Matiu 26
26
Enali mono noto kaba hi'ahana bomagi Yesuhi fi taga hi ete'ahana
Mk 14:1-2; Lk 22:1-2; Yn 11:45-53
1Yesu kaga alu epi su holoto alihi koko panana'amagihi ma ka lu epi'ehina: 2Lenali akeheli'ahabe, loe yupahisi minolototi koyapa Hu'mau lubuto bu'ehina yupa kumu Pasa yabe nelana ya'ma nose'na naluta kana'a huto hilina'mu yabe. Ya hulenogoti Kokulumaguti limi'ehina Bomofihi le'mete bite fateha'amagihi enayanuga melenogo malipu yafalo ho fililana'mu yabe.
3Ya'ma kana'alo sipi mono nohi kaba bona'i hiti to Isilaeli enikibina bona'i hiti sipi mono bo Kaiyafasihi nonugu li nupa hite mine'ahana. 4Enali Yesuhi fibe bataga hube hi etelete yato lite ho fililana kaga lube kehelibe hite mine'ahana. 5Ya hu'ehina ya'mana suhi asaga bona'i li nupa hite nose'na nete minelata kanalo ya mehilune. Ya hiluta asaga boana'magi luba li huto hilana'mu yabe lite sumi ka li'ahana.
Maliau tu mesebe Yesuhi lataha'agu heki eto'ehina
Mk 14:3-9; Yn 12:1-8
6Betani hepato Simoniu ai koyapa'i lepolosi hepuhi lo'ehina bomofihi nonuga Yesu mino'ehina. 7Ya higo a'i moneuba efaha konugu tu mesebe mina'a tito nina mesebe liloto Yesu hitalo nose'na noto nohinalo oloto ana tu mesebe Yesuhi lataha'agu heki su ho'ehina. 8Ya higo enali Yesuhi koko pana'amagi anana be gelete enitaluga logo bigo ipakafa helete ma lite li'ahana: Sipi mina'a tito nina mesebe henabe luto heki hapotili nohibe? 9To ya'mana tu mesebe bo mone'mofihi emutita sipi mina'a tito lilototi enumuhi menina bona'i guna ito eputita'mu yabe. 10Ya lite nelago Yesu kaga'animofihi bu go fulu tito enogoloto ma luto lu epi'ehina: Lenali henabe lite ma a'mofihi ekesagu hina kaga nelabe? Ai hetofa suhi nani keheli bati hu etona suhi nohu netabe. 11Lenali asaga yupahi enumuhi menina bona'i hiti minalana'mu yabe. Ya hu'ehina naniya lenali hiti minoba minoba mehiluna'mu yabe. 12Ma a'uba ma tu mesebe lataha'nigu heki neto'ehinaya kene keligu bilunamofihi nele'mo loloba nohibe. 13Nani ma'naka luto lu nolepube, asaga noto noto kapoga ma a'uba li huto hinanamofihi hetofa kaga'a lu yege halabe, ya hilete enali enekesa yigi emite ai kumu'i enekesu mehalibe.
Yutasiu Yesuhi fateha'amagihi lenelepilube luto ka molo'ehina
14Ya'mana yupahi Yesuhi koko pana'a 12 nehanaguti Yutasi Isikelioti yabe lite gi nemalana bouba sipi mono nopo kaba bonatoga gutunu ka ma luto buto lu epi'ehina: 15Yesuhi lenelepilunaba lenali henana mina'a nimilanabe? Ya ligo enali kaba bona'magi efahi legeya'a leka selete 30 li nupa hite emi'ahana. 16Ya hilago ya'mana kana'aloti Yutasiu Yesuhi fateha'amagihi enelepilina kana'amu sa sa hu'ehina yabe.
