Pi zi tiki 6
6
Yem n'a biti yai
Alaw a rga warni buri a vidiɗi ɗai edi
1Won hlai na ɗai e tiki piɗi aŋ sisiɗi viya midini afti, e wii ali na falakai lai ɗa, 2alini Alaw na e tiliɗi aliɗi ɗai e ɗa arɗi jafai gara, e miliɗi nagai n'e diriɗi arbaɗi par aŋ falakai. 3EPIƊ-ƊAI a muɗa: Suŋfa na mu siŋni warni ɗif ɗa aga a hina warni ɵa gamai kai, buri ɓa ni a neŋ-si kadai. Mefeŋ ktai aga a mra, wuzamu sek ɗa buzani aga a ɗiya miya gaini caaɓa ta.
4War mefeŋ ni ɗa, ɗai na mogo kai e ɗi ka midini afti, e ɗi fu yaw hlai n'alini Alaw e hilisi e fini gaiɗi aliɗi ɗai, haa e wii ali gaiɗi, pinzibaɗi e ɗi gaŋgalaŋai na war mefeŋ n'avut, ɗai na yikiɗi a wa gara.
5EPIƊ-ƊAI, a tala meefeŋ na wiini ɗif a riya amai midini afti ta, mefeŋ paŋ agulni te yiva aŋ ɵima miɗini wazagai na maafanai ɵa. 6Agulni EPIƊ-ƊAI te lumaŋ, a ɵa hama sini lai buri a rga ɗif midiɗi yai. 7EPIƊ-ƊAI a muɗa: Aga mu vidiɗi ɗai na mu rgiɗi midiɗi yai ɗa edi, aga mu vidiɗi ɗai gaini farai, gaini wazagai n'agogoi, gaini wazagai zi ɗufli n'arbani hlai n'amai buri agula te lumaŋa buri mu rgiɗi. 8Amma Nowa a nava yum arni EPIƊ-ƊAI.
9Pinzibani Nowa a na maini nɵa,
Nowa, ɗif na jre ɗikat arbaɗi pinziba n'e ɗi ka war mefeŋ na wiini, a ɵina mini Alaw. 10A wa ali hu: Sem, Kam, Yafet. 11Afti paŋ a hofa wuzani arni Alaw, hlai paŋ a va gaini karai. 12Alaw a tilitisi yai ɗa, t'aŋ gaini hûfi ta, buri ɗai paŋ e bi payaiɗi na ɗikat edi azumai midiɗi yai. 13Alaw a miɗini wiini Nowa: Buriya Ta, dibini wazagai paŋ a cosi li, buri ɓa afti a va gaini karai na tiɗi ɗai ta, mu dara mu vidiɗi edi gaini afti paŋ. 14Ku zizina hulum n'abai buriku gaini luwuŋ gofer ta, aga ku zizina arni hlai kiini kiini viya, aga ku ɵirɓa warni n'amlai gaini duɓani paŋ gaini gudroŋ. 15Hulum hanɗa, ku za mogoni kil miya hu, brukni kil doogo doogo ɵim, wûlini n'amai sek kil doogo doogo hu lai. 16Aga ku zizina wala miɗini hulum hanɗa, ku za baŋa arbani gaini midini hulum kil ɗaw, arbani amai mogo a suwa agwi, ku ɵa mini hulum ɗa edi kokoni, asakal, par ku za poriyo amlai war ni arni hu. Poriyo n'avut, n'ag'aŋ sulu, n'ag'aŋ hu lai. 17Ta aga mu kasi yem n'abai midini afti aŋ tuura wazagai zi rgi na karni gaini n'a suŋfa paŋ n'a na azumai midiɗi yai. Wazagai n'aŋ midini afti paŋ suŋfani aga a wa edi. 18Aga mu za bonuŋa gaiku tuku, ku niya warni hulum tuku gaiɗi aliku, gaiɗi muniku, gaiɗi falakaiɗi aliku lai. 19Arbani wazagai na karni paŋ, arbani wazagai par paŋ, ku mula warni hulum gaiku sulu sulu, muni gaini wus, muni gaini wus, kapai a hina karni. 20Arbani pinzibani wazagai zi ɗufli par, arbani pinzibani farai, arbani pinzibani wazagai zi hidili par, sulu arbani hanɗa aga a ruvasi suku kapai a kurɗa. 21Tuku aga ku mula wazagai zi simi amlai puku viya, aga a hina aŋ simi na wiiku gaini na wiiɗi lai. 22Nowa a za maini nɵa, a zaŋ kal kal maini n'Alaw a gdaŋ miɗini nɵa lai.
Currently Selected:
Pi zi tiki 6: MUSGUM
Označeno
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964