MARK 11
11
Jisu Guangh Swna Jerusalem khou Gutmei
(Met 21.1-11; Luk 19.28-40; Jhn 12.12-19)
1Kaniw Jerusalem ana guangna, Olive Chyng phay khou naimei Bethphage lev Bethani khou guang khou Jisu rui kaziap gaanv nei ta ndiulouna, 2kaney khou sa the, “Nangney hu khou naimei namv khou hei tat ro, kumna mi khou tei gut pwkhou meic gaanv khat na sini tuangclou makmei kuanniam launa bangclou bammei ta nangney ariw puni. Hei tei ricna laaguang o. 3‘Tabui khang nangney mi hei ric bam tu cho?’ twna thowkumhmei rui thanv pw e thei, ‘Kaipouc#hamh e thei kakaipouc khang mi hei kage naina e, kumna mi hei ndiu guanglou dat nuangc puni de,’ twna sa tio.”
4Khoutei kaney tat the, kumna kuanniam launa akhat chaengmun daeng khou bangclouna chaeng khou bammei ta ariw the. Kumna hei tei kaney ric the. 5Mi khou tei ding bammei gaanvsaekc rui, “Mi kuanniam launa hei ricna nangney tabui sw bam tu cho?” twna sa the. 6Khoutei Jisu rui kadyloumei tei kumcna kaniw khou daw the. Kumna kaney ta mpatlou the.
7Kaney rui kuanniam tei Jisu daeng khou nduangh guang the. Mi ruc khou tei kaniw rui kaniw tuang phey bamclou the, kumna Jisu mi khou tei dungc the. 8Khoutei chaeng khou meic mpeyna rui kaniw tuang phey bamclou the khatni baihmei guay rui thing nwang downa bamclou the. 9Khoutei kathei kahu khou tat bammei meic kangdai tei rui, “Hosanna! Poubauhmei zanc khou guangmeipu hei kahym daic diu!#Kal 118.25-26 10Guang nimei aniu pu David tuang guangcdic hei kahym daic diu! Kauh Liangmei khou, Hosanna!” twna kauc the.
11Jisu Jerusalem khou gutna Ravkai khou gut the. Kamei ramh guayna ta zauc kari karianglouna tingzyn nyan key ti thena kaziap ruhna kanei ta nduanghna Bethani thangc tat kan the.
Tadut Bang ta Siangloumei
(Met 21.18-19)
12Nthuanh thauna kaniw Bethani khou rui tat pat dat khou Jisu ndaapc the. 13Khoutei kanuy phwam gaymei tadut bang akhat duh thangc how lana mi khou tei kathai nai pungh e twna kamei guang the. Tiki guang tangc pwkhou kathai maek khe, kanuy na bam khwan the. Kalam thu hei tei tadut thai nthaipui ganv hamh khwan e. 14Khoutei, “Nang thai meic gaanv khat na rui sini tu dat zat mak kan di tho,” twna Jisu rui mi khou tei salou kan the. Hei tei kaziap nunc chu the.
Ravkai Sw Nthanmei
(Met 21.12-17; Luk 19.45-48; Jhn 2.13-22)
15Kumna kaniw Jerusalem khou guangna Ravkai lungc gutna, Ravkai khou puat zuanc bammei nunc khatni liu bammei nunc ta nthau ganc thau the. Syan akhiakmei nunc tuang paeng guay khatni aphyna zuanhmei nunc tuang paeng guay thui kadat kadaengvlou the. 16Kumna meic gaanv khat na ta sini puat phungcna ravkai kaimav tei titat ruan mak khwan e. 17Khoutei kamei rui kaniw khou nchamlouna sa the, “‘Akai ti hei zaatc guayna kalumpui kai twna kaw puni’ twna hylou mak nah cho? Tiki nangniw rui mi ti hei kwamtumei nunc kai tiswlou the.”#Isa 56.7; Jer 7.11
18Amuh daihmei nunc khatni Riakdanv dinhpouc nunc hei tei chu lana akumhna kata swluai kho cho twmei phu the. Kalam thu meic kangdai tei rui kamei rui nchamloumei khou tei lungh gut bam tina kaniw kata ping khwan e.
19Kumna tingzyn key pwkhou, kaniw kaidai khou tei rui tat pat dat the.
Tadut Bang khou rui Nchamloumei
(Met 21.20-22)
20Kumna kaniw laukhwan khwanzingh tat ruan pat dat pwkhou, tadut bang tei kamaan theic tangc bammei ta kaniw how the. 21Khoutei Pitar rui ningtow lana Jisu khou, “Rabbi, zauclo, nang rui sianglou kanmei tadut bang tei theic bam the,” twna sa the.
22Khoutei mundawna Jisu rui kaniw khou sa the, “Ravguangc khou lwm o. 23Ai rui nangniw khou kaling siakna sa tuang e: Thow pw ni mi chyngbut ti hei, ‘Nang thauna duipui khou gut ro,’ twna sana kalung khou lwm simei tuang maekna kamei samei tei kumcna pat puni de twmei lwm e thei, kamei rui samei tei kakhang taanclou puni.#Met 17.20; 1 Ko 13.2
24“Hei zaeng rui ai rui nangniw khou sa tuang e: tabui pw ni nangniw rui huayney khou neymei guay tei nangniw laatow the twna lwm o. Kum e thei hei tei nangniw khang tiilou puni. 25Nangniw huayney khang ding bampui ganv khou thowkumhmei ruc khou nangniw lungh nuancloumei tuang nai e thei, hei tei kuaklou o, kum e thei tingkauh thangc bammei nangniw Pu rui ni nangniw tuang twan lyammei guay kuaklou puni.#Met 6.14-15 26(Nangniw kuaklou mak ge thei, tingkauh thangc bammei nangniw Pu rui ni nangniw tuang twan lyammei guay kuaklou lak ge.)”b
Jisu tuang Ngamv lam khou Thanvmei
(Met 21.23-27; Luk 20.1-8)
27Khoutei kaniw Jerusalem khou guang dat the. Kumna Jisu Ravkai khou tat bam khou amuh daihmei nunc, Riakdanv dinhpouc nunc khatni gaanvthaih nunc kadaeng khou guangna, 28“Tabui ngamv khou rui nang mi guay hei taanc bam tu cho, hamh e thei mi guay hei taanh khang nang khou thow rui ngamv tiilou pwna cho?” twna kakhou sa the.
29“Ai nangniw khou lat akhat thanv puni, hei tei akhou dawlou e thei mi guay hei ai tabui ngamv khou rui taanc bam tu cho twmei nangniw khou salou puni. 30Mi kiu thu: Jahon rui duilupmei tei thow rui ngamv tiilou tina cho? Ravguangc rui ni, maansei rui cho? Nangniw akhou dawlou o.”
31Khoutei kaniw rana kaphianhna, “‘Ravguangc rui e’ twna sa ti thei, ‘Kum e thei tabui swna nangniw kakhou lwm mak tu cho?’ twna kamei rui sa puni. 32‘Maansei khou rui de,’ twna aniu sa ti thei...” (Kaniw meic nunc ta ping khwan e; kalam thu Jahon hei muhzwng changh e twna meic guayna rui laa e.) 33Kumna, “Aniw thay mak ge,” twna kaniw rui Jisu khou sa the.
Khoutei Jisu rui kaniw khou sa the, “Mi guay hei tabui ngamv khou rui ai taanc bam tu cho twmei ai ni nangniw khou salou ni tu hamh e.”
Trenutno izbrano:
MARK 11: RONGBSI
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.