Yesu koko pana'amagi hiti pasa nose'na nalune'mu hi'ahana
Mk 14:12-21; Lk 22:7-14, 21-23; Yn 13:21-30
17Yeye mebise beleti nelata nehana kana'alo yata'a Yesuhi koko pana'a aitoga elete ma lite loka he'ahana: Asaga'na hiya'alo li loloba hu keto'ehinogoti kai Pasa nose'na nalane? 18Ya lago Yesu lu epi'ehina: Lenali hepalugu tiletetini bo mone'mofitoga bilete ma lite lu emilo: Tisau ma luto libe: Nani kana'ni a'o leba notabe. Nani koko pana'ni hiti kai nonugu Pasa nose'na nalube lu'ehibe lilo. 19Yesu ya luto koko pana'a lu epalago enali bite lu'ehina suhi huto hulago Pasa nose'na bagita hite li loloba hi'ahana.
20Ute kana nohigo Yesu koko pana'a 12 hiti hitalo minete nose'na nenete Yesu ma luto lu epi'ehina. 21Nani ma'naka luto lu nolepube. Lenali folagahatiniguti mone bouba nani'i nayato lito fateha'nimagihi enelepilina'mu yabe. 22Ya ligo koko pana'amagi enali enugufagu sibina hu baga igo eniginaga fina bomagi mone'isi mone'isi ho tilete ma lite Yesuhi loka he'ahana: Sipi Bo, nani kumu nolapihe? 23Ya lite lago Yesu ka'ani ma luto lu epi'ehina: Nani hiti lapelugu yaha'atu'i beleti nagami i fulu huto nalina bouba ya hilibe. 24Mono kagu koyapa'i kaga lu yege hose bomagi nani ya'ma Kokulumaguti limi'ohuna Bo fililuna'mu fayahi ge'ahana kaga ninalo nani filinogo'ni pa salina'mu yabe. Ya hu'ehinaya ai nayato lito fateha'nimagi epilina bose. Ke. Ana bo lesa'a gofana lino. Ito'afu ana bo meketatitaya bati huto minatita'mu yabe. 25Yutasiu Yesuhi fateha'amagihi enelepise bouba ma luto lu'ehina: Tisao, nani kumu nolapihe? Ya luto loka hago Yesu lu'ehina: O'yo, kai alu huto nohane.
Yesu yupala nose'na koko pana'amagihi epi'ehina
Mk 14:22-26; Lk 22:15-20; 1 Kol 11:23-25
26Enali nose'na nete nehago Yesu beleti liloto Hu'mamofitoga fokehi hoto nunumu luloto koko pana'a ana beleti li pata sito epila epila nohuto ma luto lu epi'ehina: Lenali lite nalo. Ya'ma nani nugufa'ni ni'ibe. 27To ai bai nagami kohi mone liloto Hu'mamofitoga fokehi hoto nunumu luloto koko pana'a noepito ma luto lu epi'ehina: Lenali asaga'i ma bai nagamiluguti nalo. 28Ya'ma nani golaha'ni ni'ibe. Hu'mau lu mu tifise'na'a golaha'ni huto hu molo'ohube. Asaga boana'magihi foipana'ani li gololo tu epalalibe luto nani nohekube. 29Nani ma'naka luto lu nolepube. Nani mana bai nagami'i menose minomo buto buto'ni Afo'nifihi kokuluma kapo'alo lenali hiti yuhufa bai nagami'i naluta'mu yabe. 30Ya luto lu baga igo enali mono nama mone lilete fegutoga heleko limite Oliba kosagu tite mine'ahana yabe.
