22
Yàng Tom Trồ lòng bơta dòn Abraham dê
1 Tòm tŭ ală broă hơ̆ neh sir rau, gen Yàng Tom Trồ lòng Abraham. Kơnràñ đơs lah: “Ơ Abraham!” Khai ho lah: “Do añ.” 2 Yàng Tom Trồ đơs lah: “Kup tĕ kòn klau dùl mê kòñ gơboh la Isak mơ lòt tus hơ tiah Môria, tềng hơ̆ ơn tĕ kòn lơh gơs phan chu duh khoai hơđang dô nơm mơnơm Añ rơp sơnio mê in.”
3Abraham guh bơh drim, kơt ừn di alàng, cèng bàr nă cau dĭ mơ kòn klau khai la Isak mơ lòt. Khai kung koh lòng nàng chu phan duh khoai, gen lòt tus hơ tiah mơ Yàng Tom Trồ neh sồr.
4Tus dê ngai pe, Abraham pò mat mpòl tiah hơ̆ bơh ngài. 5Gen Abraham sồr bàr nă cau dĭ lah: “Ơm tĕ tềng do bal mơ alàng, añ mơ oh rơp lòt tus hơ đah ne nàng duh khoai, gen bol hi rơp rê wơl hơ bol mê.” 6Abraham ai lòng chu phan duh khoai ơn Isak in tui, ai khai at ồs mơ pềs tòm tê, gen bàr nă bol khai lòt bal.
7Isak đơs mơ Abraham bèp khai lah: “Ơ bèp!” Khai ho lah: “Ơ kòn, do añ!” Isak đơs: “Do lòng mơ do ồs, mơya ntềng đah kòn belàt nàng lơh phan chu duh khoai taih?” 8Abraham ho lah: “Ơ kòn, să tòm Yàng Tom Trồ rơp rcang lòi he in kòn belàt nàng ngui lơh phan chu duh khoai.” Gen bàr nă kư̆ lòt bal.
9 Bol khai tus di tiah Yàng Tom Trồ neh sồr, tềng hơ̆ Abraham lơh cơnòng duh khoai, dap lòng hơđang, cap Isak kòn khai, mơ ơn hơđang lòng di cơnòng duh khoai. 10Gen Abraham pò tê ai pềs nàng hàl kòn khai. 11Gen cau gơnrơh Yàng Jehôwa hòi bơh hơđang trồ lah: “Ơ Abraham! Abraham!” Khai ho lah: “Do añ.” 12Cau gơnrơh đơs lah: “Bañ ƀư tê di să oh hơ̆ mơ bañ lơh bơta lơi di khai, bơh tŭ do Añ git mê duh rngòt di Yàng Tom Trồ, tài bơh mê ò pơlai mơ Añ kòn klau mê dê, hơ̆ la kòn dùl mê dê.” 13Abraham pò mat, sền gŏ bơh ngkòi khai dô nơm belàt dam, kòl ngke tòm rlau chi, gen kup belàt dam hơ̆ lơh phan chu duh khoai ala kòn khai. 14Abraham sơnđan tiah hơ̆ la Jehôwa Jire. Tài bơh hơ̆ gơs jơnau đơs lah: “Hơđang mơnơm Yàng Jehôwa dê rơp geh rcang lòi.”
15Cau gơnrơh Yàng Jehôwa dê bơh hơđang trồ hòi Abraham dơ̆ bàr. 16 Yàng Jehôwa đơs lah: “Bơh mê neh lơh bơta hơ̆, ò pơlai kòn klau mê, hơ̆ la kòn dùl mê dê, gen Añ ai să tòm Añ mơ ho bal lah: 17 Añ rơp ai lơngai lơngò mê in, bơtơl jơi bơtiàn mê gơlik gơs oă be sơmañ hơđang trồ, mơ gal be bràs di gah dàlềng, jơi bơtiàn mê rơp pìt geh ală mpồng ală cau sò tơm bol khai dê. 18 Bơh mê neh lơh jat jơnau Añ, gen ală làng bol tòm lơgar dunnia rơp kơnòm di jơi bơtiàn mê mơ geh bơta lơngai.”
19Gen Abraham rê wơl tus hơ bàr nă cau dĭ, bol khai rê wơl mơ gơp hơ Beerseba. Mơ Abraham kư̆ ơm tòm Beerseba.
Jơi bơtiàn Nakôr dê deh Rebeka
20Tơnơ̆ mơ ală broă hơ̆, gơs cau yal mơ Abraham lah: “Do, Milka kung deh kòn Nakôr in la oh mê dê.” 21Kòn tơnhoa la Us, oh klau khai la Bus, mơ Kemuel, bèp Aram dê, 22Keset, Haso, Pildas, Jitlap, mơ Bethuel. 23Bethuel la cau tơnggơs Rebeka. Milka deh phàm nă kòn klau Nakôr in, oh klau Abraham dê. 24Mơ bau cồng khai, sơnđan Reuma, kung deh kòn sơnđan la Thebah, Gaham, Tahas, mơ Maaka.