MATHAIIN 12
12
Pongansa Nikhua ruia Isuan Amanchu
(Mk 2.23-28; Lk 6.1-5)
1Hava lai han Isuan pongansa nikhuana han bu muna ase u na hatuka zolai ngai ancham u na bu akheta ei sak u. #Dan 23.25 2Tenchu Pharisi ngaiin hava amu u na ama ha aril u, “Enta, pongansa nikhuana atho nok rua hava ha na zolai ngai ei tho u!”
3Aman hangai ha ati pe, “David le alom ngai ancham u lai aman ei tho ha pore u mak che mo? #1 Sam 21.1-6 4Ama ha Pathian ina aluta dali vaipol ei sak ama le alom ngai ei sak rua ni u maka chaizung ngai rong ke asak thei. #Lev 24.9 5Hatuka Dan bu pore u mak che mo? Pongansa nikhua chaizung ngaiin Biakina pongansana dana masialam asia anlo u mak. #Mip 28.9-10 6Tenchu kei na ti ni u zei hiva muna Pathian Biakin neka alian mi khat a om. 7Tenchu, ‘Lungkham ke kei zot anbolna dali ni mak.’ Hiva chong omzia imo? Hava ha re u tan la masial abui ngai asia manlo u no ta ni. #Mt 9.13; Hos 6.6 8Asik chu, Miring Sapa hi pongansa nikhua Puma.”
Mikhat Kut Athi
(Mk 3.1-6; Lk 6.6-11)
9Hava suale ama havan ata asena ei anchun u na ina ava lut.
10Hatuka enta, mi khat akut khat athi hava han amanin ama ha arakel u na, “Pongansa nikhua andam asa mo?” A chunga ansiatna ei en u na ei ti u.
11Aman hangai ha ei ti pe, “Nangni laia tumo bera khat a neia hava ha pongansa nikhua khura chul sela rut no ni mo? #Lk 14.5 12Hanle bera nek ten miring itukmo ei lian hasik han pongansa nikhua sin asa tho asa.”
13Hava han aman ha mi ha, “Na kut son ro,” ati pe hanke asona, Hatuka hava ha atei anga adam ret. 14Hatuka Pharisi ngai tual panga asuak u na ama siatna rang ei mansuk u: “Hontinmo ama hi na masiat ngai,” ei ti u.
Pathian Suak Thang
15Isuan hava ariata havan ata asuaka ase, mi tampan a nu nuka azi u hatuka aman aloma a mandam. 16Hatuka, “Nangnin koi hi mi na manthei pe u no ro,” atia adet mata chong apek. 17Isai dearin ei ril hiva chong hi ei hong kip:
18“Enro, ka suak, ama hi kei phun kei adit #Isa 42.1-4 (LXX)
hanuk hava han kei zot.
Ama chunga ka ratha phun ka ti, hatuka aman nam ngai kom rui anzika ril inti.
19Ama hi a makhal antak no ni,
a rasan ring no ni lampuia he suak no ni.
20Aman raimol akoi khiak no ni,
vaiut chammoi that no ni.
Ruiril anzik arata anmang maseng pei.
21Hatuka ama raming Jentail ngaiin ei sabei rang.”
Isua le Beelzebul
(Mk 3.20-30; Lk 11.14-23)
22Hava han kachai ei o angkhat ei hong ruai u ama ha acho chongkului hanke aman a mandama chongkului ha achong hatuka a muthei. 23Hava han amu dora anlaia, “Ama hi mo David a china nai?” ei ti u. 24Tenchu Pharisi ngaiin hava ei riat u na, “Hiva mi hi ite nimak kachai ngai reng Beelzebul leke kachai ei not,” ei ti u. #Mt 9.34; 10.25
25Ei mandon u ariata aman hangai ha ei ti pe, “ Ram hi ama le ama anduia anbak ten hava ha ei chiama asiat hatuka khua mo, in mo, ama le ama andui ten hava ha det no ni. 26Hanuk Soitan denin Soitan anot ten ama le ama aninga anduia anbak keng ani zei hale, hantin aniten a ram hontinmo ei ngir rang? 27Hatuka koi hi Beelzebul le kachai ka notin hanle na nai u ngaiin tule mo ei not, hasik han amani hi na ruiarilpu ni inti. 28Tenchu Pathian ratha le ka not ten hano Pathian ram nangni na kom a hong ani zei.