Pitaga nani kumu'i bahane halata'mu yabe luto Yesu lu'ehina
Mk 14:27-31; Lk 22:31-34; Yn 13:36-38
31To Yesu ma luto lu epi'ehina: Yatai lenali nani'i he'mi netete koli fele su halana'mu yabe. Monolugu ma lite kaga lu huto huto bouba go'ehina yabe: Sipisipi yaga kaba hu'ehina bo Hu'mau ho filinogo sipisipi yaga'a koli hite tili tele hite fele su halana'mu yabe. 32Ya hu'ehinaya nani fili'ehilunagati aku'i ho tiloto'ni kohe toga Galili kapogu nobiluna'mu yabe. 33Ya luto Yesu noligo Pitau ma luto Yesu lu emi'ehina: Luga'amagi he'mi ketete koli hi su halanaya nani ma'naka he'mi ketoto mebiluna'mu yabe. 34Ya luto ligo Yesu ka'alo lu emi'ehina: Kai ma kaga matuhakagu li molobo. Yatai folugu'i kokole nogo memolo'ehinogo kai loegi monegi yupahi nani'i mekeheli'ohube luto bahane halata'mu yabe. 35Yesu ya luto Pitahi lu emigo Pitau lu'ehina: Nani kai'i bahane meho ketalunaya, kai'i hiti moneka fililu'inamo ni'ibe. Ya luto Pita lulago Yesuhi koko pana'a luga'amagi Pita lina'a hite moneko ka lu baga i'ahana yabe.
Yesu Gesemani foyagu nunumu hu'ehina
Mk 14:32-42; Lk 22:39-46
36Ya huloto Yesu koko pana'a hiti enele'moto hepa'i mone gi'a Gesemani yabe luto ninalo bilete Yesu ma luto koko pana'a lu epi'ehina: Nani meyasilo buto nunumu hilunagi lenali malo nehilo. 37Ya luloto Pitahi yagi to Sepetihi pana'a loe hiti enele'mo mege toto moneka bi'ahana. Ya hite nebago Yesuhi gufa'agu sipi keta besigo ligo pisigigo huloto ginaga gofa fi'ehina. 38Ya huloto ai ma luto lu epi'ehina: Nani fililuna suhi luto nugufagu sipi keta nonebesibe. Lenali malo ho tilete minenogo nani hiti ikaba akaba huto minalune. 39Ya luto luloto ai nesi'asi i gofa hoto buloto okabagati melugu koloto ma luto nunumu hu'ehina: Oho, Afo'niga, kai kekesa yigilata bati hinogomo, ma ekesa nagami'i nalunamofihi kohi li he'mi netobo. Ya hu'ehina kai nani'i nemege'i moloto ka'ni liyafa mehuto, kaika kemehuba hilina suhi hubo.
40Ya luto nunumu luloto koko pana'a nehanaga buto enubu'i kelete nehago bu enogo'ehina. Ya huloto Pitahi lu emi'ehina: Hena'mu nehabe? Ho tite lenubu gili gili hite hupamone kanasilo nani hiti kaba gimi gite meminalana'a hi'ahafihe? 41Lenali kaba hite minete nunumu hilo. Fibe taga hu lepolose'na lenalitoga huto hu lalibe'mu nolube. Komopatinigu ninanauba lenele'mo kosaba kosaba nohinaya ifo lenugufatini amuya'a meni'ibe.
42Ya luloto Yesu i behe huto buto loe yupahi ma luto hu'ehina: Afo'niga. Ma kohi nanitogati i nebe silito mebinogomo nani nalube, ya hinogo'ni kaika kipagu ni'ilina suhi pa salibe. 43Ya luto nunumu lu su holoto i behe huto oto koko pana'a enubulo sipi keta higo enubu'i kelete nehago bu enogo'ehina.
44Yesu aku'i he'mi epololoto i behe huto buto loegi monegi yupahi yata'a lu'ehina nunumu aku'i lu'ehina. 45Ya luto nunumu hu su holoto koko pana'a nehanaga i behe huto oto ma luto lu epi'ehina: Lenali lenubu'i bati'a kelete nehafihe? Lenali kehelilo. Kokulumaguti limi'ehina Bomofihi yato lite bite foipa bomagihi enayanuga bilana kana'a ma'asi huto hilina'mu yabe. 46Lenali ho tilo, abilutagihe. Bu galo, nani'i fateha'nimagi enayanugu li bilina bo ma ahuto hu'ehibe.
