Pi zi tiki 22
22
Abraham a za ɓaka gaini Isaak
1Paŋktai, asakal wazagai hanɗa par, Alaw a titima yimi na wiini Abraham a miɗini: Abraham! Abraham a wiyini seŋ: “Mu na” 2Alaw a waya a miɗini: “Yima ahiku na ktai, Isaak na ku daraŋ gara ɗa. Hala midini afti na Moriya, woni ku zaŋa ɓaka zi yi gaini, midiɗi huwuŋi n'aga mu suknutuku”. 3Abraham a faka amai gorof, a rga wazagaini amai duɓani ablehoini, a mula gawlakai zi sda gaini sulu, a yima Isaak n'ahini pini; a ɓasa luwuŋ na wiini ɓaka zi yi lai, a hala war hlai n'Alaw a siŋkiŋni. 4War mefeŋ n'ag'aŋ hu, Abraham a yima arni amai, a tala hlai hanɗa edi gaigai par. 5Abraham a miɗiɗi wiiɗi gawlakai na pini: Simni ka won na ca gaini ablehoi ɗa. Ta gaini ahiya mi hili amai na ta aŋ hûrgû azumai wuzani Alaw, aga mi wiyisi siki. 6Abraham a tika luwuŋ zi yi na wiini ɓaka zi yi, a tikiŋni miɗini Isaak n'ahini ta, a tika afu gaiɗi muguɗi tini, gai suliɗi e hili piɗi marɗi. 7Isaak a miɗini wiini Abraham n'epini ɓa: “Apa”, Abraham a wiyini seŋ ɓa: Ahiya mu na ɵina” Isaak a miɗini: Afu gaini luwuŋ zi yi aŋ tumu, ahiɗi adumi na buri ɓaka zi yi ɗa aŋ wata ɗa? 8Abraham a wiyini seŋ ɓa: Ahiya, Alaw gai miɗini dama aga a sumu ahiɗi adumi zi ɓaka zi yi ɗa. Gai suliɗi e hili wuzaɗi piɗi marɗi.
9Won hlai n'e gi won hlai n'Alaw a siŋkiŋni ɗa, Abraham a rga gûwiŋ zi yi ɓaka woni, a zizina luwuŋ zi yi azumai pini ta ta. A naga tini Isaak n'ahini gaini ezini lai, a fanaŋ amai midini gûwiŋ zi yi ɓaka ɗa, amai par miɗini luwuŋ waŋ. 10Abraham a wa tini, a tikitisi muguɗi, kapai a ɵa wulani ahini. 11Nɵa, ɵeŋ na wiini EPIƊ-ƊAI a yikaŋsi amai par: “Abraham, Abraham”, Abraham a waya seŋ a muɗa: “Mu na ɵina” 12Ɗif zi ɵeŋ a miɗini: “Ku tika tuku sini arwagwi kai, ku za wala ktai sini kai, buri tiyana mu sɗa ɓa ku huna Alaw, ku bula edi aŋ saŋa ahiku na ketekeɗik kaalai”. 13Abraham a yima arni amai, a ɵa arni, a tala adime duɓani par, arbani kukuɓ, miyokni gai ɵûwi ɵew, a hala a yimaŋsi, a za ɓaka zi yi gaini war balamni ahini. 14Abraham a sini yiki wiini hlai hanɗa ɓa “EPIƊ-ƊAI a sɗa” haa girna ɗai e hini e miɗi ɓa “Amai midiɗi huwuŋ na wiini EPIƊ-ƊAI ɗa, ɗai aga e siɗi EPIƊ-ƊAI. 15Ɵeŋ na wiini EPIƊ-ƊAI a yikasi Abraham amai par, azi n'ag'aŋ sulu pra 16a miɗini: “Mu huku ma gaini sa dama, a miɗi na sini EPIƊ-ƊAI par, buri ku za wala na mu muɗuku miɗini, ku bula edi sa gaini ahiku na ketekeɗik kai ɗa, 17aga mu ɓukuku, aga mu bunda pinzibaku kal kal maini meeɵek n'arbani hlai n'amai gaini kai kai n'agoɗom war yem-ra n'abai nɵa. Pinzibaku aga e mili fuŋ n'abakai na wiiɗi gawɗi. 18Pinzibaɗi ɗai na midiɗi yai paŋ aga e nivi ɓiki buriɗi, buri ɓa tuku ku ɵina ma”.
19Abraham a wayasi siɗi gawlakai, e fiki e hili piɗi marɗi a Beer-seba. Abraham a za fuŋ woni.
Dibi na wiini Abraham, wii na wiiɗi Rebekka
20Amma asakal wazagai n'aza hanɗa par, e kinisi labar wiini Abraham ɓa Milka kaw te wiini ali na maɵagai wiini Nakor na tawalni ca. 21Ahini n'avut yikini ɓa: Us, gaini Buz na tawalni gaini Kedmuwel n'epini Aram, 22Kesed, Hazo, Pildas, Yidlaf gaini Betuwel. 23Betuwel a wuti Rebekka lai. Hanɗa e ɗi ali na mitwis, na Milka te wiiɗini wiini Nakor na tawalni Abraham ɗa. 24Marmaini na yikiɗi ɓa Rewuma te wa ali lai. Yikiɗi maini nɵa: Teba, Gaham gaini Maaka.
Currently Selected:
Pi zi tiki 22: MUSGUM
Označeno
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964