Sơnròp Gơlik Gơs 50
50
Jôsep mơ làng bol Ejiptơ ñìm Jakôp
1Chòp Jôsep kun să di bèp khai dê, cum mơ ñìm. 2Gen sồr ală cau gơnoar sơnơm duh broă khai dê bong sơnơm nàng ò ồm ƀồc bèp khai in. Gen ală cau gơnoar sơnơm pơră sơnơm Israel in. 3Bol khai neh roh poan jơt ngai ơn sơnơm neh sir rau, hơ̆ la ală ngai pơră sơnơm nàng ò ồm, làng bol Ejiptơ ñìm di khai tòm poh jơt ngai.
4Tòm tŭ ală ngai ñìm moat neh rlau rau, gen Jôsep đơs mơ cau tòm hìu Pharaôn lah: “Dilah añ geh bơta nđàc di đap ală oh mi gen dan yal wơl ală jơnau do Pharaôn in kơno. 5 Bèp añ neh sồr añ ho lah: ‘Do añ rơp chơt, mê tơp tĕ añ tòm tiah bơtô ƀồc añ neh blơi rau tòm lơgar Kanaan.’ Mơ tŭ do añ guh hơ hơ̆ nàng tơp bèp añ, lồc behơ̆ añ rơp rê wơl.” 6Gen Pharaôn ho lah: “Guh tĕ nàng tơp bèp mê be jơnau mê neh ho.”
Bơta tơp ƀồc Jakôp tòm Kanaan
7Behơ̆ Jôsep cèng tơp ƀồc bèp khai, gơs ală cau duh broă Pharaôn dê, ală cau kra tòm hìu Pharaôn mơ ală cau kra tòm lơgar Ejiptơ lòt bal. 8Jơh ală cau tòm hìu nhă Jôsep, ală oh mi khai mơ tòm hìu nhă bèp khai dê lòt jun bal, tòm Gôsen gam mìng ală kơnòm mơ belàt bal mơ kơnrồ bol khai dê lơm. 9Ală rơndeh mơ cau hào ơseh kung guh bal mơ khai, ngan la dô bơta tơp ƀồc oă ngan cau. 10Dơ̆ bol khai tus di làn jă kòi Athat, đah ne hiòng Jordan, gen bol khai ñìm dô bơta ñìm rac ròc tềng hơ̆, gen Jôsep lơh dô bơta ñìm rac bèp khai in tòm poh ngai. 11Tŭ làng bol Kanaan, hơ̆ la làng bol lơgar hơ̆, gŏ bơta ñìm di làn jă kòi Athat, gen đơs lah: “Hơ̆ la dô bơta ñìm rac ròc dờng ngan làng bol Ejiptơ dê!” Tài bơh hơ̆, cau sơnđan làn hơ̆ la Abel Misraim, đah ne hiòng Jordan.
12Behơ̆, ală kòn klau Jakôp lơh jat ală jơnau bèp bol khai neh nting bơr, 13 mơ cèng ƀồc khai hơ lơgar Kanaan, mơ tơp tòm trồm lŭ ƀlàng Makpela dê, tòm toh mơ Mamre mơ Abraham neh blơi bal mơ ƀlàng sre Eprôn dê, cau Hetit, nàng lơh gơs tiah tơp ƀồc.
14Sir tơp bèp rau, Jôsep bal mơ ală oh mi khai, mơ ală cau guh jun ƀồc bèp khai dê rê wơl hơ lơgar Ejiptơ.
Jôsep yal bơta nđàc oh mi khai in
15Dơ̆ ală bi Jôsep gŏ bèp bol khai neh chơt rau, gen đơs bal mơ gơp lah: “Digơlan Jôsep rơp gơjrañ di bol he, mơ sal tê ală broă iơh bol he neh lơh khai in.” 16Gen ală bi sồr cau tus yal mơ Jôsep lah: “Lài mơ tŭ bèp mê chơt, khai neh nting bơr lah: 17‘Yal tĕ Jôsep in be do: Dan toh bơta iơh bơsak mơ bơta tìs glài ală bi mê dê, bơh bol khai neh lơh iơh di mê,’ mơ tŭ do añ dan mê toh glài ală cau dĭ Yàng Tom Trồ bèp mê dê.” Dơ̆ Jôsep kơno ală jơnau do gen khai ñìm. 18Să tòm ală bi khai tus tơmbic să di jơng khai mơ đơs lah: “Ală bol hi ngan la cau dĭ mê dê.” 19Jôsep đơs lah: “Ală bi bañ rngòt, bơh añ ala Yàng Tom Trồ ơ? 20Ală bi kòñ lơh iơh di añ, mơya Yàng Tom Trồ lơh wơl bơta kwơ añ in, nàng sền gàr bơta kis oă làng bol in, kung be neh gơlik gơs ngai do. 21Behơ̆, bañ rngòt, añ rơp ròng ală bi mơ kòn sau ală bi dê.” Gen Jôsep pơndòm pơniang ală bi mơ đơs jơnau lơbơn niam mơ bol khai.
Jôsep kra mơ chơt
22Jôsep ơm tòm lơgar Ejiptơ bal mơ hìu nhă bèp khai dê, khai kis dô rhiang jơt nam. 23Khai gŏ kòn sau Epraim dê tus di rài dơ̆ pe, mơ khai kung neh kơnđơt kơnđu ală kòn Makir, hơ̆ la kòn klau Manase dê. 24Mơ Jôsep đơs mơ ală oh mi khai dê lah: “Añ rơp chơt, mơya ngan Yàng Tom Trồ rơp tus còp ală oh mi mơ lam oh mi rê hơ lơgar mơ Kơnràñ neh ho pơgon mơ Abraham, Isak mơ Jakôp.” 25 Jôsep sồr ală kòn klau Israel ho pơgon lah: “Di ngan, Yàng Tom Trồ rơp tus còp ală oh mi. Dan ală oh mi cèng tĕ ntìng añ bơh di lơgar do.” 26Gen Jôsep chơt, khai kis dô rhiang jơt nam. Cau bong sơnơm ò ồm ƀồc Jôsep, mơ ơn tòm dô nơm bòng tòm lơgar Ejiptơ.
Currently Selected:
Sơnròp Gơlik Gơs 50: KPM2018
Označeno
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.