Malakiyaa̱ 3
3
1Kꞌi̱e̱ tsꞌéntsangiya an chji̱ni̱e̱ꞌénna, kó kuí boá xi ku̱i̱ꞌíjñanda ndi̱yà ngindyikón án. Kó kui Ndi̱a̱ xi ndyi̱mindyiséjnú jún, ta̱niján má kji̱ndi̱bá ki̱a̱ na̱ngo̱xi̱i̱, kó kji̱ndi̱bá kui ndítsjie xi tsi̱ꞌe̱ kjo̱a̱ꞌbíndaa̱ nga, kui xi mejénjnú jún. Jànꞌa̱n, ki̱a̱a̱ je tsꞌéndibá. Tsó Néná xí tsi̱ꞌe̱ jájuún. 2Kó, ꞌyá xí xchikjoaá ni̱xtjin nga kji̱ndi̱bá. Kó, ꞌyá xí ka̱maa̱ ko̱si̱e̱nkixi̱ kjiꞌanga ko̱kó yojoo̱, ngatꞌa̱ ndiꞌí xí tsꞌenkjiéná boá kuí, ko̱jo kuí boá xi ndo̱jo̱ xi tsꞌénkjién xota̱ xi monié ńjñoó. 3Kó kꞌuijñá nga sa̱ꞌíndaya ko̱jo nga sa̱ꞌíntsjie to̱ntiboaa̱, kó sa̱ꞌíntsjiejón ndií Lebii̱, xikótsꞌèn niꞌándaya ko̱jo niꞌántsjiejón to̱ntiboaa̱ ko̱jo to̱nsinieé, tsi̱ꞌe̱ nga ka̱maa̱ ko̱e̱je̱joo̱ Néná kjo̱a̱tjó xi tjiín kjo̱a̱kixi̱i̱. 4Kósꞌe̱ kjiꞌá boá nga tsja ka̱maa̱ Néná kuí kjo̱a̱tjó xi sa̱ꞌínkꞌasꞌien Jundáa̱ ko̱jo na̱xi̱ńdáꞌniú Jerusalee̱n, xikó má kamá ni̱xtjin xi tjoón ko̱jo ni̱xtjin xchá jàn.
Néná sa̱ꞌínjeé xota̱ na̱xi̱ńdaá
5Kó kji̱ndi̱bákónjnúꞌun tsi̱ꞌe̱ nga skuie an tsi nda ko̱jo tsi ndajín kiniꞌánjnú, kó chistiko̱ ka̱ma an kondra̱a̱ xota̱ xi tjiꞌee̱, ko̱jo xota̱ xi katsꞌéntꞌaa̱kjo̱a̱ xkjín, ko̱jo kondra̱a̱ xota̱ xi ngiboanéná tsó nga ꞌbindísó, ko̱jo kondra̱a̱ xota̱ xi tsꞌénchéjeé to̱n xi tsꞌén xota̱ xi tsꞌén xá jno̱o̱, ko̱jo xi tsꞌénchéjeé ínchjín kꞌán xi je kꞌien xi̱ꞌii̱n, ko̱jo xi tsꞌénchéjeé xota̱ xi xꞌi̱a̱a̱n, ko̱jo kondra̱a̱ xota̱ xi tsꞌénkꞌáka jé xota̱ xi xín nangi chji̱a̱ni, kó nde tsakjónjínna. Tsó Néná xí tsi̱ꞌe̱ jájuún.
6Ngatꞌa̱ an xi Ne an, bosíkjojín an yojona, kuíni nga jún xota̱ tji̱e̱e̱ Jakoo̱b, kiniꞌánkjiejínjnú jún. 7Ndeskande ni̱xtjii̱n xi xchájnú nga ikꞌíjñátꞌaxínjnú kjo̱a̱kitina, kó kiniꞌánkjatjosónjínjnú. ¡Ndibáchon nginíjnúꞌun, kó Án kjuínkón nginíjnúꞌun! Tsó Néná xí tsi̱ꞌe̱ jájuún, ta̱nga jún bi̱ ꞌmíjnú: Kótsꞌèn nga ji kongínchon nginíjne̱. 8A ka̱márií xotaa̱ nga sa̱ꞌínchejeé Néná. Ta̱nga jún boá xi kiniꞌánchejéjnúꞌun. Kó bi̱ kiꞌmíjnú: Mí xí kiniꞌánchejéjne̱ Ji. Tie nga úchaán ni xi maxchájnú ko̱jo chji̱e̱e̱. 9Ngatꞌíko̱jonii̱ jún kjo̱a̱a̱ ngayeje ni xi ndajiín, ngatꞌa̱ jún ngayeje na̱xi̱ńdá, ndyi̱niꞌánchejéjnúꞌun.
