Pi zi tiki 27
27
Yakob a tika ɓiki n'a za burini Ezaw
1Isaak a za wel kroh kroh, arni a bunda huruf, a kiɗa aŋ tala kir kai. A yika ezaw ahini n'abai a miɗini: “Ahiya” Ezaw a waya seŋ: “M'an na” 2Isaak a muɗa: Ku talaŋa na ɗa mu za wel gara ta. Mu sɗa mefeŋa zi mri ɗa kai. 3Hlai a cosi ya. Tiyana mula wazagaiku zi ɵar: Taŋku gaini ɓarawku, lawa edi basga, payaŋasi neŋni salak ta. 4Ku daŋa simi na pɗem maini na mu daraŋ ɵa ɗa, ku kaŋasi; mu suma ta kapai ta dama mu ɓukuku wuzani mriŋa.
5Rebekka te ɵina seŋ hanɗa won hlai na Isaak a na miɗini wiini Ezaw n'ahini. Ezaw a hala edi basga aŋ ɵar kapai a kasi neŋni salak ɗa. 6Rebeka te miɗini wiini Yakob n'ahiɗi, tala mu ɵina seŋ ktai n'apuku a miɗiŋni wiini tawalku Ezaw, a miɗini ɓa: 7“Payaŋasi neŋni salak ta, ku daŋasi simi na pɗem kapai mu suma ta. Asakal par aga mu ɓukuku wuzani arni EPIƊ-ƊAI, wuzani mriŋa ta”. 8Tiyana ɗa ahiya, ɵina seŋ na mu muɗuŋku na ɗa, za wala na mu muɗuku miɗini lai, 9hala arbani fara ɗa, ku yimasi alini afkasai na pɗamai sulu, aga mu dini simi na pɗem wiini apuku maini n'a daraŋ nɵa, 10ku kiŋni wiini apuku a suma ta kapai a ɓukuku wuzani mrini.
11Yakob a wiyiɗi seŋ wiiɗi Rebekka n'emini: A siɗa aŋ za; amma Ezaw tawala a ɗif n'ayir sini, amma ta ayir sa kai koo! 12Apa a kiɗa a titimaŋa, a yimaŋa lai ɓa, mu duulaŋ na ɗa a dûûli, aga mu kasi mada a ɓiki kir kai, amma a tusa.
13Emini te miɗini: Ahiya, tusa na muduku a pɵasi mada, koo a za gir maɵa ɗi, ɵina seŋŋa na mu muɗuŋku haw le! Hala kaŋasi wala na mu muɗuku gaini ɗa. 14A hala, a yimasi alini afkasai, a wayasi siɗi emini. Te da simi na pɗem maini na epini a firyaŋ ɗa nɵa. 15Asakal par, Rebekka te mula sapa na wiini Ezaw ahiɗi n'abai, na wûrini abai n'a na aha tiɗi, te wiŋni sini Yakob ahiɗi n'agwi ɗa ca.
16Te faɗa amurni afkasai wulani tini tika tika, sin wulani na gilɓu su lai. 17Te sini simi na pɗem na te daŋ gaini peŋ na te zaŋ ɗa lai war tini Yakob n'ahini.
18A niya amlai ahani epini a muɗa: Apa. Epini a waya seŋ “m'an na ahiya”, ku siya ɗa? 19Yakob a miɗini wiini epini: Mu ta Ezaw, ahiku n'abai, mu zasi wala na ku muɗaŋa miɗini ya, fakasi amai, sumna amai dam, suma neŋni salak na mu piyuŋkusi kapai tuku gaini muduku dama ku ɓakaŋa. 20Isaak a wiyini seŋ wiini ahini: Ahiya, girna ku wayasi witaw tar koo! Ahini a miɗini: Buri ɓa EPIƊ-ƊAI Alaw na wiiku a kaŋasi wuza. 21Nɵa Isaak a miɗini wiini Yakob: Torasi sa gobi ahiya, mu titimuku haw. Ku tuku Ezaw n'ahiya tiɓ ɗi? 22Yakob a torasi gobi sini Isaak n'epini. Isaak a titimaŋ a muɗa: Wule zi miɗi ɗa a na wiini Yakob, amma tiy a wiini Ezaw. 23A siɗaŋ kai, buri tini a na fu gaini ayir maini na wiini tawalni na Ezaw ɗa nɵa, a ɓakaŋ.
24A zilbaŋ: Ku tuku ahiya Ezaw tiɓ? A waya seŋ: Mu ta 25A muɗa: Ahiya, saŋasi simi mu suma neŋni salak ta, kapai mu ɓukuku. Yakob a sini simi a suma, a kinisi vin a ca lai. 26Nɵa Isaak n'epini a miɗini: Ahiya, torasi sa gobi, goɓasi, sisiɓa ma lai. 27A torasi sini gobi a goboŋ, a sisiɓa mini lai. Isaak a luguza lugos na wiini sapani, a ɓakaŋ a muɗa: Kai! Lugosni ahiya a na maini lugosni vowai n'EPIƊ-ƊAI a ɓakaŋ nɵa. 28EPIƊ-ƊAI a hinasi maɗai n'amai par muduku, a suku afti z'alam lai, a suku algama gaini vin na hehe viya. 29Ɗai e bindi aŋ bagakaiku,
pinzibaɗi ɗai e hûrgû azumai wuzaku.
