32
Bơta gơtơnggŏ Jakôp dê tòm Mahanaim. Bơta khai lòt gùng mơ ală phan khai ai Esau in
1Jakôp kư̆ lòt gùng, mơ gơs ală cau gơnrơh Yàng Tom Trồ dê tìp mơ khai. 2Tòm tŭ Jakôp gŏ ală bol hơ̆ gen khai đơs lah: “Do la tiah sàl mpồl ling Yàng Tom Trồ dê.” Gen khai sơnđan tềng hơ̆ la Mahanaim. 3Jakôp sồr cau kong sồr lòt lài nàng tus hơ Esau bi khai, tòm kơnhwàl Seir lơgar Edôm dê. 4Khai sồr bol hơ̆ lah: “Bol mê đơs mơ Esau, cau tòm añ be do: ‘Añ neh ơm ing tòm hìu Laban tus di ngai do. 5Añ gơs kơnrồ, alàng, belàt, dĭ ùr, dĭ klau, behơ̆ añ neh sồr cau yal nàng ồng in git lài tồ añ in geh bơta nđàc di đap ồng.’”
6Ală cau kong sồr rê wơl đơs mơ Jakôp lah: “Bol hi neh lòt tus hơ Esau bi ồng, mơ khai cèng bal poan rhiang cau klau tus nàng rò ồng.” 7Jakôp rngòt ngan mơ moat jrùng, gen cah ală cau lòt bal mơ khai, mơ ală mpồl belàt, kơnrồ, làkđa tòm bàr đah mơ đơs lah: 8“Dilah Esau tus mơ lơh dô mpồl do, gen mpồl ne rơp geh dô klàs.”
9Gen Jakôp hòi dan lah: “Ơ Yàng Tom Trồ Abraham ồng añ jê, Yàng Tom Trồ Isak bèp añ jê, Ơ Jehôwa! Kơnràñ neh đơs mơ añ lah: ‘Rê tĕ hơ lơgar mê, hìu nhă mê dê, gen Añ rơp ai bơta lơngai mê in.’ 10Añ ò di pal dòp ală bơta kòñ gơboh mơ bơta dòn song mơ Kơnràñ neh ràng tơlik dĭ gơna Kơnràñ in. Tòm tŭ añ lòt gan hiòng Jordan añ mìng gơs gai jra añ, mơ ngai do añ neh gơlik gơs bàr mpồl do. 11Behơ̆, khoai Yàng Tom Trồ dong añ klàs bơh di tê Esau bi añ, bơh añ rngòt khai tus sò lơh añ mơ lơh mè bal mơ ală kòn sơl. 12 Mơya Kơnràñ neh đơs lah: ‘Ngan behơ̆, Añ rơp ai bơta lơngai mê in, mơ lơh jơi bơtiàn mê in oă be bràs dàlềng, cau ò jai kòp tài bơh oă ir.’”
13Khai bic mang tềng hơ̆, mơ ai ală phan khai dê nàng lơh phan ơn tồ ai Esau bi khai in: 14bàr rhiang nơm be me mơ bàr jơt nơm be dam, bàr rhiang nơm belàt mơ bàr jơt nơm belàt dam; 15pe jơt nơm làkđa me gơs kòn pô, poan jơt nơm kơnrồ me mơ jơt nơm kơnrồ dam; bàr jơt nơm alàng me mơ jơt nơm alàng kòn. 16Gen khai jào kòp mpồl tòm tê cau dĭ khai in mơ sồr lah: “Ală bol mê lòt tĕ lài mơ añ mơ lam mpồl do ngài mơ mpồl ne.” 17Khai sồr cau lam mpồl lài mơ ală mpồl be do: “Tòm tŭ Esau bi añ tìp mơ lùp mê lah: ‘Ñcau mơ mê ơm? Ntềng đah mê lòt? Mơ mpồl phan poan jơng di đap mê gen la phan ñcau dê taih?’ 18Gen ho tĕ lah: ‘Phan Jakôp, cau dĭ ồng dê, hơ̆ la phan ơn Esau in, cau tòm añ jê, mơ do, să tòm khai jat bơh tơnơ̆.’” 19Jakôp kung nting jơnau hơ̆ cau lam mpồl bàr mơ pe mơ jơh ală cau lòt jat sền gàr ală mpồl, mơ đơs: “Tòm tŭ bol mê tìp Esau, ală bol mê kah jơnau hơ̆, 20mơ đơs be do: ‘Do, Jakôp cau dĭ kơnràñ dê jat bơh tơnơ̆ bol hi.’” Bơh khai kơlôi lah: “Añ cèng phan do ơn lài tồ Esau in rài bơta gơjrañ, gen tơnơ̆ añ rơp tìp mat mơ khai, digơlan khai rơp dòp rò añ.” 21Behơ̆, phan ơn do cèng lòt lài, ai khai mang hơ̆ ơm wơl tòm sàl.
22Tòm trồ mang, khai guh bic, lam bàr nă bau ùr khai, bàr nă dĭ ùr, mơ jơt dùl nă kòn khai dê, tiă di tơrniă Jabok. 23Khai tơntiă bol khai di tơrniă, mơ jơh ală phan mơna khai tiă sơl.
Jakôp tòmpơt mơ cau gơnrơh tòm Peniel
24 Jakôp ơm is dô nă khai, gen gơs dô nă cau tòmpơt mơ khai jơl tus di rìng àng. 25Tòm tŭ cau hơ̆ gŏ khai ò pha, gen khai tur di ntìng tơrbŏ but Jakôp dê, ntìng tơrbŏ but gơ bơrkhèt tòm tŭ khai tòmpơt. 26Gen cau hơ̆ đơs lah: “Trồ neh àng rau, ơm tĕ, lòi añ in lòt;” mơya Jakôp ho lah: “Dilah mê ò ai lơngai añ in gen añ ò ai mê in lòt ò.” 27Cau hơ̆ lùp lah: “Ñchi sơnđan mê taih?” Khai ho lah: “Sơnđan añ la Jakôp.” 28 Cau hơ̆ đơs lah: “Sơnđan mê ò di la Jakôp tai, mơ rơp sơnđan la Israel, tài bơh mê neh tòmpơt mơ Yàng Tom Trồ mơ kòn mơnus, mơ mê neh geh pha.” 29 Jakôp lùp lah: “Dan yal añ in git sơnđan mê.” Khai ho lah: “Mbe lơh mê lùp sơnđan añ taih?” Gen khai ai lơngai Jakôp in tềng hơ̆. 30Jakôp sơnđan tiah hơ̆ la Peniel bơh khai đơs lah: “Añ neh gŏ tòm toh mat mơ Yàng Tom Trồ mơ bơta kis añ jê gam geh dong klàs.” 31Tòm Tŭ khai lòt gan Peniel, khai gŏ mattơngai lik rau, mơ khai lòt bơrkhèt jơng. 32Bơh hơ̆, tus di ngai do làng bol Israel ò gơs tŭ lơi sa ară di ntìng tơrbŏ but, tài bơh cau hơ̆ neh tur di ntìng but Jakôp dê, di tiah ară tơrbŏ but.