SOERA MOZE I. FAZA 40.
FAZA 40.
I. Fangifi ngoningoni Waraʼo andrõ, si daroea, si so ba goeroenga. II. Iʼombachaʼõ Josefo geloeaha wangifi andrõ. III. Itõrõ niʼombachaʼõnia andrõ.
1I. Ba lõ ara foeri õ, ba mosala zamaʼoli gõ chõ razo Miseraji ba samazõchi koee chõnia, so zalara chõ zochõ jaʼira, razo Miseraji. 2Ba mofõnoe Waraʼo ba ngoningoninia andrõ, si daroea, hõgõ zamaʼoli gõ ba hõgõ zamazõchi koee, 3ba ifabeʼeʼõ ba goeroenga ira ba nono hõgõ wazoeri, ba goeroenga andrõ, ba nikoeroe Josefo, (F. 39, 20). 4Ba ibeʼe ngoningonira Josefo hõgõ wazoeri andrõ; ba ara maʼifoe tetaha ira. 5Ba mangifi zi daroea andrõ, ha sara wongi, ba fasamboea geloeaha wangifira, fangifi zamaʼoli gõ ba fangifi zamazõchi koee chõ razo Miseraji, si so ba goeroenga.
6II. Ba me mõi si bacha chõra Josefo, si hoelõ wongi, ba oroma chõnia, wa lõ sõchisõchi dõdõra. 7Ba isofoe chõ ngoningoni Waraʼo andrõ, nitaha awõnia ba nomo zochõ jaʼia, imane: Hadia, wa mangeraoe mbawami maʼõchṍ? 8Ba lamane chõnia: No mangifi ndraʼaga ba lõ sangombacha eloeaha. Ba imane chõra Josefo: Lowalangi mbalazi ba wangombacha eloeaha wangifi — ba mitoenõ chõgoe. 9Ba itoenõ chõ Josefo wangifinia hõgõ zamaʼoli gõ, imane chõnia: Ba wangifigoe andrõ, ba so fõnagoe w̃ew̃e nagoe, oew̃aʼõ. 10Ba si tõloe daha w̃ew̃e nagoe andrõ. Ba me molehe ia, ba aloea mbowo ba adõlõ mowoea sasoso. 11Ba so ba dangagoe mako Waraʼo. Ba oehalõ mboea nagoe andrõ, ba oeferaisi ba mako chõ Waraʼo ba oebeʼe ba danga Waraʼo mako. 12Ba imane chõnia Josefo: Daʼõ geloeaha: Daha andrõ si tõloe, ba no ngaloeo. 13Tõloe bongi tõ, iʼotarai maʼõchṍ, ba iʼefaʼõ ndraʼoegõ Faraʼo ba ifoeli ifataro ndraʼoegõ ba nahaoe. Ba õfoeli õbeʼe ba danga Warao makonia, si mane fõna, me samaʼoli gõ ndraʼoegõ chõnia. 14Ba tõrõtõrõ tõdõoe ndraʼodo, na ohahaoe dõdõoe, tolodo, wangombacha jaʼo chõ Waraʼo, enaʼõ õʼefaʼõ ndraʼo ba nomo andre. 15Noa sa nitagõ manõ ndraʼo ba danõ Heberaio ba ba daʼe gõi, ba lõ horõgoe, wa no labeʼe ba goeroenga ndraʼodo. 16Ba me irongo hõgõ zamazõchi koee andrõ, si sõchi geloeaha andrõ, ba imane chõ Josefo: Ba wangifigoe, ba tõloe kamboekamboe koee ba hõgõgoe, oew̃aʼõ. 17Ba ba gamboekamboe tánõ jaw̃a, ba so ngawalõ gõ chõ Waraʼo, nifazõchi doeka koee; ba laʼā fofo ba gamboekamboe andrõ ba hõgõgoe. 18Ba itema linia Josefo, imane: Daʼõ geloeaha daʼõ: Kamboekamboe andrõ, si tõloe, ba tõloe ngaloeo. 19Tõloe bongi tõ, iʼotarai maʼõchṍ, ba ifaʼew̃aʼõ mbagioe Faraʼo ba ifataw̃iʼõ ba dõla geoe, ba tobali laʼā nõsioe fofo.
20III. Ba tõloe bongi aefa daʼõ, me baw̃a waʼatoemboe Waraʼo, ba ibeʼe gõ ngoningoninia fefoe. Ba ifahalõʼõ mijaw̃a hõgõ zamaʼoli gõ andrõ, awõ hõgõ zamazõchi koee, ba zi so ngoningoninia; 21hõgõ zamaʼoli gõ andrõ, ba ifoeli ifataro ba halõw̃õnia, fa tola ifoeli ibeʼe ba danga Waraʼo mako; 22ba hõgõ zamazõchi koee, ba ifataw̃iʼõ, itõrõ niw̃aʼõ Josefo chõra. 23Ba lõʼõ saʼae itõrõ tõdõ hõgõ zamaʼoli gõ Josefo, olifoe ia.
Currently Selected:
SOERA MOZE I. FAZA 40.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.