Ku ŋa midiɗi tawalakaiku paŋ
aliɗi amuku paŋ e hûrgû azumai wuzaku
Ni n'a tuusuku, tuusa aŋ miɗini
Ni n'a ɓukuku, ɓiki aŋ miɗini lai.
30Won hlai na Isaak a vada gaini ɓiki na wiini Yakob li, hlai na Yakob a fakaɗi sini Isaak n'epini par li, Ezaw na tawalni a cosi edi aŋ ɵar par lai. 31Ni lai a da simi na pɗem a kiŋni wiini epini, a miɗini: Apa, faka amai, suma neŋni salak na ta n'ahiku mu piyuŋkusi ɗa, kapai asakal par ku ɓakaŋa ta lai. 32Isaak n'epini a zilbaŋ: Tuku ku siya ɗa? A miɗini: Mu ta Ezaw, n'ahiku n'abai. 33Isaak a turla amai marwai, a tika pini a ziriya gdaŋ gara a muɗa: N'a hala edi aŋ ɵar n'a kaŋasi neŋni salak lai ɗa asiya ɗa? N'a saŋa simi na kiini kiini maa wuzani hlai na ku niyasi amlai na sek ɗa asiya ɗa? Mu ɓakaŋ ta ya, ɓiki aga a sumna miɗini lai.
34Won hlai na Ezaw a ɵina seŋ na wiini epini, a ɗuula ɗuwal zi marava n'abai a miɗini wiini epini: Hai apa, ɓakaŋa ta ta lai. 35Epini a waya seŋ: “Tawalku a halasi gaini yel a tika ɓiki na wiiku ɗaw. 36Ezaw a muɗa: “Buri ɓa e yikiŋ Yakob ɗa zaw”! Azi sulu paŋ a tika balamŋa ɵa ɗawwa ɗawwa ɗa! A tikiti abaiŋa zi wii ɗaw, tiyana a na pra, a tika ɓiki na wiya pra ɗa! Ku hinaŋa ka ɓiki zamai wiya kai ɗi? 37Isaak a tika seŋ a miɗini wiini Ezaw: “Tala, mu zaŋ aŋ abaiku ta, mu siɗini tawalakaini paŋ aŋ bagakaini, mu sini algama gaini vin na hehe viya, n'aga mu za buriku zamai ɗa a ma kiɗi ɗa ahiya 38Ezaw a wiyini seŋ wiini epini: Apa, ɓiki ɗ'aŋ tuku ktai bas ɗi? Ɓakaŋa ta ta lai! Ezaw a tuwa gara. 39Nɵa Isaak a tika seŋ a muɗa:
Tala hlaiku zi simni aga a za edi edi gaigai sini afti z'alam par,
maɗai n'a halasi war hlai n'amai par aga a wa miɗini kai.
40Aga ku sumna karku pin kaɵkarku,
amma aga ku za aŋ begeni tawalku,
war jûgûku na blaŋ blaŋ
aga ku haɗa gaalaŋ na wiini n'aŋ wulaku edi.
Hili n'edi na wiini Yakob
41Ezaw a yima Yakob maini gawni nɵa buri ɓiki n'a navaŋ tini epini par. A rgaŋ warni ɓa: “Mri na wiini apa a ŋasi gobi, aga mu fuɗa Yakob na tawala edi”. 42Won hlai na Rebekka te sɗa hinini Ezaw ahiɗi n'abai ɗa ba ɗa, te yika Yakob ahiɗi n'agwi te miɗini: Tala Ezaw na tawalku a dara a fuɗuku edi aŋ vurga na ku ziŋni ɗa. 43Tiyana ahiya, ɵina seŋ na mu muɗuŋku ɗa, faka amai, lawa ahani tawala Laban war Haran. 44Aga ku sumnasi gaini mefeŋ yaw, haa hiy na wiini tawalku a tika azumai. 45Won hlai na hiy na wiini tawalku a tikali edi muduku par, na ɓa miɗini a wula li gaini wala na ku ziŋni lai ɗa, aga mu ɵinaɗi puku aŋ yimukusu edi won par. Aga mu biki tiki aliya na sulu paŋ edi war mefeŋ ktai buri ma ɗa? 46Rebekka te miɗini wiini Isaak, simni na kara, a baza ara ta, buriɗi alini Hek na falakai hanɗa. Na ɓa Yakob a tikiti te ktai arbaɗi alini afti hanɗa pra ɗa, pɗemni simni na kara tiɓ ɗa aŋ wata ɗa?
Currently Selected:
Pi zi tiki 27: MUSGUM
Označeno
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964