10Ndibájo̱jnú ngayeje ni xi tie nga úchaán ki̱a̱ ndiꞌa yiꞌi nínga chjaꞌátjó ni xi maxchaá, kó ngatꞌié nichinie ndiꞌana. Kósꞌe̱ chítꞌajnúꞌun kjo̱a̱a̱ kui nii̱. Tsó Néná xí tsi̱ꞌe̱ jájuún, akjénráa̱ nga skjíxꞌájín an nga̱ntjo̱a̱masienkjaá ndiꞌakꞌajmii̱, kó skjitjónjónjnúꞌun tsie kjo̱a̱niꞌánchikonñé ngaskande nga kꞌo̱tioo̱. 11Kó kjin sa̱ꞌinkjí an cho̱ xi tsꞌénníꞌiín ni tjiéjnú, kó ka̱májiín sa̱ꞌínkjatsón to xi tsjá tꞌanangii̱, ti̱nde ka̱májiín nga ndi̱ sa̱ꞌín tostsi̱je̱è xí yajá jno̱o̱. Tsó Néná xí tsi̱ꞌe̱ jájuún. 12Kó ngayeje na̱xi̱ńdaá achichíra̱ tsjaa̱ ka̱tso̱jnú jún, ngatꞌa̱ jún boá xi ka̱majnú xikoó ngo na̱xi̱ńdá xí ngayeje xi sa̱ꞌínmején. Tsó Néná xí tsi̱ꞌe̱ jájuún.
13Achichí tajá ndokjo̱a̱jnú kondra̱ tsa̱ꞌa̱n. Tsó Néná. Ta̱nga bi̱ ꞌmíjnú jún: Mí nii̱ bo̱a̱ xi kandokjo̱a̱jne̱ kondra̱ tse̱. 14Bi̱ kiꞌmíjnú: Ta̱kjo̱a̱ndaní nga Néná kiniꞌánxátꞌajne̱. Mí chjínií nga si̱ꞌankjatjosónjne̱ kjo̱a̱botíxomaa̱, ko̱jo nga ndasen ku̱i̱ndyionjne̱ ngindyi̱ko̱n kui Néná xí tsi̱ꞌe̱ jájuún. 15Kuíni nga ngotꞌe̱ ꞌne̱ achichíra̱ tsjaa̱ ꞌmíjne̱ xota̱ xi nkꞌakoo̱n, kó bo̱a̱ ꞌmíjne̱ nga xota̱ xi tsꞌén ni xi ndajiín nda maá, kó nga xota̱ xi tsꞌénkjaàn Néná jmí ni májiín.
Xo̱jo̱o̱n Néná
16Ta̱nga kui xi katsakjónní Néná ja̱kꞌi̱e̱ ja̱ngaján tsíchji̱a̱jo xkjín, kó Néná asiénijoo̱n, kó katsꞌénseén. Kó ngo xo̱jo̱n kisitꞌa tsi̱ꞌe̱ nga si̱ꞌankjaꞌátsjien ngindyi̱ko̱n kui, kjo̱a̱ndaa̱ xota̱ xi tsakjón Néná, ko̱jo xi bendikón jaꞌeén. 17Kó bi̱ tsó Néná:
Ni̱xtjin nga kotíjña̱nda an, kuí boá xi ka̱ma xikoó tsi ngo ni tsjakjiꞌi xi to̱nsinié, kó sa̱ꞌinjetakóo̱n xikoó ngo na̱ꞌmi xi tsꞌénjétakoón kui ndí xí tsꞌén xaá. 18Kósꞌe̱ kjiꞌá boá nga ko̱si̱kjoyájnú yojojnú, kó ka̱ma xcha̱ cha̱n cha̱njnú ꞌyání xi kixi̱, kó ꞌyání xi ꞌniú ndajín, ko̱jo ꞌyání xi ki̱a̱ tsꞌénxátꞌaa̱ Néná, kó ꞌyání xi ki̱a̱jín tsꞌénxátꞌaa̱.
Trenutno izbrano:
Malakiyaa̱ 3: MAIX
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014