29“Hatuka mana ha ranak aneipa ha khit luia tumo hontinmo ha a ratpa ina luta a ina neinun la thei ni mo?
30“Ka tianga nok tak chu koi ana dui ke. Ka bila rakhom lui tak chu aheng ke. #Mk 9.40 31Hava sika kei na ti ni u zei mi ei siatna dora le an ero andual inti, tenchu Ratha Anthiang an ero chu andual no ni. 32Hatuka Miring Sapa ranga chong aril tak ama andualna man inti, tenchu Ratha Anthiang aduia chong aril chu andualna man no ni atun hunam nukhona hunam. #Lk 12.10
Thing le Amara
(Lk 6.43-45)
33“Thingkung na mansa ten, a maram hong sa inti, hatuka thingkung na mansa nok ten, a maram hong sa thei no ni. Asik chu amara lehan akung na riat thei. #Mt 7.20; Lk 6.44 34O marul khuk ngai, asiat nei ni u na hontinmo chong asa nei ril thei u. Asik chu malunga anthok tak ha murin ei hong ril. #Mt 3.7; 23.33; 15.18; Lk 3.7; 6.45 35Mi san asa mun ata neinun asa a masuak hanuk mi asiatin asiat mun ata neinun asiat a masuak.
36“Hatuka kei na ti ni u zei mi ngai achong ril u ngai dora ruiril nikhua na alan dar zit rang keng. 37Asik chu, na chong le asa nei anlo hatuka na chong le den asia nei anlo rang.”
Andangna Zong u
(Mk 8.11-12; Lk 11.29-32)
38Hava han Lekhanziak ngai le Pharisi hozetinmo, “Minchupu koinin nang na kom andangna khat na mu zot,” ati u na. #Mt 16.1; Mk 8.11; Lk 11.16
39Aman a masanga hangai kom ati pe, “Atun taka mi salui le uiare ngai andangna arok u, tenchu Jona dearin andangna baka chu atei andangna hiva ngai hi anpe thei no ni. #Mt 16.4; Mk 8.12 40Asik chu hontinmo sun anthum zan anthum nga lian vona ei om hava anga Miring Sapam sun zan nin thum phil sunga om inti. #Jon 1.17 41Ninevi mi ngaiin ruirila atun taka mi le andinga hi ngai masiat unti, asik chu Jona chong rila a malung a makhir u. Hatuka enro, Jona neka alian mikhat hivan a om. #Jon 3.5 42Sim rama rengnu ruirila atun taka mi ngai le andinga hiva ngai asia manlo inti, asik chu Solomon ei hiana chong ariat rang ramual mongna ata ei hong hatuka enro, Solomon aneka alian mi khat hivan a om. #1 Rng 10.1-10; 2 Kr 9.1-12
Ratha Sia Kirna
(Lk 11.24-26)
43“Hatuka ratha siat mi sung ata asuak lehan ti buina muntina acheia pongansana a en tenchu man mak. 44Hanke aman, ‘Kei suakna in dena kir ret ka ti,’ ati hanke a honga hava ha akorong anthiang ahui ava mu. 45Hanke ase na alom ratha siat atei sari abila ahong tuanga hava han alut u na a om u hava han ha mi aphuta rahu neka nukhona ana uala, haneka asiat atun taka mi salui ngai chunga hava ha chuk inti.”
Isua Nu le Aparual ngai
(Mk 3.31-35; Lk 8.19-21)
46Aman mi ngai hiva chong ngai aril lai tak enro, a nu le a parual ngaiin achongpui ranga tual panga anding u. 47Hanke mi khatin, “Enta, na nu le na parual ngai nang ana chongpui ranga tual panga anding u,” ati na.
48Tenchu hiva chong ei riat le a masang lena, “Ka nu tumo ka parual hova mo?” ati. 49A zolai ngai tiang a kut a sona, “Soso enro, ka nu le ka parual ngai. 50Asik chu ka Pa vana mi ei zot amang tak ha hava ha ka nu, ka parual, ka sarzuar.” ati.
Currently Selected:
MATHAIIN 12: RANGBSI
Označeno
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.