LUKA 9
9
Locceihtu Lu Haw Lae Ning A Saw
(Mat 10.5-15; Mar 6.7-13)
1Jesu nynh a zuitu hae lu haw lae ning kha pynkheihlan ko hae zah raerangsaro hae balyn dee khonaw, ccinaw dansah khonaw huhan te kawhoinaw kha a pya hae. 2Aning nynh Pachia peenaw kong ho lan te ngeccih hae dansah khylan minmin kha saw hae zah, 3“Khua na ccongnaw oh kya pawpaw mah phukuh nan oh, hoitang, zaw, aepaw te phua kha phukuh nan oh, angki heize phukhykuh nan oh.#Luk 10.4-11; Loc 13.51 4Pawtecihpaw inn kya na tee oh zemah tuin kyakhe la um oh lah tuh-e kyate la pou oh. 5Innccong ae doih oh ze, tuh-e khua kyate he na pou oh te minmin rawsenawpaw ccaekia lang nae ccu kya-e vuiping kha la khuanua sya oh,” cite a hopya hae. 6Minmin tuh pou hae zah thehoypaw kha hote ahmin takyh kya ngeccih dansah biate khua takyh lang khua a ccong hae.
Baptisma Pyatu Johan A Lu Pae hae
(Mat 14.1-12; Mar 6.14-29)
7Jesu nynh a cyipaw balyn kha uktupaw Herod nynh a thae tuh a ngaeangthua, pawccecize ccungccaw abang nynh Johan tuh chinaw kyate a thoothui vae cite a ho hae.#Mat 16.14; Mar 8.28; Luk 9.19 8Abang nynh Elijah nynh yn langkuh vae a ci hae, mingccang hae nynh langmawlya e profeh hae lukhakheit nynh bua yn thoothui a ci hae. 9Herod nynh, “Johan tuh a lu phe ka paesah vae hae, thuasalama hynhcite a konglang ka thaepaw hynh hummou athua?” a ci. Tukeiccuze Jesu kha muih lan a zuaku.
Thong Pangaw Loohdangnaw
(Mat 14.13-21; Mar 6.30-44; Joh 6.1-14)
10Locceihtu hae nynh he oun ki hae te, a cyi hae paw balyn kha Jesu a hopya hae. Jesu nynh minmin kha ko hae zah Bethsaida a ci hae paw khua langkhe mimaw lalouhte a cceih hae. 11Ccungccaw zapi nynh tuh-e tuh he a nyh hae tuh Jesu kha a zui hae, Jesu nynh minmin kha lehkhan hae zah Pachia peenaw kong kha a hopya hae, dansah ahopaw ccungccaw hae kha a dansah hae.
12Khuanin yn nae tuh, zuitu lu haw lae ning nynh a kalan oun cceih hae zah, “Ccungccaw hae hynh hein pepan e khua hae te khua taraw hae kalan cciate ryanaw te aepaw a zahku ccaw hae cciasah hae; pawccecize ramkaw kya nynh ah um oh,” cite a hopya hae. 13Thuasalama Jesu nynh, “Naemaw nynh a ae lan hae paw tuh pya oh,” a cipya hae. Minmin nynh, “Kae cceih cih zah e ccungccaw hae balyn hanlan aepaw kae re khyh lanze, sanlou phe pangaw te ngasaw zaw ning laelan pawpaw mah kae hoi khyh,” a ci hae. 14Pawccecize tuin kya pise piccan hae thong pangaw loukaw a um hae. A zuitu hae kha, “Phu kheit ze sung pangaw ccite minmin kha haungsah oh,” a cipya hae. 15Zuitu hae nynh tuhcite cyih hae zah mih balynte a haungsah hae. 16Jesu nynh sanlou phe pangaw te ngasaw zaw ning kha lah zah vaawlang dothung zah lungtuabya a ho koute eih zah ccungccaw zapi malang nyapya lan a zuitu hae kha a pya hae. 17Mih balynte ae hae zah mih vue aso koute alaepaw a eihpaw kha kee haw lae ning a khuin hae.
Peter nynh Jesu Kong A Ho
(Mat 16.13-19; Mar 8.27-30)
18Vaekheih tuh Jesu nynh a makhaete saw a sang lyakhe a zuitu hae mah amaw pe a umbua hae; Jesu nynh minmin kyakhe, “Ccungccaw hae nynh kae hynh hum yn ci hae mou?” cite a khia hae. 19Minmin nynh, “Baptisma pyatu Johan ae ci hae, abang nynh Elijah ae ci hae, mingccang hae nynh langmawlya e profeh lukhakheit nynh yn thoothui ae ci hae,” cite a khung hae.#Mat 14.1-2; Mar 6.14-15; Luk 9.7-8 20Jesu nynh minmin kha, “Nanning so hum nae ci oh mou?” cite a khia hae. Peter nynh, “Nang tuh Pachia kya-e Messiah nynh na thua,” a ci.#Joh 6.68-69
21Jesu nynh tuh-e kong tuh hum kya sanmah a hopya khyh nawlan hae kawpya hae zah tynkaring lan bya a kin hae.
