ܙܟ݂ܪܝܐ 8
8
ܐܘܿܪܸܫܠܸܡ ܡܸܢܕܪܸܫ ܒܸܬ ܦܵܝܫܵܐ ܒܢܝܼܬܵܐ
1ܘܗܘܹܐ ܠܹܗ ܚܲܒܪܵܐ ܕܡܵܪܝܵܐ ܚܲܝܠܬܵܢܵܐ، ܒܹܐܡܵܪܵܐ، 2ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ܥܒ݂ܝܼܪܝܼ ܒܛܢܵܢܵܐ ܠܨܸܗܝܘܿܢ، ܛܢܵܢܵܐ ܓܘܼܪܵܐ، ܘܥܒ݂ܝܼܪܝܼ ܒܛܢܵܢܵܐ ܐܸܠܘܼܗ̇ ܒܚܸܡܬܵܐ ܓܘܼܪܬܵܐ. 3ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ، ܕܝܼܪܝܼ ܠܨܸܗܝܘܿܢ، ܘܒܸܬ ܫܵܪܹܝܢ ܒܓܵܘܵܐ ܕܐܘܿܪܸܫܠܸܡ، ܘܒܸܬ ܦܵܝܫܵܐ ܩܪܝܼܬܵܐ ܐܘܿܪܸܫܠܸܡ، ܡܕܝܼܢ݇ܬܵܐ ܕܫܲܪܝܼܪܘܼܬܵܐ، ܘܛܘܼܪܵܐ ܕܡܵܪܝܵܐ ܚܲܝܠܬܵܢܵܐ ܒܸܬ ܦܵܐܹܫ ܩܸܪܝܵܐ، ܛܘܼܪܵܐ ܕܩܘܼܕܫܵܐ. 4ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ܡܸܢܕܪܸܫ ܒܸܬ ܝܵܬܒ݂ܝܼ ܚܘܵܪ̈ܕܸܩܢܹܐ ܘܚܘܵܪ̈ܟܵܘܣܹܐ ܒܥܵܠܘܿܠܵܢܹ̈ܐ ܕܐܘܿܪܸܫܠܸܡ، ܘܒܸܬ ܗܵܘܝܼ ܕܒ݂ܝܼܩܹܐ ܚܘܼܛܪܲܝܗܝ ܒܐܝܼܕܲܝܗܝ ܡܣܵܒܵܒ ܕܚܲܝܹ̈ܐ ܝܲܪ̈ܝܼܟܹܐ. 5ܘܥܵܠܘܿܠܵܢܹ̈ܐ ܕܡܕܝܼܢ݇ܬܵܐ ܒܸܬ ܦܵܝܫܝܼ ܡܸܠܝܹܐ ܡ̣ܢ ܝܵܠܹ̈ܕ݇ܐ ܘܝܵܠܕ݇ܬܵܬܹ̈ܐ ܛܲܐܘܼܠܹܐ ܒܥܵܠܘܿܠܵܢܘܼ̈ܗ̇. 6ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ܐܸܢ ܗܵܘܹܐ ܥܓ̰ܝܼܒܵܐ ܐܵܗܵܐ ܫܘܼܠܵܐ ܒܥܲܝܢܹ̈ܐ ܕܣܵܗܡܵܐ ܦܝܼܫܵܐ ܕܐܵܗܵܐ ܥܲܡܵܐ ܒܐܵܢܝܼ ܝܵܘܡܵܢܹ̈ܐ، ܐܘܼܦ ܒܥܲܝܢܹ̈ܐ ܕܝܼܝܼ ܒܸܬ ܗܵܘܹܐ ܥܓ̰ܝܼܒܵܐ؟ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ. 7ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ܗܵܐ، ܐܵܢܵܐ ܦܲܪܘܼܩܹܐ ܝܘܸܢ ܠܥܲܡܝܼ ܡ̣ܢ ܐܲܪܥܵܐ ܕܙܪܵܩܵܐ، ܘܡ̣ܢ ܐܲܪܥܵܐ ܕܓܢܵܝܬܵܐ ܕܫܸܡܫܵܐ، 8ܘܒܸܬ ܡܲܝܬܹܝܢܗܘܿܢ، ܘܒܸܬ ܫܵܪܝܼ ܒܓܵܘܵܐ ܕܐܘܿܪܸܫܠܸܡ، ܘܒܸܬ ܗܵܘܝܼ ܐܸܠܝܼ ܠܥܲܡܵܐ، ܘܐܵܢܵܐ ܒܸܬ ܗܵܘܹܝܢ ܐܸܠܲܝܗܝ ܠܐܲܠܵܗܵܐ، ܒܫܲܪܝܼܪܘܼܬܵܐ ܘܒܙܲܕܝܼܩܘܼܬܵܐ.
9ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ܦܵܝܫܝܼ ܚܘܼܠܸܢܹܐ ܐܝܼܕܵܬܵܘ̈ܟ݂ܘܿܢ ܩܵܐ ܒܢܵܝܬܵܐ ܕܒܲܝܬܵܐ ܕܡܵܪܝܵܐ، ܐܲܚܬܘܿܢ ܕܒܸܫܡܵܥܵܐ ܝܬܘܿܢ ܒܐܲܢܹܐ ܝܵܘܡܵܢܹ̈ܐ ܠܐܲܢܹܐ ܚܲܒܪܹ̈ܐ ܡ̣ܢ ܦܘܼܡܵܐ ܕܢܒ݂ܝܼܹ̈ܐ، ܡ̣ܢ ܝܵܘܡܵܐ ܕܦܝܼܫ ܠܵܗ̇ ܡܘܼܬܸܒ݂ܬܵܐ ܫܲܬܐܸܣܬܵܐ ܕܗܲܝܟܠܵܐ ܕܡܵܪܝܵܐ ܚܲܝܠܬܵܢܵܐ ܠܸܦܝܵܫܵܐ ܒܸܢܝܵܐ. 10ܣܵܒܵܒ ܡܩܵܕ݇ܡ ܕܐܵܢܝܼ ܝܵܘܡܵܢܹ̈ܐ ܗܵܩܵܐ ܕܒܲܪܢܵܫܵܐ ܠܵܐ ܦܝܼܫ ܠܹܗ ܦܪܝܼܥܵܐ، ܘܕܒ݂ܵܩܬܵܐ ܒܗܵܩܵܐ ܠܗܲܝܘܵܢ ܠܲܝܬ ܗ݇ܘܵܐ، ܘܠܦܵܠܛܵܢܵܐ ܘܠܥܵܒ݂ܪܵܢܵܐ ܠܲܝܬ ܗ݇ܘܵܐ ܫܠܵܡܵܐ ܡ̣ܢ ܥܸܠܬܵܐ ܕܡܲܠܝܸܨܵܢܵܐ، ܘܕܪܹܐ ܠܝܼ ܠܟܠܔ ܒܲܪܢܵܫܵܐ ܐ݇ܢܵܫܵܐ ܕܲܠܩܘܼܒ݂ܠܔ ܚܲܒ݂ܪܹܗ. 11ܘܐܵܕܝܼܵܐ ܐܵܢܵܐ ܠܹܐ ܗܵܘܹܝܢ ܐܲܝܟ݂ ܝܵܘܡܵܢܹ̈ܐ ܩܲܕ݇ܡܵܝܹ̈ܐ ܠܣܵܗܡܵܐ ܦܝܼܫܵܐ ܕܐܵܗܵܐ ܥܲܡܵܐ، ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ. 12ܣܵܒܵܒ ܙܪܘܼܥܬܵܐ ܒܸܬ ܗܵܘܝܵܐ ܒܫܠܵܡܵܐ: ܓܸܦܬܵܐ ܒܸܬ ܝܵܗ݇ܒ݂ܵܐ ܛܥܘܼܢܬܘܼܗ̇، ܘܐܲܪܥܵܐ ܒܸܬ ܝܵܗ݇ܒ݂ܵܐ ܡܲܗܨܘܼܠܘܼܗ̇، ܘܫܡܲܝܹ̈ܐ ܒܸܬ ܝܵܗ݇ܒ݂ܝܼ ܛܠܘܼܠܲܝܗܝ، ܘܒܸܬ ܥܵܒ݂ܕܹܢ ܠܣܵܗܡܵܐ ܦܝܼܫܵܐ ܕܐܵܗܵܐ ܥܲܡܵܐ ܕܝܵܪܬܝܼ ܟܠܲܝܗܝ ܐܲܢܹܐ. 13ܘܒܸܬ ܗܵܘܝܵܐ، ܕܵܐܟ݂ܝܼ ܕܗܘܹܐ ܠܵܘܟ݂ܘܿܢ ܠܵܘܛܬܵܐ ܓܵܘ ܐܸܡܘܵܬܹ̈ܐ، ܝܵܐ ܒܹܝܬ ܝܼܗܘܼܕܵܐ ܘܒܹܝܬ ܝܼܣܪܵܝܹܠܔ، ܗܲܕܟ݂ܵܐ ܒܸܬ ܦܲܪܩܸܢܵܘܟ݂ܘܿܢ، ܘܒܸܬ ܗܵܘܹܝܬܘܿܢ ܠܒܘܼܪܟܬܵܐ. ܠܵܐ ܙܵܕܥܝܼܬܘܿܢ، ܘܦܵܝܫܝܼ ܚܘܼܠܸܢܹܐ ܐܝܼܕܵܬܵܘ̈ܟ݂ܘܿܢ. 14ܣܵܒܵܒ ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ܕܵܐܟ݂ܝܼ ܕܚܫܝܼܒ݂ ܠܝܼ ܠܸܥܒ݂ܵܕܵܐ ܒܝܼܫܬܵܐ ܐܸܠܵܘܟ݂ܘܿܢ، ܟܲܕ ܡܘܼܟܪܸܒ ܠܗܘܿܢ ܒܵܒܵܘܵܬܵܘ̈ܟ݂ܘܿܢ ܐܸܠܝܼ، ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ܘܠܵܐ ܦܫܝܼܡ ܠܝܼ، 15ܗܲܕܟ݂ܵܐ ܕܝܼܪܝܼ ܘܚܫܝܼܒ݂ ܠܝܼ ܠܸܥܒ݂ܵܕܵܐ ܛܵܒ݂ܬܵܐ ܒܐܲܢܹܐ ܝܵܘܡܵܢܹ̈ܐ ܠܐܘܿܪܸܫܠܸܡ ܘܠܒܹܝܬ ܝܼܗܘܼܕܵܐ؛ ܠܵܐ ܙܵܕܥܝܼܬܘܿܢ. 16ܐܲܢܹܐ ܝܢܵܐ ܚܲܒܪܹ̈ܐ ܕܥܵܒ݂ܕܝܼܬܘܿܢ: ܗܲܡܙܸܡܘܼܢ ܫܲܪܝܼܪܘܼܬܵܐ ܐ݇ܢܵܫܵܐ ܥܲܡ ܚܲܒ݂ܪܹܗ؛ ܫܲܪܝܼܪܘܼܬܵܐ ܘܕܝܼܘܵܢ ܕܫܠܵܡܵܐ ܕܘܼܢܘܼܢ ܒܕܲܪ̈ܘܵܙܵܘܟ݂ܘܿܢ، 17ܘܐ݇ܢܵܫܵܐ ܒܝܼܫܬܵܐ ܕܚܲܒ݂ܪܹܗ ܠܵܐ ܚܵܫܒ݂ܝܼܬܘܿܢ ܠܸܥܒ݂ܵܕܵܐ ܒܠܸܒܵܘܟ݂ܘܿܢ، ܘܡܵܘܡܝܼܬܵܐ ܕܲܓܵܠܬܵܐ ܠܵܐ ܡܲܚܸܒܝܼܬܘܿܢ، ܣܵܒܵܒ ܟܠܲܝܗܝ ܐܲܢܹܐ ܟܹܐ ܣܵܢܹܝܢܗܘܿܢ، ܒܹܐܡܵܪܵܐ ܝܠܹܗ ܡܵܪܝܵܐ.
