Pi zi tiki 49
49
Yakob a ɓikiɗi alini na doogo pi sulu
1Yakob a yikiɗi alini na doogo pi sulu a miɗiɗi: Tipi kapai mu miɗiki wala n'aga a za siki dawai sek ɗa.
2Tipisi, ɵiɓiri alini Yakob,
ziɓiri wala na Izrayel n'epiki a dara a miɗiŋki.
3Ruben, tuku k'ahiya n'abai,
ku gdaŋ na wiya, ku na mu wuku war gawlaŋa, kadai tiɓ
ku sûwiɗi tawalakaiku gaini hormo gaini spak lai.
4Spakku maini yem n'a ka gdaŋ nɵa,
amma aga ku hina aŋ abai wuzaɗi tawalakaiku kir kai.
Buri ɓa ku fana gaiɗi muniya ktai miɗini walaŋa zi feŋ,
ku bunda hlaiŋa zi feŋ ɗa hihir.
5Simeyon gaini Levi e ɗi tawalakai,
kitini-mi na wiiɗi a na buri a tuura wala,
6Mu dara mu tapa gaiɗi war kitini seŋ na wiiɗi kai,
mu dara mu firiya war tipi na wiiɗi kai
buri war hiy na wiiɗi e fiɗiɗi ɗai edi,
war hiini na degai e ɗûkûli sirdai n'ezini garakai.
7Tuusa aŋ miɗini hiy na wiiɗi na gdaŋ gara,
gaini suwar zi vilimi na wiiɗi!
Aga mu ɓûrwiɗi edi siɗi marɗi midini afti na wiini Yakob,
aga mu ɵiriɗi edi arbaɗi Izrayel.
8Yuda, tawalakaiku aga e kuluku,
gawku aga e rûvi wuzaku,
alini apuku aga e hûrgû azumai wuzaku.
9Yuda! ahiya, tuku k'ahini gurnai,
n'a fuɗasi wala li a wayasi,
a hurga azumai, a fana waŋ maini gurnai nɵa.
Maiɗi gurnai na muni nɵa, n'aga a burgaŋ ɗa asiya?
10Amaraŋai zi pai aga te tika edi war Yuda par kai,
amaraŋai na wiiɗi abai edi war pinzibani par kaalai,
haa Ni n'a epingezaɗi amaraŋai a cosi,
na pinzibaɗi ɗai aga e ɵini pini.
11Ni n'a naga ablehöni war vowai zi luwuŋ zi vin,
ahini Ablehöni sini luwuŋ zi vin,
a ma sapani arni vin, gumazini arni siyemni ali luwuŋ zi vin lai.
12Arni aga a cora tini vin,
sesiyeŋni a bunda muɗokokai tini fiyaw lai.
13Zabulon, hlaini zi simni aga a za agoɗom wulani yem-ra n'abai,
hulomai n'abakai zi cakala aga a yima amai ahani,
arni hagani a na haa amai Sidon ta.
14Isakar a ablehö na kiriyim
n'a na amlai warni Berɵem na ɵagani sulu.
15A tala ɓa hlai n'a sumna woni a pɗem,
afti ɗa pɗem lai,
a zizina duɓani ɗa aŋ luba jak,
a hina sini war sda zi bege.
16Dan aga a ziti sariya wiini pinzibaɗi ɗaini,
maini ktai n'arbaɗi pinziba na war Izrayel nɵa.
17Dan aga a bunda aŋ wala meefeŋ warɗi futi, aŋ makai na warɗi futi na lölö,
n'a luma ezini plasai,
ɗif na duɓani a kɵa gaini daŋdaŋaini.
18EPIƊ-ƊAI! mu baiya kûri na wiiku war ɵeɗ.
19Gad, gorɓolokai aga e sikiŋ aha,
aga a faka amai siɗi, a ɵiriɗi edi.
20Simi na pɗamai aga a halasi midini aftini Aser par,
aga a sa wazagai na pɗamai buri simini pai.
21Neftali a Widre na gaini pli su, na te wa ali na jaafai.
22Yosef a tini luwuŋ n'a goɗa gara,
a tini luwuŋ na ɵimani yem zi ki,
na tini a wa haa amai midini ɵaga.
23Ɗai zi ɵiɓi ɓaraw e piyini mini,
e ɵiɓiŋ gaini ɓaraw, e bili gaw sini.
24Amma ɓaraw na wiini a yimaŋ tini gdaŋ,
a kiɗa a muguza graŋni gaini tini gaini hûwyi kai,
war gdaŋni Alaw zi spak paŋ na wiini Yakob,
war yikini ɗif zi giɗimi, fukuni na wiini Izrayel,
25war yikini Alaw na wiini apuku, a za aŋ zinai na wiiku,
war yikini Alaw zi spak paŋ, a ɓukuku!
A ɓukuku gaini ɓiki n'amai won hlai n'amai par,
A ɓukuku gaini ɓiki n'azumai war huduk n'azumai pin afti par,
A ɓikiɗi falakaiku gaini faraiku lai.
26Ɓiki na wiini apuku n'a suwa huwaŋai na gamai par,
n'a suwa hagani boŋorai na marai lai,
Ɓiki hanɗa a halasi miɗini Yosef.
Midini ni na gai viri edi n'arbaɗi tawalakaini.
27Benyamin a belemke na ɓasa neŋni;
gorof par a luma walani n'a yimaŋ,
Koskoi a ɓurwa walani n'a navaŋ ɗa.
Mri na wiini Yakob
28Hanɗa e ɗi pinziba na doogo pi sulu na wiiɗi Izrayel. Hanɗa a wala n'epini a miɗiŋɗi won hlai n'a na ɓikiɗi, aŋ sa sini asiya asiya paŋ ɓiki na wiini wiini.
29Asakal par a siɗi gadaini a miɗiɗi: Mu ŋa ta aŋ hala gaiɗi ɗaiŋa, ki piŋa ɵimaɗi tamaiya, warni wovai na sin huwuŋ, war vowai na wiini Efron, na Hitite, 30war waŋ na siɗi huwuŋ na Makpela, wuzaɗi Mamre, midini afti na Kanaan, vowai n'Abraham a wuraŋ tini Efron na Hitite, aŋ zaŋ aŋ hlai na wiini zi pi ɗai. 31Abraham gaiɗi munini na Sara e piɗi woni. E pi Isaak gaiɗi Rebekka na munini woni, mu piti Lea woni lai. 32Vowai gaini waŋ na siɗi huwuŋ n'aŋ woni paŋ, e wûriŋ tiɗi alini Hek par. 33Won hlai na Yakob a vada gaini gadai n'a siŋɗi wiiɗi alini, a mula ezini amai midini liyni, suŋfani a wa edi, e tipiŋ gaiɗi tamaini n'e mri ɗa.
Currently Selected:
Pi zi tiki 49: MUSGUM
Označeno
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964