LIPOH 26
26
Isak Gerar la Licho
1Hütsüba lih la Abraham chiichah tikehba tenü apa yangkong khüdu rocho. Isak-nü Filistiarü yangthsaba Gerar la Abimelek yanglang wücho. 2Abüdongba-nü Isak te chüro ngu yocho, “Ijip lang tüwü; Ihnü yoba lih hila du lieng. 3#Lip 12.13; 20.2Hila lieng ko Ih nüte linung ko nüh müwajünung. Ihnü hiba lih hi apüm nüh ko nü trah khyang jünung. Ihnü nüu Abraham te nyengchotacho hi yohpünung. 4Ihnü ningchah chenghiti toi nü chahnü trahchosohnung ko arüh khyang alih hi jünung. Ko arüh khu limih yucho apüm müwajünung. 5Ihnü nüh müwajünung, tunüo Abraham-nü I yochonyicho ko I yuzeng ko amülaba apüm bichicho.”
6Hütsünü Isak Gerar la licho. 7#Lip 12.13; 20.2Khode hütsüla nyitsarütinü anitpü nengdang tsingdhingcho, abinü abükyü tsü aniepü yocho. Abinü anitpüepü müyocho, tunüo hütsüla nyitsarüti tsünü anitpü tsü khyünyüde abi müpsehnung ko Rebeka tsü khyünung, tunüo abükyü tsü atsah tsaracho. 8Khode Isak hütsüla rüm-o licho, yangthsaba Abimelek-nü nyübongkhi lanü chahchü dhingde Isak e Rebeka nyüh khyahrita ya ngucho. 9Abimelek-nü Isak dsiro yocho, “Abükyü tsü nü nitpüe! Tuepü nüniepü yocho?”
Isak-nü lalingcho, “I nitpüepü yokhang Ih müpsehnung drücho.”
10Abimelek-nü yocho, “Nühnü hi tu nguchicho? I nyitsarü masünü mülakhüti nü nitpü te mükhongpü ihrü münyi tsü nü bhamüling kangba thsako.” 11Abimelek-nü müyurü atümung te yocho, “Sünü hiba nyitsarü ko anitpü mütsa bichinang, abilü süsohnung.”
12Isak-nü hütsüba lih la chisicho, ko hütsü kang tsü abinü shucho tenü thsihpi alaa xacho, tunüo Abüdongba-nü abi müwajücho. 13Mütozah abi pungrohirocho ko khütang alirü kangcho. 14Abi san, misü ko kulirü khütang lichonü Filistiarünü nahmohcho. 15Hütsünü au Abraham longde akulirütinü jucho kihkong apüm tsü Filistiarünü alihnü phetijücho.
16Achotsü Abimelek-nü Isak te yocho, “Ihrü lih lanü tsieng, tunüo nüh ihrü tenü tase alaa kangko.” 17Achotsü Isak-nü hütsülanü shehmüi tsicho, ko Gerar ngah la yangthri hütsüla licho. 18Abinü thali Abraham chichah jucho kihkong Filistiarünü Abraham süpü phetijübati tsü juchilicho ko aunü jücho neng du tsü dsicho. 19Isak kulirütinü angah la tsü kihkong khüdu jucho ko kih ngucho. 20Gerar san nyahrütinü Isak san nyahrüti te yübüta yocho, “Hiba kih hi ihrü yoe.” Hütsünü hiba kihkong te Isak-nü “Yübüta” kihkong pü dsicho.
21Isak kulirütinü kihkong apa khüdu jucho, ko hütsü nengdangsü yübütacho, hütsünü hiba te “Dhsata Kihkong” pü dsicho. 22Abinü hütsülanü shehmüi wü kihkong apa khüdu jucho. Hi nengdanglü khiyu mülicho, hütsünü hitelü “Nyüje Kihkong” pü dsicho. Abinü yocho, “Adelü hiba lih la linung Abüdongba-nü Ihsa khyang nyüje jüko, ko adelü hila Ihsa pungrohiro linung.”
23Isak-nü hütsü pehjüpü Bershebalang tuwücho. 24Hütsü romang Abüdongba-nü abi te chüro ngu yocho, “Ih nüu Abraham Tsingrang. Tüdrü; Ih nüte lile. Ihnü nüh müwajünung ko I dikehrü Abraham khyanglangnü nü chahnü trahchochoti alaa susohnung.” 25Hütsüla Isak-nü bholu khüdu külüpcho ko Abüdongba mübücho. Hütsüpü abinü hütsüla shükuh thsacho, ko akulirütinü kihkong apa khüdu jucho.
Isak ko Abimelek Nyüh Anyengchotacho
26 #
Lip 21.22
Abimelek-nü abi te trotarü Ahuzat ko rothsarü yola anüchiba Fikol nyüh nüpü Gerar lanü Isak shirünung rocho. 27Achotsü Isak-nü yocho, “Ite arorühthsa Ih iipehpü tuepü Ih shirünung rocho?”
28Arühnü lalingcho, “Abüdongba nüte zehlepü adelü ihrünü müdheko ko Ihsa kahla azengtaba linungbaepü ihrünü lümre. 29Ihrünü nüte tsa bichicho kyo nühnü ihrü mükhingchinungepü yuchümsohnyüre. Ihrünü nüh müi bichicho ko yangtsa la tsisohcho. Ko ade Abüdongba-nü nüh müwajüko.” 30Arüh nengdang Isak-nü thsüti rungnümjücho, ko arühnü tsuyongcho. 31Nyangnyü khüu mütoh arühnü khüdunü khüdu te yuchümtacho. Hütsüpü Isak-nü arüh müyangyohjü chonahe-pü zacho.
32Hütsü nyümong Isak kulirütinü ro abi te arühnü jucho kihkong nengdang yocho. Arühnü yocho, “Ihrünü kih nguko.” 33Abinü hütsüte “Yuchüm”#26.33 Bersheba: (21.31 tsü dhing) pü dsicho. Hütsüta Bersheba yangdi aneng ngucho.
Esau-nü Yangpilarü Khyücho
34Esau kang yüre azirü thsade, abinü Hit-larü anyüh, Beeri tsularü Judit ko Elon tsularü Basemat khyücho. 35Arühnü Isak e Rebeka nyüh akang dee bhamüling thsasohcho.
Currently Selected:
LIPOH 26: SANGBSI
Označeno
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.