18ܘܗܘܹܐ ܠܹܗ ܚܲܒܪܵܐ ܕܡܵܪܝܵܐ ܚܲܝܠܬܵܢܵܐ ܐܸܠܝܼ، ܒܹܐܡܵܪܵܐ، 19ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ܨܵܘܡܵܐ ܕܝܲܪܚܵܐ ܕܐܲܪܒܥܵܐ، ܘܨܵܘܡܵܐ ܕܝܲܪܚܵܐ ܕܚܲܡܫܵܐ، ܘܨܵܘܡܵܐ ܕܝܲܪܚܵܐ ܕܫܲܒ݂ܥܵܐ، ܘܨܵܘܡܵܐ ܕܝܲܪܚܵܐ ܕܥܸܣܪܵܐ، ܒܸܬ ܗܵܘܝܼ ܠܒܹܝܬ ܝܼܗܘܼܕܵܐ ܠܦܨܵܚܵܐ ܘܠܚܲܕܘܼܬܵܐ، ܘܠܥܹܐܕܵܘܵܬܹ̈ܐ ܛܵܒܹ̈ܐ. ܒܘܼܬ ܐܵܗܵܐ، ܫܲܪܝܼܪܘܼܬܵܐ ܘܫܠܵܡܵܐ ܡܲܚܸܒܘܼܢ. 20ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ܡܸܢܕܪܸܫ ܒܸܬ ܐܵܬܝܼ ܥܲܡܡܹ̈ܐ ܘܥܵܡܪ̈ܵܢܹܐ ܕܪܵܒܵܐ ܡܕܝܼܢܵܬܹ̈ܐ؛ 21ܘܒܸܬ ܐܵܙܠ݇ܝܼ ܥܵܡܪ̈ܵܢܹܐ ܕܚܕܵܐ ܡܕܝܼܢ݇ܬܵܐ ܠܚܕܵܐ ܐ݇ܚܹܪ݇ܬܵܐ، ܘܐܵܡܪܝܼ، ”ܬܹܝܡܘܼܢ ܐܵܙܲܠ݇ܚ ܠܦܲܪܦܘܼܠܹܐ ܒܡܵܪܝܵܐ، ܘܠܸܛܥܵܝܵܐ ܠܡܵܪܝܵܐ ܚܲܝܠܬܵܢܵܐ؛ ܒܹܐܙܵܠܵܐ ܝܘܸܢ ܐܘܼܦ ܐܵܢܵܐ.“ 22ܘܒܸܬ ܐܵܬܝܼ ܥܲܡܡܹ̈ܐ ܪܵܒܵܐ ܘܐܸܡܘܵܬܹ̈ܐ ܥܲܫܝܼܢܹ̈ܐ ܠܸܛܥܵܝܵܐ ܠܡܵܪܝܵܐ ܚܲܝܠܬܵܢܵܐ ܓܵܘ ܐܘܿܪܸܫܠܸܡ، ܘܠܦܲܪܦܘܼܠܹܐ ܒܡܵܪܝܵܐ. 23ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ܒܸܬ ܗܵܘܝܵܐ ܒܐܵܢܝܼ ܝܵܘܡܵܢܹ̈ܐ، ܥܸܣܪܵܐ ܐ݇ܢܵܫܹ̈ܐ ܡ̣ܢ ܟܠܲܝܗܝ ܠܸܫܵܢܹ̈ܐ ܗܘܼܡܙܸܡܹܐ ܒܝܲܕ ܐܸܡܘܵܬܹ̈ܐ ܒܸܬ ܕܵܒ݂ܩܝܼ ܒܫܸܦܘܼܠܵܐ ܕܐ݇ܢܵܫܵܐ ܝܗܘܼܕܵܝܵܐ، ܒܹܐܡܵܪܵܐ، ܒܸܬ ܐܵܙܲܠ݇ܚ ܥܲܡܵܘܟ݂ܘܿܢ، ܣܵܒܵܒ ܫܡܝܼܥ ܠܲܢ ܕܐܲܠܵܗܵܐ ܥܲܡܵܘܟ݂ܘܿܢ ܝܼܠܹܗ.
Trenutno izbrano:
ܙܟ݂ܪܝܐ 8: ABTAB
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Aramaic Bible Translation Assyrian Bible © 2025 Aramaic Bible Translation