A Chi lanpaw A Hoty
(Mat 16.21-28; Mar 8.31—9.1)
22“Ccungccaw Ccapaw tuh myarya yn teing cih, piccan hae, ranpibawi lepaw hae te kawbya sazae hae nynh oun vua cih hae, oun theih cih hae, te nin thumnaw kya yn thoothui cih,” cite a hopya hae.
23Mih balyn kyakhe, “Humhung zemah kae hynh yn zui ry ze, amaw te amaw kha vuakuh sah lah nin takyh a vaelantung kha puihkute yn zui sah.#Mat 10.38; Luk 14.27 24Pawccecize humhung zemah a hiinnaw kha a khumkuh rypaw tuh a hiinnaw kha a shung cih, thuasalama humhung zemah kae ka keiccuze a hiinnaw kha a shungpaw tuh a hiinnaw kha a khumkuh cih.#Mat 10.39; Luk 17.33; Joh 12.25 25Pawccecize ccungccaw lu kheit nynh laephi pynpi hynh pong a ccou zeso a hiinnaw kha a shung ze, tuhkhyhze ro athua ze, a hanlan pawmou athane? 26Humhung zemah kae te ka bya kha a mae yn thyakhaepaw tuh Ccungccaw Ccapaw nynh zemah a phu-enaw, Paaw phu-enaw te vaaw mithyaa hae phu-enaw ryte he yn thua te a maethyakhae ru cih. 27Thuasalama byaccaccing kae hopya oh, Pachia peenaw kha a muih hae cia a chih cih lei hae paw ccungccaw abang tuh hein kya a thadyn hae,” cite a hopya hae.
Jesu Muinsan Rulaekunaw
(Mat 17.1-13; Mar 9.2-13)
28E bya a ho koute nin tarya loukaw he acih tuh Jesu nynh Peter, Johan te James kha hoeibua hae zah sawsang lan mua lang a kae hae.#2Pe 1.17-18 29Saw a sang cciamang lyakhe a maesue tuh rulaekuh zah a boeining tuh phaephae ak lan araw. 30Vaekheihmawte ccungccaw lu ning tuh Jesu ryte bya a hokuh hae; tuh-e hae tuh Moses te Elijah nynh thua hae. 31Minmin tuh phu-enaw te oun langkuh hae zah Jerusalem kya Jesu nynh a ccingsah cih paw a chi lanpaw kong kha a hoku hae. 32Peter te a ban hae tuh a ngawphukuh hae; he a thaekuh hae tuh, Jesu phu-enaw te amaw ryte a thadynkheih hae paw ccungccaw lu ning kha a muih hae. 33Tuh-e lu ning hae nynh he a cciataw hae te Peter nynh Jesu kha, “Bawipaw, hein kya ah um oh paw hynh myarya ahoy; kaening nynh bu buthum kae sak sah lah, nang na hanlan bu kheit, Moses hanlan bu kheit, te Elijah hanlan bu kheit,” cite paw nynh ka ho cipaw ny leite a hopya. 34Tuhte a ho cciamang lyakhe maeking yn zi zah minmin kha pong a khong hae, Moses te Elijah nynh maeking lungkhu lang he a tee hae tuh minmin tuh a rih hae. 35Maeking kyate roi yn ccae zah, “E paw tuh ka sungsahpaw ka Ccapaw nynh thua, a bya kha la ngae oh,” a ci.#Isa 42.1; Mat 3.17, 12.18; Mar 1.11; Luk 3.22 36Roi he adae tuh Jesu makhae nynh a muih vae hae. Zuitu hae nynh tuh lyaze a muih hae paw konglang kha hum kya sanmah ho leite daebabi lan a um hae.
Imuapaw A Dansah
(Mat 17.14-18; Mar 9.14-27)
37Awkhualan khe minmin tuh mua kyate oun rungbung hae zah ccungccaw patae nynh Jesu kha oun tungku hae. 38Ccungccaw zapi laku te lukheitpaw nynh yn sia zah, “Sazae, ka ccapaw nae dopya nawlan kae ngiaku; amaw kyalya nynh ccaaw ka saah. 39Muisaw nynh bahkuh zah vaekheihmawte raerae leih a sia; a mung kyate taraphue phe thua lan karae leih a hosah, myarya ccih lan tuaa zah a kyate poutaw ry khyh. 40Tuh-e tuh deepya lan na zuitu hae ka ngia hae zah dee kho khyh hae,” a cipya. 41Jesu nynh, “Pou zynnaw hoi lei hae paw te a ccouseikuh hae paw ciihan hae, hohseciamou nae kya ka um ung cih zah kae ngaesangpah ung cih oh? Na ccapaw tuh hynhlang yn cciakhae,” a cipya. 42Imuapaw nynh a ccia lyakhe raerangsaro nynh laekhu kya khulia zah karae a hosah. Jesu nynh athyaa leipaw muisaw kha pe zah imuapaw kha a dansah, te a paaw kalan bua a pya.
