Mwanzo 17
17
Mola apindula zina ra Buraimu na akumpa ámuri ya itani
1Buraimu pafikire hirimu ya myaka tuswini na kenda Mola wetu akimwisusira ruhuya akimwambira akamba: “Omi ndi Nlungu Mwenyé uwezo piya. Enenda ukiniwaza Omi, uinshi bila makosa. 2Upande wangu, nítula miyadi ya kupatana Omi nowe na nízidi kwengeza ujukulu wako pakulu pawenye.” 3Noparepare Buraimu akisujudi, kuno Mwenyezimungu akisowera naye novire: 4“Kwa eyi miyadi yaniturire kupatana nawe-yi, ukuja kuwa wawa wa wanu wa inti nyingi zawenye. 5Mwanzo wa sambi-pa awitiwa tena Buraimu, ila ukwitiwa Iburahima#17:5 Iburahima mana ake “Wawa wa wanu wa inti nyingi.” konta núkutula kuwa wawa wa wanu wa inti nyingi zawenye. 6Núkupa ujukulu mwingi pakulu pawenye, kwa uwe nízusha mataifa mengi na wakuja kulawirira mafalume kati ya ujukulu wako. 7Nírimbisa miyadi yangu yakupatana Omi nowe pamoja na ujukulu wako wa tarehe zija-zo. Kupatana siko ka milele, ipate niwe Mwenyezimungu wako pamoja na ujukulu wako. 8Kanaa-yi, inti ya uri myeni sambi-pa-yi, núkupani kuwa yenu nfululu iwe mali enu uwe pamoja na ujukulu wako. Omi nikuwa Mwenyezimungu wawo.”
9Mwenyezimungu akizidi kumwambira Iburahima akamba: “Fala upande wako, daima újuzi uwe mwaminifu na miyadi yangu ya kupatana nawe pamoja na ujukulu wako wa tarehe zija-zo. 10Cíbidi eyi miyadi ya kupatana kwangu Omi na uwe piya pamoja na ujukulu wako ndi javi: Wana walume piya kati yenu wájuzi wengire itani. 11Muvinirane, ipate iwe alama ya miyadi ya kupatana Omi nowe. 12Kila toto nlume wa hirimu ya suku nane kati yenu umwe, ájuzi ataiwe itani. Mana ake, kwa kila ujukulu wako wa kila tarehe, na watwana wako wapongóriwe pakaya pako novyo na wantwana wayeni sawari wa rikolo rako, newo novyo wájuzi wataiwe itani. 13Basi novyo na watwana wapongóriwe pakaya pako na woziwe na nzuruku, piya wájuzi wataiwe itani novyo. Suna iri mmwiri mwenu ndi alama ya miyadi ya kupatana Omi nowe daima milele. 14Kamba kalawirira mwananlume satayiwe itani, alaviwe munkonjo, konta kavunja miyadi yangu.”
Mwenyezimungu arinbisa tamaa ya Iburahima
15Ikisa Mwenyezimungu kamwambira tena Iburahima kaamba: “Nkawako aumwita tena Sarai, ila úmwita Sara#17:15 Sara mana ake “mwema pakulu”. ndi zina rake. 16Nínjanliya na kweli-kwelini iye ákupongorera mwana nlume. Ikisa tena akuja kuwa mama ya wanu wengi wawenye na wakuja kulawirira mafalume wengi kati ya ujukulu wake.” 17Noparepare Iburahima akisujudi akiseka akiwaza kimoyomoyo akamba: “Epa kweli víkidirika toto kupongoriwa na nzee wa myaka miya? Sara kawa nawo myaka tuswini ámpongola mwana namunani?” 18Iburahima akimwambira Mwenyezimungu akamba: “Ona! Tenda fadili umpe baraka na umongeze mainsha Sumaila!” 19Akinjibu akamba: “Aye! Fala na nkawako Sara akupongorera mwana nlume na uwe umpe zina ra Izaki#17:19 Izaki mana ake “kuseka”., nírimbisa miyadi ya kupatana naye pamoja na ujukulu wake, miyadi ya kupatana daima milele. 20Na ikisa nísaka nukujibu novyo caunilebele kuusu Sumaila. Ona! Nínjanliya na nukumpa ujukulu mwingi wawenye. Akuja kuwa wawa wa mafalume kumi na wawiri, na ujukulu wake ukuja kulawirira taifa ulu sana. 21Fala miyadi yangu ya kupatana nírimbisa kwa sababu ya Izaki mwana waaja kukupongorera Sara mwakani kwa nowu wakati-wu.”
22Basi Mwenyezimungu pesire kusowera na Iburahima, akimwasa akúka vyake. 23Noparepare Iburahima akintaya itani mwanawe Sumaila. Na wanawalume piya wapongoriwe pakaya pake na watumisi wawózire na nzuruku wake, wataiwa suku moja noyo, kamba Mwenyezimungu vyaâmwambire. 24Iburahima ákiwa na humuri wa myaka tuswini na kenda pataiwe itani. 25Sumaila ákiwa na humuri wa myaka kumi na mitatu pataiwe itani. 26Basi, kwa suku moja noire Iburahima na mwanawe Sumaila wakipata itani, 27pamoja na wanawalume piya pakaya pa Iburahima. Watwana wapongoriwe pakaya pake na watwana wayeni wawózire na nzuruku wake, piya ware wakipata itani.
Currently Selected:
Mwanzo 17: wmwBI
Označeno
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.