Sơnròp Gơlik Gơs 38
38
Juda mơ Tamar
1Tòm tŭ hơ̆, Juda lik bơh oh mi khai dê, mơ lòt ơm mơ dô nă cau Adulam, sơnđan la Hira. 2Tềng hơ̆ Juda gŏ kòn ùr dô nă cau Kanaan sơnđan la Sua gen bau mơ khai mơ ơm bal mơ khai. 3Khai bun deh dô nă kòn klau sơnđan la Er. 4Khai bun tai, deh dô nă kòn klau sơnđan la Ônan; 5mơ deh tai dô nă kòn klau sơnđan la Sela, tòm tŭ deh khai gen Juda ơm tòm Kesip.
6Juda lap bau Er in kòn tơnhoa khai, ùr hơ̆ sơnđan la Tamar. 7Mơya Er iơh bơsak di đap Yàng Jehôwa, gen Kơnràñ tơnchơt khai. 8Gen Juda sồr Ônan lah: “Mê lòt bic tĕ mơ bau bi mê, lơh wil tơl broă tòm dô nă oh bau klau khai dê, nàng tơrbŏ jơi bơtiàn bi mê dê.” 9Ônan git lah jơi bơtiàn do ò di bal mơ khai, gen tòm tŭ khai bic mơ Tamar, gen khai tuh gơtòm ù nàng ò gơs jơi bơtiàn bi khai in. 10Mơya bơta khai lơh behơ̆ ò niam nùs Yàng Jehôwa, gen Kơnràñ tơnchơt khai sơl. 11Gen Juda sồr Tamar, ƀan khai lah: “Rê tĕ ơm bơnrau tòm hìu bèp ai, jơl tus di tŭ lơi Sela kòn klau añ rơp dờng.” Bơh khai đơs lah: “Bol he pal kơrhia, rngòt khai chơt kung be bàr nă bi khai mòn.” Gen Tamar rê ơm tòm hìu bèp khai.
12Tŭ tơngai sơlèt rlau, kòn ùr Sua, bau Juda chơt. Tòm tŭ khai neh jơh moat, gen Juda bal mơ Hira oh mi khai dê, cau Adulam, guh tus hơ tiah ală cau chài siat sơnò belàt he tòm Thimna. 13Cau yal Tamar in git bơta hơ̆ mơ đơs lah: “Do po bèp ai lòt tus hơ Thimna nàng siat sơnò belàt.” 14Gen khai hồ ào bơnrau, ai chèo jơm mat mơ nggòc ồi di să khai, gen nggui hơ bơdìh mpồng ƀòn Enaim, di gùng lòt tus hơ Thimna. Khai lơh behơ̆ tài bơh khai gŏ Sela neh dờng rau, mơya ò tòmbau khai mơ Sela. 15Tòm tŭ Juda gŏ khai, tồnlah dô nă cau ùr dri, tài bơh khai jơm muh mat. 16Gen Juda tus rềp mơ khai mơ đơs lah: “Ai añ in tus mơ ai,” bơh khai ò git ùr hơ̆ la ƀan khai. Tamar lùp lah: “Ñchi mê ai añ in nàng tus mơ añ taih?” 17Khai ho lah: “Añ rơp pơyoa ai in dô nơm kòn be bơh mpồl añ jê.” Cau ùr lùp: “Ñchi cơng tàng mê rơp ai añ in tus dê tŭ lơi mê pơyoa be taih?” 18Juda ho lah: “Ñchi añ kòñ ai ai in nàng lơh cơng tàng tŭ do taih?” Cau ùr đơs lah: “Ƀang kì, che, mơ gai jra di tê mê.” Khai ai mo mơ lòt tus bic mơ ùr hơ̆. Khai bun bơh Juda. 19Gen cau ùr ñă lòt, hồ chèo mơ soh wơl ào bơnrau.
20Juda sồr cau Adulam, oh mi khai dê, cèng kòn be nàng tơwài ală phan cơng tàng bơh di tê cau ùr hơ̆, mơya khai jòi ùr hơ̆ ò bàn. 21Gen khai lùp làng bol di tiah ùr hơ̆ ơm lah: “Ntềng đah cau dri bơh lài khai ơm di gùng đah bơdìh mpồng ƀòn Enaim taih?” Bol khai ho lah: “Tềng do ò gơs dô nă cau dri lơi.” 22Gen khai rê hơ Juda mơ yal lah: “Añ jòi khai ò bàn, mơ cau yal lah: Tềng do ò gơs dô nă cau dri lơi ò.” 23Juda đơs lah: “Do, añ neh pơyoa kòn be, mơya mê jòi khai ò bàn. Behơ̆, lòi khai in prap gàr phan cơng tàng hơ̆, rngòt he gơs bơta ƀàssìl.”
24Pơgap tòm pe kơnhai tơnơ̆, cau yal Juda in lah: “Tamar, ƀan mê neh lơh dri, mơ bơh bơta dri hơ̆, khai neh bun.” Juda đơs lah: “Cèng chu tĕ khai.” 25Tòm tŭ cau lam ùr do lik gen khai pơyoa jơnau đơs mơ po bèp lah: “Dan bèp sền tĕ ƀang kì, che mơ gai jra do la phan ñcau. Añ neh gơs bun bơh cau gơs ală phan do.” 26Juda đal git ală phan hơ̆ mơ đơs lah: “Khai la song ring rlau mơ añ, bơh añ ò ai Sela, kòn klau añ khai in.” Gen Juda ò ơm bal mơ khai tai.
27Tòm tŭ khai jê deh, do, tòm kơndul khai gơs kòn bàr. 28Tòm tŭ jê deh, dô nă lik tê lài, cau đơng deh at di tê mơ pùt che pơrhê, mơ đơs lah: “Do, dô nă lik lài.” 29Mơya khai tơmut wơl tê, gen behơ̆ bi khai lik. Cau đơng deh đơs lah: “Mê ƀlong lài do!” Bol khai sơnđan la Pheres. 30Oh khai lik tơnơ̆, la cau gơs che pơrhê di tê, mơ bol khai sơnđan la Jerah.
Currently Selected:
Sơnròp Gơlik Gơs 38: KPM2018
Označeno
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.