A Chi lanpaw Bua A Ho
(Mat 17.22-23; Mar 9.30-32)
43Ccungccaw hae balyn tuh Pachia lesaenaw kha muih hae zah mih ngaeangthua. Jesu nynh a cyipaw miakaw kya ccungccaw miakaw mih ngaeangthua lyakhe, Jesu nynh a zuitu hae kha, 44“E bya hae hynh nae nakaring lungkhu lang tee sah, pawccecize Ccungccaw Ccapaw tuh ccungccaw hae kuih kya pya yn thua cih,” a cipya hae. 45Thuasalama minmin nynh tuh-e bya tuh thaethya khyh hae, bya asuilan kha thuruh thua zah nyhthya khyh hae; tuh-e bya konglang tuh amaw kha khia lan mah phe a rih hae.
Hummou A Lesaehua
(Mat 18.1-5; Mar 9.33-37)
46Zuitu hae laku kya hummou alehua cipaw eikunaw a um.#Luk 22.24 47Jesu nynh mih tuanaw kha a ny keiccuze imua lu kheit kha lah zah a pe khe a nung, 48te minmin kyakhe, “Humhung zemah e imua taraw hynh ka min te leh a khanpaw tuh kae kha leh yn khanpaw nynh thua, te humhung zemah kae kha leh yn khanpaw tuh kae yn sawtupaw kha leh a khanpaw nynh thua. Pawccecize nanning balyn lakuze adih huapaw tuh alesae huapaw athua cih,” cite a hopya hae.#Mat 10.40; Luk 10.16; Joh 13.20
Jesu Min te Raerangsaro Deenaw
(Mar 9.38-40)
49Johan nynh, “Bawipaw, lukheitpaw nynh na min te raerangsaro a deepaw kha kae muih zah kae khee, pawccecize aning tuh aening kya a zuikuh buapaw thua khyh,” a cipya. 50Jesu nynh, “Tuh-e paw tuh khee nan oh, pawccecize aening oun rawse leipaw tuh oun pankhaepaw nynh thua,” a cipya.
51Jesu tuh vaawlang te lawthungnaw ccyh anae vae keiccuze Jerusalem lang ccia lan a noukuh. 52Zeccuetu hae kha a malang a saw hae; minmin nynh cceih hae zah amaw hanlan paccyn khylan Samaria hae khua khuakheit kya a tee hae. 53Jerusalem lang po sulue lan a nouku keiccuze tuh-e khuaccaaw hae nynh amaw kha thuasah khyh hae. 54A zuitu hae James te Johan nynh tuh-e tuh muih hae zah, “Bawipaw, hynh-e hae hynh marya maemih khylan vaawlang te maee ccawsah lan kaw nae pya ry tou?” cite a khia hae.#2Si 1.9-16 55Jesu nynh maenuakuh hae zah a pe hae.#9.55 Abang Ccathyaa hae kya tuh, ‘Nanning tuh pawcihawpaw muisaw kya-e nynh kae thua cipaw na nyhkuh khyh oh. Pawccecize Ccungccaw Ccapaw tuh ccungccaw hae hiinnaw ro khylan yn thua khyh, thuasalama khum khylan nynh yn thua,’ cite a bechih hae. 56Tuinte minmin tuh ccangpaw khua lang a cceih hae.
Jesu Zuitu Thuanaw Aruzia
(Mat 8.19-22)
57Tuhcite minmin tuh laanpi kya a ccia lya hae khe ccungccaw lu kheit nynh, “Bawipaw, na ccianaw miakaw lang kae zui cih,” a cipya. 58Jesu nynh, “Suizaw hae nynh karung hoi hae zah vaawlang e pavaw hae nynh bu a hoi hae, thuasalama Ccungccaw Ccapaw tuh a lu nungnaw hmin sanmah hoi khyh,” a cipya. 59Jesu nynh mingccangpaw kha, “Yn zui,” a cipya. Thuasalama aning nynh, “Bawipaw, masaty ka la cceih sah lah ka paaw kha ka la uh hin sah,” a cipya. 60Jesu nynh, “Michi hae nynh mih michi hae kha la uh hae sah, nang tuh la cceih lah Pachia peenaw kong kha la ho,” a cipya. 61Mingccangpaw nynh mah, “Bawipaw, kae zui cih, thuasalama ka innbyn hae kha masaty ka la beihsya hin hae,” a cipya.#1Si 19.20 62Jesu nynh, “Hum zemah thuetung kha kyng zah nulang a hawipaw tuh Pachia peenaw hanlan ngaekuh khyh,” a cipya.
Currently Selected:
LUKA 9: ZB16
Označeno
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.