LIPOH 35
35
Bethel la Tsingrangba-nü Jakob Müwajücho
1 #
Lip 28.11-17
Tsingrangba-nü Jakob te yocho, “Bethel lang wüng ko hütsüla lieng. Ko hütsüla nü mung Esau tenü rang tside chüro shirüba Tsingrang khyang bholu khüdu külüpm.”
2Achotsü Jakob-nü abi kukhirü te ko arüh yola lirü atümung te yocho, “Nührünü yohpüba yangpirü tsingrangti tsü pehng, nührü jangjang müsachehng ko jengki amüsa yohng. 3Ihsa hilanü Bethel lang tsinung ko Ih chongchade rükuba ko Ih khüdederü licho apüm la Ite zehba Tsingrang khyang bholu khüdu külüpnung.” 4Achotsü arühnü Jakob khyang yangpirü tsingrangti apüm ko arüh nangkula nangmüshi apüm jücho. Ko abinü hütsüri Shekem amünyeh langsing yingte jurang pehcho.
5Khode Jakob ko atsurüti tsinung shemüsucho, mükangmüshü lirüti drüsehcho, hütsünü sünüsü arüh mü-iiwücho. 6Ko Jakob ko anyitsarüti tsü Kanan lih la ade Bethel dsiba Luz lang rocho. 7Hütsüla abinü bholu khüdu külüpcho ko abinü hütsü müdüm te El Bethel pü dsicho, tunüo hütsüla abi amung tenü rang tside Tsingrangba-nü apu jangjang abi te mishacho. 8Ade Rebeka rükutpü Debora sücho ko Bethel kihjinglang lahpi langsing yingte dhrürangcho. Hütsünü hiba te “Traba langsing pü dsicho.”
9Khode Jakob Mesopotamia langnü thalicho, Tsingrangba-nü abi te thali shiro abi müwajücho. 10#Lip 32.28Tsingrangba-nü abi te yocho, “Nü neng Jakob lile, ta ade tinü Israel pü dsinung.” Hütsüta Tsingrangba-nü aneng Israel dsijücho. 11#Lip 17.4-8Ko Tsingrangba-nü abi te yocho, “Ih Akohbong Tsingrang. Tsuzarü khütang suhng. Nü chahnü yuchoti trahcho tsinung ko nüh yangthsarüti jümürü kangnung. 12Ihnü Abraham ko Isak khyang jüba lih tsü nü khyang jünung ko adesü nü khanglangsü nü shümtsurü khyang jünung.” 13Hütsüpü Tsingrangba-nü abi pehjü tsicho. 14#Lip 28.18-19Hütsüta, Tsingrangba-nü Jakob te chotabala tsü, abinü amüdhethsa lung khyümnü hütsüchah yongkha ko tuji tungkeh müsachehcho. 15Ko abinü hütsüte Bethel pü dsicho.
Rachel Sücho
16Jakob ko arüh kukhi Bethel pehjücho, ko Efrath chihnung rüm-o lide, Rachel azarü suronung becho chihcho, ko mikhung küro dee khingchicho. 17Khode alaa khingchi dhsacho, atrotpünü abükyü te yocho, “Tüdrü, Rachel; adesü adhrerüe.” 18Ta abükyü tsü so tsicho ko amüci longde abükyünü abi neng Benoni dsicho, ta aunü abi neng Benjamin dsijücho.
19Hütsüta Rachel sücho ko abükyü tsü ade Bethlehem dsiba Efrath langjüp dhrürangcho. 20Jakob-nü hütsüla amüdhethsa lung khüdu khyümcho ko hütsü chünye yingcheh Rachel kong amüdhethsa lile. 21Jakob-nü khü wüpü Eder rangrangkuh liba khüulang shükuh thsa müdongcho.
Jakob Tsurüti
(1 Roh 2.1, 2)
22 #
Lip 49.4
Jakob hütsüba lih la liyade, Reuben-nü au ashamtpü Bilha te mükhongcho ko hütsü Jakob-nü yuchi azi chürocho.
Jakob tsurü dhüreanyüh licho. 23Lea chahnü Reuben (Jakob tsurü aukhuba), Simon, Levi, Juda, Isakar ko Zebulun. 24Rachel chahnü Josef ko Benjamin. 25Rachel kulitpü Bilha chahnü Dan ko Naftali. 26Lea kulitpü Zilpa chahnü Gad ko Asher. Tsuzarü hiri apüm Mesopotamia la nümüsucho.
Isak Sücho
27 #
Lip 13.18
Jakob-nü au Isak yanglang Abraham e Isak nyüh liba Hebron amünyeh Mamre lang wücho. 28Isak kang thsih khüdupü qure lipü 29shiseh sücho; ko atsu nyüh Esau e Jakob nyühnü abi dhrürangcho.
Currently Selected:
LIPOH 35: SANGBSI
Označeno
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.