Yutasiu Yesuhi fateha'amagihi enayanugu libi'ehina
Mk 14:43-50; Lk 22:47-53; Yn 18:3-12
47Yesu kaga luto nohigo Yutasiu 12 Yesuhi koko pana'a mino'ehinauba Yesu nohinalo neheti'ehina. Ya nohigo babu bona'i mege'i melete yanamagi emita'i yatamana nelite osahi ko nefite bululu hite e'ahana. Ya'mana bona'i enali sipi mono bona'i hiti to soga bona'magi enoho lifigo e'ahana yabe. 48Yutasiu enele'moto ana bona'i yaha babeyafa hu epiloto ma luto lu'ehina: Nani soso hiluna'mu bomoya lenali sa nehana bo nu kiluna'mu yagi lenali bite yato lilo. 49Yutasiu nehetiloto Yesu nohinalo fu luto buto ma luto lu'ehina: Tisao, folugu'i yabe, luto soso hu'ehina. Ya luto luloto Yutasiu Yesuhi nu ki'ehina. 50Ya higo Yesu lu emi'ehina: Nalaluo, lolo hilube luto noata suhi mele'isi li huto hubo. Ya noligo Yesuhi fateha'a bufalo elete yato li'ahana yabe. 51Yesuhi hiti moneka mine'ahana bo moneuba yatama emita'i li saga huloto sipi mono bomofihi koko pana'a inaya koli nopigo i fakala bito ekesa ilaga lu'ehina yabe. 52Ya higo Yesu bu goloto ana bo lu emi'ehina: Yatama emitaka noha'aluga li bibo. Asaga bona'i emitatu'i luba hilata nehana enali ana emita'aniuba laga hu enugufa melenogo fililana'mu yabe. 53Nani Afo'nifihi nehe'malibe luto kehe ilunaya agelo gimi bo 12 tauseni'a be ligito babu lito enoho mefilibe luto kai mekehelipiye? 54Nani ya hilunaya Hu'mau fayanugu go'ehinamofihi mana'a hiya'a huto huto hilinabe? Monolugu ma lite ge'ahana yabe, asaga'na ya'ma suhi luto huto hilina'mu yabe.
55Ana kana'asilo Yesu fateha'amagi ma luto lu epi'ehina: Lenali baukalo bo helata nehana suhi lite nani'i nahalune lite yatama emita'i hiti yatama hoso hiti kefefa hite neafihe? Henabe lutobe? Asaga yupahi nani babu boana'i hiti sipi mono nonugu ka enelepito minolata huna lenali bite nayato meli'ahana yabe. 56Ya hu'ehinaya kaga lu huto huto bomagi mono kagu fayahi ge'ahanalo pa salina'mu yabe.
Ya luto ligo Yesuhi koko pana'a tili tele hite koli fele su he'ahana yabe.
Kanisolemagi enubulo Yesuhi ka foya li ete'ahana
Mk 14:53-65; Lk 22:54-55, 63-71; Yn 18:13-14, 19-24
57Enali Yesuhi yato lina bomagi sipi mono bo Kaiyafasihi nonuga le'mete bi'ahana. Enali keya kaga keheli bati hi'ahana bo hiti to soga bona'i ana nonuga li nupa hite nehanaloga ti'ahana yabe. 58Pitau foto foto huto enemege'i lifito bu'ehina yabe. Ya huloto ai babafi bomofihi noho gegisagu ti'ehina. Analo tito ai hiti gimi bomagi hiti metoga minete nehana. Anana anana Yesuhi li huto hi etalanamofihi hapa hapa'a bu go bati hilube luto yabe. 59Enali sipi mono babafi bona'i hiti to asaga kanisole bomagi bo moneuba Yesuhi faga lu etenogo ho fililana bo'mu sa sa hi'ahana. 60To babu bomagi Yesuhi faga faga li ete'ahana. Ya hana Yesuhi ho fililanamofihi kaga mana'a lu huto mehi'ahana. Alihi loe bole neheti'aha'ina. 61Ya hilete etali ma lite li'aha'ina: Ma bouba ma luto lu'ehina yabe: Hu'mamofihi sipi mono noha'a tele biloto loegi monegi yegegu aku'i gi baga iluna'mu yabe.
