kjanga, kósꞌe̱ ngo nangi són ka̱ma xtji̱e̱e̱n nínga ꞌbosꞌien tsꞌueé, masien kui na̱xi̱i̱ xi ki̱a̱ sꞌi̱jña xtji̱e̱e̱n nínga ta̱ꞌin, kó xi ngi masiee̱n, ki̱a̱ sꞌi̱jña xtji̱e̱e̱n na̱ngi. 5Kó nangi soón Inoo̱n, ngiti̱ ka̱májín ku̱i̱tjá ngatꞌa̱ kui nangi són xi tikón ngamasiee̱n ngajó kui na̱xi̱i̱, ngaskande na̱xi̱ńdáꞌniuú Asaa̱l kjo̱chó, kó jún ku̱i̱yòjnú xikó má tsꞌén tsanga xotaa̱, kjiꞌanga kamá kjo̱a̱ndi̱ko̱ón ni̱xtjin nga kisꞌijña Usiyaa̱, nda̱ ree̱ nangi Jundáa̱, kó kji̱ndi̱bá Néná nga kji̱ndi̱bájo̱ ngayeje xota̱ tsjiee̱.
6Kó kui ni̱xtjii̱n ngiti̱ tsijénjín ka̱ma, ti̱nde ngiti̱ jñójín ka̱ma. 7Kuí boá xi ngo ni̱xtjin xi be Néná ka̱ma, ti̱nde ni̱xtjinjín, ti̱nde jñójín ka̱ma, ngatꞌa̱ ngije ka̱majñoó to̱kó tsijen ngase ka̱ma. 8Kó kui ni̱xtjii̱n nga, ki̱a̱ na̱xi̱ńdáꞌniuú Jerusalee̱n kjo̱tjoni ndáfoa xi tikón, masien kui ndáfoaa̱ xi xtji̱e̱e̱n Ndáchíkón Kꞌieèn ko̱e̱je̱, kó xi ingi masiee̱n xtji̱e̱e̱n nínga tikón Ndáchíkón Menditerráneoo̱ ko̱e̱je̱, nga ni̱xtjii̱n cho̱ndoboá ko̱jo nga ni̱xtjii̱n cho̱nchꞌàn.
9Kó Néná, kuí boá xi ka̱ma Ree̱ ngayeje nga̱sondiee̱. Kui ni̱xtjin jàn ta̱ ngo tsí ka̱ma Néná, kó ta̱ ngo tsí ka̱ma jaꞌeén. 10Ngayeje na̱xi̱ńdaá nga ngo nangi xi són ka̱ma, ndeskande na̱xi̱ńdáꞌniú Jeba̱, ngaskande na̱xi̱ńdáꞌniú Rimoo̱n Nengee̱b. Kó na̱xi̱ńdáꞌniú Jerusalee̱n achichí ndikón si̱ꞌan, kó kꞌuié xota̱ kui ngi̱ndiee̱, ndeskande nga̱ntjo̱a̱a̱ Benjaa̱, ngaskande nga̱ntjo̱a̱ xchaá ko̱jo nga̱ntjo̱a̱a̱ Anguloo̱, kó ndeskande Tarieé Ananee̱l, ngaskande ngi̱ndie nínga ꞌnaxié ndaá tostsi̱je̱è xi tsi̱ꞌe̱ nda̱ ree̱. 11Kó ki̱a̱ kꞌuíndo xotaa̱, kó nginijánjín ka̱ma ngo ngi̱ndie xi ndajín, ta̱sá kuí na̱xi̱ńdáꞌniú Jerusalee̱n nga ndatsꞌèn kꞌuíndo xota̱ ki̱a̱a̱, kó ka̱maꞌniátakón.
