3
Kòn mơnus tìs glài
1 Tòm ală phan poan jơng tòm ƀlàng mơ Jehôwa Yàng Tom Trồ neh lơh gơs, bơs la jak pơrlồm rlau jơh. Bơs đơs mơ cau ùr lah: “Ngan la Yàng Tom Trồ neh sồr ùr klau ai bañ sa plai ală chi tòm suơn sơl?” 2Cau ùr ho mơ bơs lah: “Bol hi sa di ală plai tòm suơn, 3mơ bơh pơnah plai chi hòn digùl suơn, Yàng Tom Trồ neh đơs lah: ‘Ùr klau ai ò di sa mơ kung bañ ƀư, rngòt bàr nă ùr klau ai rơp chơt mòn.’” 4Chòp, bơs đơs mơ cau ùr lah: “Ùr klau ai ò gơs tŭ lơi chơt ò, 5mơya Yàng Tom Trồ git ngai lơi bol ai sa plai chi hơ̆, mat bol ai pò; bol ai rơp kung be Yàng Tom Trồ, git bơta niam mơ bơta iơh.”
6Cau ùr rmê plai chi hơ̆ dê sa bơkah, mơ tai niam mat mơ màng nàng lơh khai in gơs jak chài, gen khai pic sa mơ tong bau klau khai in ơm rềp mơ khai; bau klau kung sa sơl. 7Gen mat bàr nă bol khai pò, git lah bol khai ơm kuh lòi rồ, gen bol khai ai nha chi ƀal mơ jing gơs ntròñ nàng jơm să. 8Tus dê mho, kơno jơnau Jehôwa Yàng Tom Trồ lòt tòm suơn, cau klau mơ bau ùr khai pồn să tòm gùl ală tòm chi, nàng pleh dê mat Jehôwa Yàng Tom Trồ.
9Jehôwa Yàng Tom Trồ hòi cau klau mơ lùp lah: “Ntềng mê ơm taih?” 10Khai ho lah: “Añ neh kơno jơnau Yàng tòm suơn gen rngòt tài bơh añ ơm kuh lòi rồ, gen tàng añ dô pồn.” 11Yàng Tom Trồ lùp lah: “Ñcau neh yal mê in git mê ơm kuh lòi rồ taih? Mê neh sa plai chi mơ Añ neh nting ò di sa hơ̆ sơl?” 12Cau klau ho lah: “Cau ùr mơ Yàng neh ơn rềp dê añ ai añ in plai chi hơ̆ mơ añ neh sa rau.” 13 Jehôwa Yàng Tom Trồ lùp cau ùr lah: “Ñchi ai neh lơh behơ̆ taih?” Cau ùr ho lah: “Bơs neh ơniai añ mơ añ neh sa rau.”
14Gen Jehôwa Yàng Tom Trồ đơs mơ bơs lah:
“Bơh mê neh lơh bơta hơ̆,
gen mê rơp kong srat sơntơm
digùl ală phan poan jơng tòm hìu mơ ală phan poan jơng tòm ƀlàng,
mê rơp wìn mơ kơndul
mơ sa kơmbuh ù jơh rài mê.
15 Añ rơp lơh mê mơ cau ùr in,
jơi bơtiàn mê mơ jơi bơtiàn cau ùr in tòm gơjrañ bal.
Khai rơp jă dê bồ mê,
mơ mê rơp kap kơndòl jơng khai.”
16Kơnràñ đơs mơ cau ùr lah:
“Añ rơp bơtơl bơta bòl glar tòm tŭ ai gơs bun,
ai rơp gơs jê sồt kòp dơ̆ ai deh kòn.
Bơta gơboh ai dê rơp gơtơmut đah bau klau ai,
mơ bau klau ai rơp at bồ ai.”
17 Kơnràñ đơs mơ Adam lah:
“Bơh mê iat jơnau cau ùr
mơ sa plai chi Añ neh nting ò di sa,
behơ̆ ù kong srat sơntơm tài bơh mê,
tòm jơh rài mê pal kong bòl glar gen sồng gơlik gơs phan sa bơh tòm ù.
18Ù rơp tơnggơs lò mơ rlau lò mrơt,
mơ mê rơp sa biap ƀlàng sre dê.
19Mê rơp gơlik kơlhề muh mat
sồng gơs geh phan sa
jơl tus ngai mê rê wơl tòm ù,
la tiah mê neh lik gơs,
bơh mê la kơmbuh ù,
mê rơp rê wơl tòm kơmbuh ù.”
20Adam sơnđan bau ùr khai la Eba bơh khai la mè jơh ală kòn mơnus dê.
21Jehôwa Yàng Tom Trồ ai gơltau phan poan jơng lơh gơs ồi ào ùr klau Adam in mơ tơnsoh bol khai in.
22 Jehôwa Yàng Tom Trồ đơs lah: “Do, bơh bơta git cah is bơta niam mơ bơta iơh, jơi kòn mơnus neh gơlik gơs be He. Behơ̆, tŭ do Bol He ò ai gơnoar jơi kòn mơnus in pò tê hơđang mơ pic plai chi bơta kis mơ sa gen geh kis sùm sùm mòn!” 23Gen Jehôwa Yàng Tom Trồ bơtrơh jơi kòn mơnus lik bơh suơn Eden nàng lơòr ù la tiah jơi kòn mơnus neh gơlik gơs. 24Behơ̆, Kơnràñ bơtrơh tơlik jơi kòn mơnus bơh dê suơn mơ ơn hơ đah mattơngai lik suơn Eden dê ală ceruƀim hu hi đào ồs nàng sền gàr gùng lòt tus hơ chi bơta kis.