Matyu 20
20
Wain abi san urat tamol adi
1“Anut san kagin panek man igo ya. Salso idug abi san muroun imasag didaeŋ aben lo yaug urat tamol aenta ibiaip iŋanen wain abi ilon lo urat digane san. 2Iŋ urat tamol an dida urat naon dugo ipidinai an niŋen o dukubiai se ya. Agog adian kiskisaek atem kina kiskisaek ipidinai o ago ibol a. Agog urat tamol an duloŋ go ŋiŋeŋ an awok dupanig idinaig iŋanen abi lo diau a.
3“Tidom lom, afon imasag didaeŋ aben ante yaug ilasag, tamol ta kawan dutur dugo yil a. 4Ago dugo irupidaig ibol, ‘Aŋ dam ŋaisag wain abi lo aup urat agane. Ago dop murnap aŋanem urat naon dugo itaot atem ŋupanaŋ a.’ Ago tag diau a. 5Iŋ afon, adian lo agod guraian lo mi, nek ago igane ya. 6Guraian mok, auwa kisaek imug mi ad idiau an lo, afon imasag yaug tamol taidam urat ad tia kawan dutur dugo yil a. Agog tamol an irupidaig ibol, ‘Aŋ ata wo ad milaen kawan atur amado dugo urat ta agane na dak i?’ 7Iŋ abi muroun ru naon durupeig dubol, ‘Tamol ta maŋ ibiama man tia ya.’ Ago tag irupidai, ‘Aŋ dam gamu ŋaineg wain abi lo au a.’
8“Aria, saen ad idiau dugo abi muroun iŋsan urat gurman irupeig ibol, ‘Urat tamol giai dop sad urat naon anen anen atem udad a. Tamol a murna geig ŋaŋal an ate fun ganep, ipalup, yaup, imug ak ate itout a.’ 9Saen urat tamol a murna geig ibiai an dupalu man, anen anen atem kina kiskisaek urat san gurman ipidinai a. 10An niŋen o saen urat tamol a imug mi ibiai an dupalu man, iŋ moni subuŋan taidam diŋane wak ago ilo sou digane se ya, ak man iŋ dam nek kina kiskisaek mi diŋane ya. 11Iŋaned kina diŋane gug, abi muroun niŋen o fun diganeg duŋurŋur se ya. 12Iŋ dubol, ‘Tamol e murna geig biai an auwa kisaek o lian urat digane ya, ak man oŋ ago gane yan lo maŋ iŋ dida sisem mi milasa ya. Gug maŋ urat san muruan ad milaen maŋ mi misini se ya.’
13“Ak man abi muroun tamol ta luluŋad lo imado yan irupeig ibol, ‘Turag, ŋai oŋ ta ŋiginio saian na da. Dugo, oŋ kina kisaek o lian lo urat gane wo awok ta ubol na yak i? 14Oŋane urat naon ŋanep wau. Tamol a murna geig ŋaŋal an, urat naon a ŋupano yan, nek ago mi iŋ dam ŋupidinai o ilog yen a. 15En dugo, ŋai siganeg moni lo dugo ŋigane wo dan, ago ka ta ŋigane na wak i? Tia, ŋai siganeg mel ŋuwae dan niŋen o mala isi dak i?’
16“Nek ago mi, talpein murna yan mitep imug dop, imug an murna wa.”
Jesus afon iŋanen mateŋ sumeik ilasa dan niŋen o ibol a
Mak 10:32-34; Luk 18:31-34
17Jesus iŋ Jerusalem na yau se ya, saen an lo iŋanen megeloum 12 an iŋal go dida gigin na diaug, irupidaig ago ibol, 18“Aloŋ uyan a, id Jerusalem na tau da. Ante man Tamol Nanun diŋanep pris gurman agod kubiaeŋ san girek maŋau banid lo digane wa. Iŋ malak malak bitinaek lo digane gup imat a. 19Ago dop Juda tia yak banid lo diganep lo kukok aman digane gup, rasau nam dufuni nap, aigim fo dubali wa. Ago digane wak man, nal utol itout gup, Anut ifufunip afon kumaen imasa da wa.”
