Parallel

Génesis 37

37
1Jacobmi taytanpa yachasqan Canaán allpapi mana llaqtayuq hina yacharqa.
Joseymantawan wawqenkunamanta
2Kaymi Jacobpa mirayninkunamanta willakuy. Joseymi chunka qanchisniyuq watanpi kachkaspan wawqenkunawan kuska ovejakunata michiq. Chay wawqenkunaqa taytanpa churiwachan Bilhapa hinaspa Zilpapa wawankunam karqaku. Joseymi taytanman willaq paykunapa mana allinkuna ruwasqankuta.
3Israelmi llapan churinkunamantapas mastaqa Joseyta kuyarqa, machuyayninpiña churyakusqanrayku, chaymi sumaq pachata ruwarapurqa. 4Taytankupa llumpay kuyasqanta qawaspankum wawqenkunaqa Joseyta cheqnikurqaku, hinaspam allillaqa rimapayaqkupaschu.
5Huk kutipim José mosqokururqa hinaspam wawqenkunaman willarqa, chaynapim paykunaqa aswanraq cheqnirurqaku. 6Joseymi paykunata nirqa:
Kay mosqoyniyta uyariychik: 7Cha-krapim gavillakunata watachkas-qanchik, hinaptinmi ñoqapa gavillay sayariruspa derecholla karqa, qamkunapa gavillaykichikñataqmi muyuriqninpi kaspa ñoqapa gavillayman kumuykurqaku, nispa.
8Chaymi wawqenkuna nirqaku:
¿Qamqa reyniyku kaspachu ñoqaykupi munaychakunki? nispanku.
Hinaspam mosqoyninrayku aswanraq cheqnikurqaku.
9Joseymi huktawan mosqokuruspan wawqenkunaman willarqa:
Kunanmi huktawan mosqokuruni, intiwan, killawan, hinaspa chunka hukniyuq chaskakunam ñoqaman kumuykamurqaku, nispa.
10Taytanmanpas willakurqam waw-qen-kunaman hina, hinaptinmi taytanpas qaqchaspan nirqa: ¿Ima mosqoytaq chay mosqoynikiqa? ¿Ñoqachu mamaykipiwan hinaspa wawqekikunapiwan hamusaq ñawpaqnikipi pampakama kumuykunaykupaq? nispa.
11 # Hch 7.9. Chaymi Joseymanta wawqenkuna envidiakurqaku, taytanñataqmi chay willasqan mosqoymanta yuyaymanarqa.
Joseyta wawqenkuna rantikurusqanmanta
12Joseypa wawqenkunam taytanpa ovejankunata michiq Siquem lawman rirqaku. 13Chaymi Joseyta Israel nirqa:
Wawqekikunam Siquem lawpi ovejata michichkanku, paykunata watukaramuy, nispa.
Joseyñataqmi nirqa:
Rirusaqyá, nispa.
14Hinaptinmi Israel nirqa:
Rispaykiyá qawaramuy wawqekikunapa chaynallataq ovejakunapa imaynam kasqankuta, kutimuspa willawanaykipaq, nispa.
Hebrón qechwamanta kachaptinmi Siquem lawkama José chayarurqa. 15Chaymi purunpi purichkaqta huk runa tariruspan tapurqa:
¿Imatataq maskachkanki? nispa.
16Joseyñataqmi nirqa:
Wawqeykunatam maskachkani, ¿manachu maypim michisqankutapas rikukullawaq karqa? nispa.
17Hinaptinmi chay runa nirqa:
Kaymantaqa pasakunkuñam, ichaqa uyarirqanim: “Dotán lawman hakuchik” niqta.
Chaymi Joseyqa wawqenkunata qatispa Dotán lawpi tarirurqa. 18Ichaqa manaraq chayachkaptinmi wawqenkuna rikuruspanku wañurachinankupaq tanteanakururqaku. 19Paykunam kaynata ninakurqaku:
Waqaya mosqokuqqa hamuchkan. 20Kunanyá wañurachispa huk pozoman wischuykusunchik hinaspa nisunchik: “Ima purun animalchá mikururqa”, nispanchik. Chaynapim mosqoyninkunamanta yachasunchik, nispanku.
21Rubenñataqmi wawqenkunapa rimasqankuta uyariruspa paykunamanta librayta munaspan nirqa:
Ama wañuchisunchikchu, nispa.
22Rubenqa taytanmanmi kutichiyta munarqa, hinaspam wawqenkunamanta librayta munaspa nirqa:
Ama wañuchiychikchu inocente warmataqa, aswanqa kay pozollaman wischuy-kuychik, nispa.
23Wawqenkunapa kasqanman José chayaruptinmi, chay sumaq pachanta paykuna llatanaruspa, 24mana imayuq chaki pozoman wischuykurqaku. 25Hinaspam mikunankupaq tiyaykuspanku Ismael casta negociantekunata Galaad lawmanta hamuchkaqta rikururqaku. Paykunam camellonkupi Egiptoman apachkarqaku miski asnaq perfumekunata, balsamota hinaspa mirrata. 26Chaymi wawqenkunata Judá nirqa: ¿Imatataq hurqokusunchik wawqen-chikta wañurachispa chaynataq wañus-qanta pakaspanchikpas? 27Ama wañu-chisunchikchu, aswanqa Ismael runa-kunaman rantikurusunchik, wawqenchikqa aychanchikmi, nispa. Chaymi wawqenkunapas allinmi nirqaku. 28#Hch 7.9.Madián law negociante runakuna pasachkaptinkum, wawqenkuna Joseyta pozomanta hurqoruspanku Ismael casta runakunaman iskay chunka qollqepaq rantikururqaku. Chaymi Joseyta Egipto nacionman aparqaku.
29Rubenñataqmi chay pozoman kutispa Joseyta manaña tarispan, llakimanta pachankunata llikipakurqa. 30Chaymi wawqenkunaman kutirispan nirqa:
¡Warmaqa manam kanchu! ¿Imapitaq kunan rikukuykuni? nispa.
31Chaymi paykuna Joseypa sumaq pachanta hapispanku, huk chivatochata wañurachispa yawarninwan chapuparurqaku. 32Hinaspam taytankuman apaspa kaynata nirqaku:
Kaytam tariramuniku, reqsiykuy churikipa pachanchu icha manachu, nispanku.
33Chaymi reqsiykuspa Jacob nirqa:
Churiypa pachanmi kayqa, ima purun animalchiki paytaqa llikiparuspa mikurun, nispa.
34Hinaspanmi Jacobqa llakimanta pachanta llikipakuspa luto pachawan churakurqa, hinaspam churinmanta achka punchawta waqallarqa. 35Chaymi llapallan churinkuna consuelanankupaq asuykurqaku, ichaqa paymi consuelanankuta mana munaspan nirqa:
Churiymantaqa wañukunaykamam llakikusaq, nispa.
Chaynata nispanmi waqallarqa.
36Madián law runakunañataqmi Joseyta Egipto nacionpi Potifarman rantikururqaku. Potifarqa Egipto nacionpi rey Faraón waqaychaq soldadokunapa capitanninmi karqa.