SOERA MOZE I. FAZA 25.
FAZA 25.
I. Ifoeli mangowaloe Gaberahamo. Ononia ba daʼõ. II. Faʼamatenia ba fogoʼo jaʼia. III. Ngaʼõtõ Zimaʼeli ba faʼamatenia. IV. Amaboeʼoeala li Lowalangi chõ Rebeka. Faʼatoemboe ndra Ezaoe Jakobo. V. Lõ ba dõdõ Gezaoe faʼasiaʼania.
1I. Ba ifoeli mangai ira alawe Aberahamo, 2Ketoera dõi, ba moʼono daʼõ chõnia: Simera ba Jokisa ba Medano ba Midiano ba Jisibaki ba Soea. (Ngaʼõt. I. 1, 32). 3Ba ono Jokisa, ba Seba ba Dedano; ba maʼoewoe Dedano Ndrawa Asoeri andrõ ba Dawa Letoesi ba Dawa Loimeni. 4Ba ono Midiano, ba Efa ba Eferi ba Hanochi, ba Abida ba Elidaʼa; oi iraono Getoera andrõ daʼõ. 5Ba hadia ia zi so chõnia, fefoe, ba ibeʼe chõ Gizaʼaki Aberahamo. 6Ba ba ndraono ndrongania ba dõi, chõnia, ba mamoeala Gaberahamo ba ifofanõ ira, ifabali chõ nononia Izaʼaki, me aoeri ia na, ifofanõ ba danõ tánõ ba gatoemboecha loeo.
7II. Ba daʼõ waʼanaoe noso Gaberahamo, si so ia ba goeli danõ: 175 fache. 8Ba aetoe noso Gaberahamo, mate ia ba waʼatoea omasiõ, no atoea ia ba no afõli faʼaoeri; ba teʼoroedoegõ ia ba niwara. 9Ba lakoʼo ia ononia Izaʼaki ba Simaʼeli ba dõgi narõ hili Machefela andrõ, ba mbenoea Ndraono Cheti andrõ, Eferono, ono Zohara, ba gamaoedoe Mamere. 10Ba mbenoea andrõ, niʼõli Gaberahamo ba Ndraono Cheti: ba daʼõ tekoʼo Gaberahamo ba foʼomonia Sara. (F. 23, 19). 11Ba me no mate Gaberahamo, ba ifahowoeʼõ nononia Izaʼaki Lowalangi. Ba ba ngai ”mbaʼa zaoeri, samaigi jaʼodo” sosó Gizaʼaki. (F. 24, 62).
12III. Ba daʼõ ngaʼõtõ Zimaʼeli andrõ, ono Gaberahamo, ononia ba Ndrawa Miseraji andrõ, Hagara, sawoejoe jomo chõ Zara. 13Daʼe dõi nono Zimaʼeli, wanõtõi jaʼira, ngenolira: Si aʼa chõ Zimaʼeli, ba Nebajoti, ba Kedara ba Adibeʼeli ba Mibisa 14ba Misima ba Doema ba Masa, 15ba Hadadi ba Tema ba Jetoeri ba Nafisi ba Kedema. 16Daʼõ nono Zimaʼeli andrõ, ba daʼõ dõira, ba mbanoeara andrõ, ba naha nosera; felendroea zalaw̃a, ba niwara andrõ. (F. 17, 20). 17Ba faʼanaoe noso Zimaʼeli andrõ, ba 137 fache. Ba aetoe nosonia, mate ba teʼoroedoegõ ba niwara. 18Ba nahiara, banoeara, ba iʼotarai Hawila, noemalõ ba Zoeri, tánõ ba gatoemboecha, na taʼotarai danõ Miseraji, iroegi misa danõ Ndrawa Asiria; tánõ ba gatoemboecha mowanoea ia fõnafõna dalifoesõnia fefoe. (F. 16, 12).
19IV. Ba daʼõ chõ Gizaʼaki, ono Gaberahamo: Ono Gaberahamo Gizaʼaki. 20Ba õfa woeloe fache Gizaʼaki, me ihalõ Rebeka andrõ, ono Ndrawa Garamo andrõ, Betoeeli, ba Mezofotamia, achi Ndrawa Garamo andrõ, Labano. 21Ba mangandrõ Gizaʼaki chõ Jehowa ba chõ woʼomonia andrõ, me no si lõ ono. Ba ifondrondrongo wangandrõnia Jehowa, ba manabina woʼomonia Rebeka [si faero]. 22Ba fagobigobi nononia ba daloenia; ba imane: Na si manõ, ba hana wa aoerido? Ba mõi ia moesofoe chõ Jehowa. 23Ba imane chõnia Jehowa: Domboea soi ba daloemõ; domboea mado zi toemboe chõoe dania, ba wasoewõta. Ba abõlõ dania mado si samboea, ba sawoejoe zi achi dania zi aʼa. (Rom. 9, 12). 24Ba me iroegi baw̃ania ba woʼono, ba hiza zi faero ba daloenia. 25Ba bõla zi aʼa, no ojoʼojo, hoelõ mbaroe loeo soboeboe, maʼasageoe. Andrõ wa labeʼe tõinia Gezaoe. 26Ba bõla gõi nachinia andrõ, ba no igogohe mbõrõ sisi Gezaoe tangania; andrõ wa labeʼe tõinia Jakobo. Ba no õnõ ngafoeloe fache Gizaʼaki, me toemboe ira. (Hos. 12, 4).
27V. Ba me manõi ndraono andrõ, ba tobali sabõlõ ba wealoe Gezaoe, niha ba ndroeʼoe, ba Jakobo, ba niha sahonohono, si iagõ ose. 28Ba Izaʼaki, ba i omasiʼõ Gezaoe, amichõnia gahoeloea andrõ; ba Rebeka, ba iʼomasiʼõ Jakobo. 29Ba samoeza maʼõchõ, ba itoegeʼõ gõnia Jakobo. Ba so Gezaoe, olofo sibai, iʼotarai danõ si mate. 30Ba imane Ezaoe chõ Jakobo: Taʼitaʼi beʼe õgoe zojo andrõ, sojo andrõ we! solofo sibai saʼae ndraʼo. Andrõ wa labeʼe tõinia Gedomo (Sojo). 31Ba imane Jakobo: Amawa chõgoe waʼasiaʼamõ oea! 32Ba imane Ezaoe: A! mate sa atṍ ndraʼo dania, ba ha oewai waʼasiaʼa andrõ! 33Imane Jakobo: Ba ae ba hõloe oea chõgoe! Ba mõi ba hõloe ia chõnia ba tobali iʼamawa chõ Jakobo waʼasiaʼania andrõ. (Heb. 12, 16). 34Ba ibeʼe chõ Gezaoe roti ba samõsa mõʼṍ harita sideʼide; ba manga ia, ba ifazaw̃a ia, ilaoe mofanõ. Ba tobali iʼositengagõ waʼasiaʼania Ezaoe.
Currently Selected:
SOERA MOZE I. FAZA 25.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.