Jems iŋ Jon da sad tinad san sumiaeŋ
Mak 10:35-45
20Agog Sebedi san nanun uraru amaiak tinadi da, Jesus naon na dupalu ya. Agog tinadi turun isaluwig mel ta ipani san niŋen o Jesus isumiani a. 21Jesus pein an isumiani, “Ata mel niŋen o ilo ibol dak i?” Agog pein an naon irupei, “Ru ubol an lo ŋai nanug muroug e dumado den, murnap uŋal pe oŋane kagin panek aben lo, oŋane badim fo siŋire na dumasip dumado wa. Neinta bani won ak lo dop, neinta ŋas ak lo gane wa.”
22Agog Jesus, Jems iŋ Jon da irupidaig ibol, “Mel dugo mok niŋen o asumianag dan ta aloŋ uyan na ya. Ak dugo, gab a ŋai lo ŋaluk san an, aŋ dam lo aluk anen idaisuda yak i?” Agog iŋ ru naon durupeig dubol, “Awo, maŋ idaisuda ya.” 23Jesus irupidai, “Rumok, aŋ ŋaineg gab an lo aluk a. Ak man siŋireg na amasip amado, ta banig won ak lo, ta banig ŋas ak lo, aben a yaŋan anda amaiak ŋai ŋupanaŋ san ta idaisuda na ya. Tia, ŋaineg Tamag iŋsen mi tamol ta aben an ipidinai san ipilianai la ya, amaiak niŋen o aben uraru an iŋaned mi a.”
24Saen iŋanen megeloum 10 dumado yan ago duloŋ man, tamol uraru an niŋedi wo tiŋaed saian geig a. 25Ak man Jesus igiaig san na dupalug igo irupidai, “Aŋ aloŋ ak, gob adi luluŋad lo iŋaned gurman sed idiraip lak na mok disuda dop tamolpein ditirnai o digane wa. Agod iŋaned tutubu yan tamolpein kawan ak didiraip tuod paed na dumado wa. 26Ak gug aŋ luluŋam lo kagin ago yak ta mok ilasa na wa. Tia, talpein ta aŋ luluŋam lo yaŋak tubun ak iŋane wo ilon ibol tap, sen iganep aŋanem biabi ŋilaŋal oŋ ilasa wa. 27Agod talpein ta aŋ luluŋam lo imug yau san ago ilon ibol tap, sen igane idup aŋ fidian mi wagem lo bigabeg igo woŋ ilasa wa. 28Nek ibol Tamol Nanun iŋsen igo woŋ, tamolpein aenta binawek urat dupani wo ta ipalu na ya, tia, aenta niŋedi wo binawek urat igane wo ipalu ya. Agod sen tinin fidian ibiseip an lo tamolpein wei mi siganen dar lo idad pe iŋal imul o dam ipalu ya.”
Jesus tamol uraru malad itau an ikubuniai a
Mak 10:46-52; Luk 18:35-43
29Saen Jesus iŋanen megeloum dida Jeriko dibisei man, tamolpein malan tubun ak ŋien aban diri a. 30Ante man tamol uraru maladi itau ak dal gigin na dumasig dumado ya. Saen Jesus iriŋanai o igane dugo duloŋ man diwagiŋ, “O Tubun ak, Dawid Nanun, ilo imuŋanama!” 31Agog tamolpein an dububuŋanaig durupidai, “Awam itaup atokabol pe amado!” Ago tag tamol uraru an nen maeg nam duwagiŋ dugo disasai, “O Tubun ak, Dawid Nanun, ilo imuŋanama!” 32Jesus awad ago iloŋ man, ipartuanig igiaig irupidai, “Dugo ŋidiraŋ o ilom ibol di?” 33Agog iŋ durupeig dubol, “O Tubun ak, maŋ abaŋ mile wo iloma ibol da.” 34Agog Jesus tubun mok ilon imuŋanaig maladi isupuri dugo gamu nam uraru an abaŋ dile ya. Agog ŋien aban dirig dutor se ya.
Currently Selected:
Matyu 20: tbcNT
Označeno
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.