SOERA MOZE I. FAZA 23.
FAZA 23.
I. Faʼamate Zara. II. Iʼõli lewatõ Aberahamo chõ Geferono andrõ. III. Fogoʼo Sara.
1I. Otoe a doea woeloe a fitoe fache waʼara Zara ba goeli danõ; daʼõ waʼanaoe nosonia. 2Ba mate Zara ba Giriata Garaba, jaʼia Heberona andrõ, ba danõ Ganaʼana. Ba mõi Gaberahamo faʼalaʼalai ba chõ Zara, mangeʼesi jaʼia. 3Aefa daʼõ, ba irõi mboto zi mate andrõ, mõi ia moehede ba Ndraono Cheti, imane: 4Niha bõʼõ ndraʼo chõmi, si fatewoe; Mitehe chõgoe lewatõ ba chõmi, ondrõita dania, enaʼõ oeheta jomo zi mate andrõ chõgoe, enaʼõ oekoʼo. 5Ba latema li Gaberahamo Iraono Cheti, lamane: 6Fondrondrongo chõma ine, Toea! Amaedola zalaw̃a ba chõ Lowalangi ndraʼoegõ, weʼasosómõ ba chõma; ba wondrege zi sõchi lewatõ chõma koʼo zi mate andrõ chõoe! samõsa lõ ba chõma, sanenaw̃a jaʼoegõ, na ba lewatõ chõnia õkoʼo zi mate andrõ chõoe. 7Ba maoso Gaberahamo, mangaloeloe ia ba niha ba danõ andrõ, Iraono Cheti. 8Ba hoemede ia chõra, imane: Na mõi dõdõmi oeheta jomo zi mate andrõ chõgoe ba oekoʼo, ba mitolodo, miloeloei mangoemaʼõ chõ Geferono andrõ, ono Zohara, 9enaʼõ ibeʼe chõgoe dõgi narõ hili andrõ, Machefela, chõnia, ba wondrege mbenoeania andrõ; lõ oeʼambõsi mbõlinia chõnia, na ibeʼe chõgoe lewatõ ba chõmi, ondrõita dania. 10Ba no doemadao gõi ba daʼõ Geferono andrõ, awõ Ndraono Cheti. Ba itema li Gaberahamo Eferono, Iraono Cheti, tobali larongo Iraono Cheti, ha waʼato ira, sanõrõ bawa gõli mbanoeania mijomo, imane: 11Bõi, Toea! fondrondrongo chõgoe! Oebeʼe boealagoe chõoe mbenoea andrõ, fabaja tõgi narõ hili andrõ bacha, oebeʼe boeala chõoe; ba zanehe niwama andre oebeʼe boealagoe chõoe. Koʼo manõ saʼae zi mate andrõ chõoe! 12Ba mangaloeloe Gaberahamo ba niha ba danõ andrõ. 13Ba hoemede ia chõ Geferono andrõ; larongo banoeara, imane: Na si manõ dõdõoe, ba fondrondrongo chõgoe! Oebeʼe mbõli mbenoea andrõ, halõ ia chõgoe, enaʼõ oekoʼo ba daʼõ zi mate andrõ chõgoe. 14Ba imane Eferono chõ Gaberahamo: 15Fondrondrongo chõgoe ine, Toea! Benoea si 400 roefia mobõli, ba hadia daʼõ chõda, daroea ita? Koʼo manõ saʼae zi mate andrõ chõoe! 16Ba iʼoʼõ chõ Geferono Aberahamo, ba itoelo chõ Geferono mbõli andrõ Aberahamo, niw̃aʼõnia ba zi so Ndraono Cheti andrõ, 400 roefia fanimba, si lakoe ba waniaga. 17Ba tobali chõ Gaberahamo mbenoea Geferono andrõ, ba Machefela, ba gamaoedoe Mamere, benoea andrõ, si so tõgi narõ hili andrõ bacha, awõ geoe fefoe, si so ba mbenoea andrõ, fasoei, (F. 25, 10; 50, 13), 18teʼaroʼõ chõ Gaberahamo, ba zi so Ndraono Cheti andrõ, ha waʼato ira, sanõrõ bawa gõli mbanoeania, mijomo. 19Aefa daʼõ ba ikoʼo woʼomonia Sara Aberahamo ba dõgi narõ hili andrõ, ba mbenoea Machefela, ba gamaoedoe Mamere, jaʼia Heberona, ba danõ Ganaʼana. 20Ba tobali teʼaroʼõ chõ Gaberahamo mbenoea andrõ fabaja tõgi narõ hili andrõ bacha, laʼaroʼõ Iraono Cheti, lewatõ chõnia, ondrõita dania.
Currently Selected:
SOERA MOZE I. FAZA 23.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.