SOERA MOZE I. FAZA 8.
FAZA 8.
I. Alõ nidanõ. II. Itandratandraigõ Noachi he wisa waʼalõ. III. Laheta ira baowo. IV. Soemange fangandrõ saoha gõlõ. Amaboeʼoela li Lowalangi.
1I. Ba itorõ tõdõ Lowalangi Noachi ba oetoe ndroeʼoe andrõ fefoe ba oerifõ niha fefoe, si no fao chõnia baowo. Ba ifatõrõ nangi ba goeli danõ Lowalangi, ba alõ nidanõ. 2Ba tedoehõ goemboe andrõ ba namõ, ba sandrela andrõ ba mbanoea si jaw̃a, ba tetaha deoe si oroi mbanoea si jaw̃a. (Job. 38, 37). 3Ba itoegoe alõ nidanõ ba goeli danõ, ogoʼõ, me no iroegi 150 wongi. 4Ba ba zi mewelewitoe ba mbaw̃a si fitoe, ba tosake nowo ba hili Gararata. 5Ba itoegoe alõʼalõ nidanõ, iroegi mbaw̃a si foeloe. Ba me tesaʼa ba mbaw̃a si foeloe, ba oroma zoezoe hili misa.
6II. Ba 40 wongi aefa daʼõ, ba ibokai zandrela nowo Noachi, sandrela andrõ nifazõchinia, 7ba ifoloi gaga, ba manõrõnõrõ manõ daʼõ, irege ogoʼõ nidanõ ba goeli danõ. 8Aefa daʼõ, ba ifoloi marafadi, ba wamaigi, na no ogoʼõ nidanõ ba goeli danõ. 9Ba lõ isõndra doegela, solombase ia, marafadi andrõ, ba mangawoeli ia baowo chõ Noachi, me lõ saefa na waʼanõnõ goeli danõ maʼafefoe; ba iʼoroʼõ dangania Noachi, ifoeli ihalõ baowo chõnia marafadi andrõ. 10Ba fitoe bongi tõ ifoeli ibaseʼõ, ba ifoeli ifoloi marafadi, moroi ba nowo. 11Ba mangawoeli chõnia daʼõ me tánõ owi, ba hiza ba mbawania mbadõbadõ falo, sawena ifatõ. Ba aboto ba dõdõ Noachi, wa no ogoʼõ nidanõ ba goeli danõ. 12Ba ibaseʼõ zoei, fitoe bongi tõ, ba ifoeli ifoloi marafadi, ba lõ mangawoeli chõnia daʼõ.
13III. Ba me no sara tõra 600 fache Noachi, me tesaʼa ba mbaw̃a si fõfõna, ba no ogoʼõ nidanõ ba goeli danõ. Ba ibeta zagõ nowo Noachi ba ifachõlõ ia, ba no otoefo goeli danõ. 14Ba ba zi doea woeloe a fitoe ba mbaw̃a si doea, ba aloea otoefo goeli danõ. 15Ba hoemede Lowalangi chõ Noachi, imane: 16Hetaʼõ baowo, jaʼoegõ ba foʼomooe ba onooe ba oemõnõoe, awõoe. 17Ba fefoe zaliw̃aliw̃a ba danõ, si no fao chõoe, fefoe nõsi goeli danõ, he fofo ba he oerifõ niha ba he koeõkoeõ fefoe, sanananana ba danõ, ba fao chõoe weʼamõi tooe, enaʼõ maliw̃aliw̃a ba goeli danõ ba enaʼõ moʼonoʼono ba wangojaʼõ jaʼira ba goeli danõ. 18Ba mõi tooe Noachi ba ononia ba foʼomonia ba oemõnõnia. 19Fefoe zi õfa ahe, fefoe koeõkoeõ ba fefoe wofo, fefoe zaliw̃aliw̃a ba goeli danõ, ngawangawalõ, ba aheta baowo.
20IV. Ba ifaʼanõ naha wameʼe soemange chõ Jehowa Noachi, ihalõ ngawalõ zaliw̃aliw̃a ba goeli danõ fefoe, si lõ hadia ia zi lõ sõchi, awõ ngawalõ wofo fefoe, si lõ si lõ sõchi, ba ibeʼe soemange nitoenoe, ba naha andrõ. 21Ba me iʼago hoea omasiõ andrõ Jehowa, ba imane dõdõnia: Lõ oetohoegõ wangelifi tanõ ha niha andrõ, me no si lõ sõchi geraʼera dõdõnia, iʼotarai iraono ia; ba lõ oetohoegõ wamoeboenoe fefoe zi so noso, si mane folaoegoe mege. (F. 6, 5. Jes. 54, 9). 22Sagõtõ tanõ dania, ba bõi jaʼaetoeʼaetoe wananõ ba famasi ba faʼokafoe ba faʼaoechoe zino ba baw̃a lõchõ ba baw̃a deoe ba si maʼṍchõ ba si bongi. (Jer. 33, 20).
Currently Selected:
SOERA MOZE I. FAZA 8.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.