Mwanzo 35
35
Yankubu ajenga uralu ca kafara Beteli
1Kwa suku moja, Mwenyezimungu mwanyewe kamwambira Yankubu javi: “Tenda safari, uke ukekare Beteli, ukanijengere uralu wakocera kafara. Omi Mwenyezimungu mwanyewe nûkwisukire wakati waúkintira nyenyeyo Ezau.” 2Basi Yankubu na jamaa zake piya na wanu wawere nawo pamoja, akiwambira javi: “Wefyeni kunundu maswanamu-wo, milungu yenu ya kaya nyengine-yo, muriswafi mwalurize nguwo zenu-zo. 3Ikisa titende safari tuke Beteli, nikajenge uralu wakocera kafara ya Mwenyezimungu ânisukire paníwere na tabu, ari pamoja nomi daima mwanipita monse.” 4Basi wakimpa Yankubu, maswanamu wa kaya nyengine ware piya wawawere nawo, pamoja na birinku zawavarire mmasikiro mwawo. Iye akififira pansi, sini ya mmwale úkiwa pepi na Shekemu.
5Yankubu na wanawe wakati wawasafirire, Mola wetu kawataya wofi piya wenye kaya zawalungane nawo mpaka, aalawirire anta munu mmoja wa kunfulata Yankubu na wanu wake. 6Basi Yankubu pamoja na wanu piya wawere nawo, wakifika Luzu, au tambe Beteli, muinti ya Kanaa. 7Noparepare akijenga uralu wakocera kafara na mahala pare akita zina “Beteli-Mwenyezimungu”#35:7 “Beteli-Mwenyezimungu” mana ake “Nyumba ya Mwenyezimungu”. kwa kuwa ndi paâmwisukire Mola wetu waákintira nyenyeye. 8Debora yaya wa Rebeka akifwa nopare, akizikiwa sini ya muti wa mmwale, pepi na Beteli. Ntamana Yankubu akita mahala pare zina “Mmwale wa kiriro”.
9Sambi, bandi ya kuludi Yankubu kulawa Mezopotamiya, Mola wetu kamwisukira tena kanjanliya. 10Kamwambira javi: “Uwe zina rako Yankubu, fala awitiwa tena Yankubu, ila zina rako Iziraeli.” Kwa javyo Yankubu akitiwa Iziraeli. 11Kamwambira tena: “Omi ndi Mola Mwenyé Rehema, upongore muwe wengi. Inti ulu na kabila nyingi zilawirira nkati ya ujukulu wako, wajukuluwo wengi wakuja kuwa mafalume. 12Inti ya nîwapere Iburahima na Izaki,
núkupa uwe-po,
na ujukulu wako wa mbere,
níwapa eyi inti-yi.”
13Mwenyezimungu pesire kusowera na Yankubu, akilawa akilainika. 14Basi Yankubu, nopare mahala paasowere naye pare, akimisa riwe ra kumbu-kumbu na akimiminira kafara ya kinywaji na mafuta. 15Yankubu mahala pare akita zina ra Beteli, kwa sababu ya Mwenyezimungu wâsowere naye nopare.
Kupongoriwa ka Benjami na kufwa ka Rakeli
16Yankubu na jamaa zake piya, walawa Beteli wenderekeza safari yawo. Wari karibu kufika Efrata, Rakeli akinsalamuka malwazo a kupongola. Noparepare akipongola kwa tafauti pakulu futi. 17Mpongozi pammonire kuzidi kuwa na malwazo a kupongola are, kamwambira javi: “Usope! Kumpata-pa toto mwengine nlume!” 18Rakeli kuno akasa roho, akimpa toto ire zina ra Benoni (Mwana wa uzuni wangu). Falakini wawaye toto ire, akimwasisa, akimwita Benjami (mana ake “Mwana wa nkono-nriro”). 19Basi Rakeli akifwa akizikiwa nanyenje ya njira ya kuka Efrata, au tambe Betlehemu. 20Yankubu kaburi ra Rakeli rire akijengera ukuta, na ukuta síwo uwapo mpaka rero-vi. 21Iziraeli akenderekeza na safari yake akúka akitenga ema yake, bandi yakupunda Ukuta-Mifuwo#35:21 Ukuta-Mifuwo au Migodoli-Ederi ndi kaya iri karibu na mwango wa Ziyoni, inti ya Yerusalemu..
22Wakati Iziraeli wákikala noire inti ire, mwanawe kifundi Rubeni akimukira Biliya, muka ntoto wa wawaye, akilala naye. Fala habari zire zikinfika wawaye.
Wana wa Yankubu na kufwa ka Izaki
Basi wana wa Iziraeli wákiwa kumi na wawiri: 23Wana wawapóngore na Leya wákiwa Rubeni, mwanawe kifundi, Ansumani, Lawi, Yuda, Isakari, na Zabuloni. 24Wana wawapóngore na Rakeli wákiwa Yusufu na Benjami. 25Wana wawapóngore na Biliya njakazi wa Rakeli, wákiwa Dani na Naftali 26na wana wawapóngore nawo Zilpa njakazi wa Leya, wákiwa Gadi na Asheri. Ewa wana-wa ndi wawapóngore Yankubu pawákikalanga Mezopotamiya.
Kufwa ka Izaki
27Yankubu kalawa koka ka Izaki wawaye Mamre karibu ya Kiriyati-Arba (sambi Heboroni), mahala sipo pawákikala novyo Iburahima na Izaki. 28Izaki katika úmuri wake piya kainshi myaka miya na tamanini. 29Kasa roho kafwa na makamo meema oluvare pakulu futi, akúka akasa duniya akiwafulata jamaa zake. Wanzika wanawe Ezau pamoja na Yankubu.
Currently Selected:
Mwanzo 35: wmwBI
Označeno
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.