SOERA MOZE I. FAZA 6.
FAZA 6.
I. Itoegoe lõ sõchi niha. Ifetaʼoe ira Lowalangi ihoekoe ira. II. Ono Noachi. III. Oroisa Lowalangi chõ Noachi, ba wamazõchi owo.
1I. Ba me no ibõrõtaigõ ato niha ba goeli danõ, me toemboetoemboe chõra nono alawe, 2ba laʼila ono matoea chõ Lowalangi, wa no si sõchi sibai nono alawe ba niha, ba lahalõ zomasi ira. (Mat. 24, 38). 3Ba imane Jehowa: Lõ tola saʼae Ehehagoe zamatõrõ tõdõ niha, õsi niha ira, ba waʼeloengoera andrõ; famonosogoe jaʼira na, ba ja hatṍ 120 fache. (Joh. 3, 6, Fet. I. 3, 20). 4Ba me loeo daʼõ ba so ba goeli danõ niha seboea sibai boto; ba me no oroedoe nono matoea chõ Lowalangi ba nono alawe ba niha, ba me moʼono ira chõra — ba daʼõ niha sabõlõ andrõ, seboea sibai toeria ba gõtõ fõna andrõ. 5Ba me iʼila Jehowa, wa no eboea sibai zi lõ sõchi ba niha ba goeli danõ, wa no si lõ sõchi manõ geraʼerara, awõ nichoi dõdõra, si lõ mamalõmalõ, (F. 8, 21. Mat. 15, 19. Sin. 14, 3), 6ba mangesa dõdõ Jehowa, wa no ifazõchi niha ba goeli danõ, iboesi sibai tõdõnia. 7Ba imane Jehowa: Daʼoehori ba goeli danõ niha andrõ nifazõchigoe, he niha ba he oerifõra ba he koeõkoeõ andrõ ba he fofo ba daloe mbanoea; mangesa saʼae dõdõgoe, wa no oefazõchi ira. 8Ba Noachi andrõ, ba faloecha waʼebolo dõdõ Lowalangi.
9II. Daʼe ngaʼõtõ Noʼachi: Noʼachi andrõ, ba no niha satoelõ tõdõ, si lõ sinegoe, ba gõtõnia andrõ; lõ aefaʼaefa chõnia Lowalangi ba lalania. 10Ba tõloe nono Noʼachi: Semi ba Chamo ba Jafeti. 11Ba no tekiko goeli danõ fõna Lowalangi, anõnõ danõ horõ. 12Ba iʼila Lowalangi, wa no tekiko sibai goeli danõ, noa sa tefoejoe lala nõsi goeli danõ fefoe.
13III. Ba imane Lowalangi chõ Noachi: No so ba doedoema hõrõgoe wozoe nõsi goeli danõ fefoe: noa sa anõnõ danõ horõ, nifazõchira; ba daʼoehori ira ba goeli danõ. 14Fazõchi chõoe nowo, naroeʼoe geoenia, ba õfobateʼe ba õgalõgalõni soeloemooe, tánõ bacha ba tánõ baero. 15Ba õmane wamazõchi jaʼia: 300 hela waʼanaoe nowo andrõ ba 50 hela waʼebolo ba 30 hela waʼalaw̃a. 16Ba õfosandrela nowo, jaw̃a, ba dete, sahela waʼalaw̃a õbeʼe. Ba bawandroehõ nowo, ba ba ngai õbeʼe; õfotõloe ngaʼõtõ ba oi bateʼe õbeʼe. 17Lõ ara tõ sa dania ba anõnõ danõ idanõ oebeʼe, ba wangohori fefoe nõsi goeli danõ, si so noso, barõ mbanoea, si jaw̃a; fefoe zi so ba goeli danõ ba si tekiko oebeʼe. 18Ba ba chõoe, ba fawoeʼoe li ndraʼo, ba si mõi ba nowo ndraʼoegõ jaʼoegõ ba onooe matoea andrõ ba foʼomooe ba oemõnõoe andrõ, awõoe. 19Ba ba zi so noso fefoe, ba nõsi goeli danõ maʼafefoe, ba doeadoea geoe, domboedomboea õʼohe jaw̃a ba nowo, ba wangorifi jaʼira, awõoe; sara zi matoea ba sara zi alawe. 20Fofo andrõ, ngawangawalõ, ba oerifõ niha ngawangawalõ ba sanananana ba goeli danõ fefoe, ngawangawalõ ba doeadoea mõi chõoe ba nowo jaw̃a, enaʼõ teʼorifi. 21Ba jaʼoegõ, ba faigi chõoe ngawalõ gõ fefoe, niʼagaʼaga, ba hõna chõoe, õoe dania ba õra. 22Ba iʼoʼõ sibai Noachi, dali niw̃aʼõ Lowalangi chõnia. (Heb. 11, 7).
Currently Selected:
SOERA MOZE I. FAZA 6.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.