12Kó kuí bí chiꞌin xi Néná sa̱ꞌínꞌónnii̱ ngayeje xota̱ na̱xi̱ńdá xí askjanjo̱ na̱xi̱ńdáꞌniú Jerusalee̱n: Kjo̱tsòn yojoo̱ ndatsi to̱kó tjíndo ngase, kó ndyi̱ko̱n ki̱a̱ kjo̱tsòn nínga tikón, kó na̱je̱n ki̱a̱ kjo̱tsòn ngi̱ya tsꞌoa. 13Kó kui ni̱xtjii̱n Néná sa̱ngíyaá ngo ndikón xí achichí ꞌniú, nga kjiꞌanga ngo xi ko̱óꞌniú tsja xi ingoo̱, ti̱kuii skjánjo̱ xkjín. 14Ko̱jo na̱xi̱ńdáꞌniú Jundáa̱ skján ki̱a̱ na̱xi̱ńdáꞌniú Jerusalee̱n nga, kó kꞌuitíkó ngayeje kjo̱a̱cho̱n xi tjiín ngayeje na̱xi̱ńdá xí síndotꞌatiñaa̱, xikoó: To̱nsinié, ko̱jo to̱ntiboa, ko̱jo kjín xtjí xi nda. 15Kó ko̱jo ndi̱je̱, ko̱jo ndi̱je̱tajá, ko̱jo cho̱toꞌoyitsꞌe̱n, ko̱jo bórró, ko̱jo ngayeje cho̱ xi tjín nínga síndo ndiꞌaa̱ xotaa̱ xi ti̱ bo̱a̱ ti̱ ka̱maa̱ nga.
16Kó ngayeje xota̱ xi kꞌo̱ngii̱ yojoo̱, xi kju̱i̱e̱sónjín xi chji̱a̱ni na̱xi̱ńdá xí askjanjo̱ na̱xi̱ńdáꞌniú Jerusalee̱n, xki̱ nó xki̱ nó ko̱e̱je̱ nga ko̱e̱je̱kasiéntikoó ki̱a̱ ngindyi̱ko̱n Ree̱, ngindyi̱ko̱n Néná xí tsi̱ꞌe̱ jájuún, kó ki̱a̱ sa̱ꞌín sꞌué xí niꞌaán ndiꞌa ti̱ki̱e̱e̱n. 17Kó kui xtín xota̱ ndiꞌa xi ko̱e̱je̱nijíngíjín ki̱a̱ na̱xi̱ńdáꞌniú Jerusalee̱n, tsi̱ꞌe̱ nga ko̱sieéntikoó Néná xí tsi̱ꞌe̱ jájuún, jmí stsé ko̱a̱ꞌájiín. 18Kó tsi kui xtín xota̱ ndiꞌa xi chji̱a̱ni nangi Ejiptoo̱ ko̱e̱je̱nijíngíjín na̱xi̱ńdáꞌniú Jerusalee̱n, kó tsi ko̱e̱je̱kasiénjiín tikoó Néná, ti̱nde kui jmí stsé ko̱a̱ꞌájiín nga, kó ta̱sá kji̱ndi̱bá kui chiꞌin xi Néná sa̱ꞌínꞌónnii̱ xota̱ na̱xi̱ńdá xi ko̱e̱je̱jín sꞌueé ndiꞌa ti̱ki̱e̱e̱n. 19Kuí boá ni xi ka̱mataꞌin xota̱ Ejiptoo̱ ko̱jo ngayeje xota̱ xi ko̱e̱je̱jín nga ka̱ma sꞌueé ndiꞌa ti̱ki̱e̱e̱n.
20Kui ni̱xtjin jàn, ngaskande ni xi jmeyaá kjásén ndi̱je̱e̱ kjótꞌaa̱ ngo jaꞌén xí bi̱ tsó: NI TSJIE XI JE TSI̱ꞌE̱ NÉNÁ, kó ti̱ji̱í xí síndo ki̱a̱ ndiꞌaa̱ Néná, kuí boá xi xikoó tsi tasa̱ yiꞌi ka̱ma ki̱a̱ nga̱són ṉchandikoón. 21Ngayeje ti̱ji̱í xí tjín ki̱a̱ na̱xi̱ńdáꞌniú Jerusalee̱n ko̱jo na̱xi̱ńdáꞌniú Jundáa̱, jè ni xi tsi̱ꞌe̱ Néná xí tsi̱ꞌe̱ jájuún je kamá, kó ngayeje xota̱ xi cho̱ sa̱ꞌínkꞌién xi sa̱ꞌínkꞌasꞌiee̱n Néná, ki̱a̱ ko̱e̱je̱ kó skjíbé kuí nii̱, kó kui sa̱ꞌínkjién nga sa̱ꞌínchján ni. Kó kui ni̱xtjii̱n ngiti̱ kꞌuiéjín xota̱ xi ni ko̱tíñá ki̱a̱ Ndiꞌaa̱ Néná xí tsi̱ꞌe̱ jájuún.
Trenutno izbrano:
Sakariyaa̱ 14: MAIX
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014