62Ya lite la'igo sipi mono bouba ho tiloto Yesuhi loka ho'ehina: Kai'i kaga kifisa nei'inalo nona'a lilata ni'ifihe? Ya'ma kifisa nei'ina kagaloba kai hena hibe luto nokeheline? 63Ya luto loka hago Yesu kaga meluse legeso huto mino'ehina. Ya higo ya'ma sipi mono bouba ma lu emi'ehina: Nani ma'naka luto Hu'ma mehiti bomofihi gi'alo koloka nohonagi kai lu nimibo. Kai Mesiaga Hu'mamofihi Pana'a nohapi fato'ibe? 64Yesu ka'alo nona'a lu'ehina: Kai a'nolane. Ya hu'ehina lenali asaga'i kaga mone lu lepilube. Yatai hiti to aliha'a yupa hiti Kokulumaguti limi'ehina Bouba ifo muya Sipi Boti Hu'mamofihi yahi lamaga'aga minoloto kokulumamofihi sopoha'alo aku alina'mu yabe. 65Yesu ya luto lulago sipi mono bouba kata'a li bolala ito pekene pakunu nohuto lu'ehina: Ai Hu'mamofihi kiya yokolo ka lu eto'ehibe. Lali bona'i luga'a hiti kehe meilune. Ai Hu'mamofihi kiya yokolo ka yatai a'nolu etago lenalitini akeheli baga i'ahabe. 66Lenali henabe lite nekehelibe? Asaga bomagi ma li'ahana: Ai bati mehina kaga lu'ehinago henogoti fililibe lite lu baga i'ahana.
67Ya lilete enali Yesuhi okabagu libi'na nehete osahi emi'ahana. To luga'amagi enayaha osatu bu i polo hi'ahana. 68Ya nehago luga'amagi loka he'ahana: Kuyu'afu nokahabe? Kai Mesiaga nohutomo lu huto hubo.
Pitau Yesuhi bahane ho eto'ehina
Mk 14:66-72; Lk 22:56-62; Yn 18:15-18, 25-27
69Pitau fegutoga noho gegisa foya'aluga mino'ehina yabe. Ya higo sipi mono bo mone'mofihi lili'nalo pa'uba bu goloto lu emi'ehina: Kai hiti Yesu Galili bo hiti mino'ahata yabe. 70Ya ligo Pitau asaga bona'magi enubulo bahane holoto lu'ehina: Kai kaga nolatamofihi nani mekeheli'ohube lu'ehina. 71Ya luto luloto ai fegutoga nohi kasito nohigo kele kele yafa a'i moneuba bu goloto bo luga'amagihi lu epi'ehina: Muya pana'i ai Nasalete bo Yesu hiti moneka mine'aha'ina bo yabe. 72Ya ligo Pitau aku'i bahane holoto ma luto lu'ehina: Nani ma'naka luto mekeheli eto'ohuna bo'mu nelabe. 73Nesi kanasi minoto bo mone'a analo minanamagi Pitatoga ete ma lite li'ahana: Ma'naka luto Galili bona nagaluguti nohane. Kai nogokauba huto'i noago nokehelune. 74Ya lite lago Pitau lusi amuya mololoto bahane hoto lu'ehina: Faga nolinogo'nimo Hu'mau naga'i nimilibe. Nani ma'naka luto ana bo mekeheli'ohuna bo'mu nelabe. Ya luto noligo ana baga'a hiti kokole nogo molo'ehina. 75Ya higo Pitahi koyapa'i Yesu kaga lu emi'ehina, ekesa hokolo hu'ehina: Kokole nogo memolo'ehinogo loegi monegi yupahi nani'i mekeheli'ohube luto bahane halata'mu yabe. Ya luto lu emi'ehina kaga ekesalo ago fegutoga heleko limito buto ginaga sipi huto yibi hu'ehina yabe.
Currently Selected:
Matiu 26: bef
Označeno
Share
Copy
Want to have your highlights saved across all your devices? Sign up or sign in
© 1982, Wycliffe Bible Translators, Inc. All rights reserved.