Priljubljene svetopisemske vrstice iz Wɨjalangasakyaꞌ 13

Deli

Yɨ nemɨ daza'na sɨmunya nayaa yawɨraa! A'mwe sɨdu'nakei sai sɨgyaaryare nabaayavɨ ata nayaa dɨhɨla! Daza' yɨ a'mwe kwarɨne ata gɨlyasɨ. Yɨ a'mwe dazarɨne ata gɨlya' yɨ sa' 666.

Yɨ a'mwe Kwaakevakɨ mwaaihata yuyara sɨgyaarya dazarɨ lotuya yɨpɨ'dere. Yɨ gazaizai gamɨre yaya' bukuya gaala mwaalya'nirɨ mida'nikei dazarɨ lotuya yadelyɨ. Bukuya dazi yɨ bukuya Dɨwɨnya Sipɨzipɨyarɨ sɨnnawɨ Gotɨyai Kwaakeva' mwakyaakegaa' tamakɨnɨka sahwarilyɨ.

Yɨ sɨgyaarya ayahidaasai “Sara jɨla!” kadɨwa' yɨ pwara a'mwe yuyaraavɨ “Aangasɨrɨ midaakajɨ. Yamevɨ midaakajɨ.” deva “Sɨgyaaryarera daaka!” ja'ne baave pɨrɨ' pɨkarya yavɨkaridɨvɨsa'. Yɨ a'mwe maalɨkeraavɨjɨ a'mwe yaya' kɨnɨnnakeraavɨjɨ kwaraavɨ, yɨ a'mwe nɨgwɨnakeraavɨjɨ a'mwe gɨlyɨvɨ'maayaraavɨjɨ kwaraavɨ, yɨ a'mwe kumɨrenna yadɨvɨsaraavɨjɨ a'mwe yaasɨwa'wawɨnyaraavɨjɨ kwaraavɨ, yɨ yuya sareraavɨ baave pɨrɨ' pɨkarya yavɨkaridɨvɨsasɨ. Sarevɨ yɨ nabaai “Kɨmaakɨya dakyɨla!” kadɨwaa' a'mwei baave daza' kunei sɨgyaarya dazarɨne yaya' pɨrɨ', gamɨnne yayavɨne ata gɨlya kɨrɨ' yɨ sai gɨlyɨvɨsa a'mweraavɨ mubathei mɨ'. Yɨ sahwara gamɨnyɨ mubɨpɨ'dei mɨ'.

A'mwe kwai kalavuzavɨna wɨya'nei Kalavuzavɨna nayaa wɨna yana! A'mwe kwai kwaari'masɨramɨnyavɨ balya'nei Kwaari'masɨramɨnyavɨ nayaa balɨna yadelyɨ. Nabaai sasare dazabwi yɨma'naja' yɨ Gotɨyare a'mwe tewaanyara sahwara dɨragɨnna daavapɨjɨ Gotɨyarɨ gamɨre dɨragɨnyasɨ kuna dɨragɨnna lɨmwagapɨka!

Yɨ nɨmɨ tɨnna wanganna yadaazɨ sɨgyaarya pwai saalaalyavɨdaa'nyɨ yɨma'naabɨna. Sai mɨnyagɨzaanya atɨraalya kɨnɨnnakei yaka nabaai mɨnyagɨnya ata purɨdaa'nyɨ pwaraalyajɨyai. Yɨ gamɨre mɨnyagɨzaanyangɨ kingɨmwaaihɨ'nya atɨraalya warɨna. Yɨ gamɨre mɨnyagɨnyangɨ yaya pɨnɨ warɨna. Yɨ yaya dazangɨre aaya kaavɨlya' yɨ sa' dare'na “Gotɨyarɨne yagaaibɨraizɨka dala pɨnɨnna pɨnɨnnanya.”

Yɨ Gotɨyai dazarɨ wanganakɨna yadaa'nyɨ yɨ sai Gotɨyare a'mwe tewaanyarajɨ malya' ye'mwannabwa'manɨ'. Yɨ sara yada malya' wavɨla'da yɨ saraavɨ walamarakadere. Yɨ sai dɨragɨnya yɨnɨga wi'nanya' maaraka sai kingɨyai yɨta gazavaasavaakɨyaraavɨnajɨ yɨ kɨlaaka nabinabinyajɨyaraavɨnajɨ yɨ yagaala ge gejɨyaraavɨnajɨ yɨ ajɨmya yuyangɨya gazasavɨyaraavɨnajɨ kingɨyai mwaalɨna.

Sai sɨgyaarya aaya mudɨkere tɨnnyarɨ atɨka maru'narya'ne dala nabinabinya yɨvanɨkelyɨ. Yɨ sasare dazabwi sai a'mwe Kwaakevakɨyaraavɨ kwaasɨ yɨjɨwaaidevulyɨ. Sai Kwaakevakɨya a'mweraavɨ dara wɨdada “Sɨgyaaryarɨ' a'mwa'mwe' sarɨne yaya' munyaba makɨlya'ne' nayaa jɨla! Yɨ sɨgyaarya dazai sɨnnawɨ kɨgaa' kwaari'masɨramɨnya' dawakakei sarɨ, kɨrɨ' sai gaala ayɨna mwaalɨ'. Yɨ sarerɨ lotuya kuna nayaa jɨla!” Yɨ Gotɨyai sarɨ wanganakɨna yadaa'nyɨ yɨ sai sɨgyaarya pware a'mwa'mwevɨna sɨmudɨnya' wɨjaavanɨ'. Yɨ a'mwa'mwe daza' yagaala ja'na wɨjaavɨna. Yɨ nabaai a'mwe pwara sɨgyaarya sare a'mwa'mwe dazavɨna lotuya mi kyapɨjɨ yɨ a'mwa'mwe sa' saraavɨna dɨna “Sareraavɨ yarai dɨramakyɨla!” yɨ sara ya'na sɨmudɨnya' wɨjaavɨna.

Sɨgyaarya dazai nɨmɨ tɨnna wangamwei yɨ sai lepaatɨyaibɨsai yɨ gamɨre sɨvɨlya' beyare sɨvɨlya'bɨsasɨya' yɨ gamɨre maange' kavɨjɨlɨkeibɨta laayonɨyare maange'bɨsa'. Yɨ kabaraawarya dazai sɨgyaaryarɨna gamɨre dɨragɨnya' wɨjaavɨna. Sarɨ dahɨlakɨna yaka sarɨ sarei kingɨya mwaalɨna ya'na gamɨ saibɨ'na, yɨ sara yaka sarɨna dɨragɨnya naange' wɨjaavɨna yɨwa'.

Yɨ Gotɨyai sɨgyaarya dazarɨ wanganakɨna yadaa'nyɨ jaka naanga yaasɨwa' dɨna yada yamarivanɨ'. Yɨ sara yada Gotɨyarɨ yagaaibɨraizɨka yɨvanɨ'. Yɨ sai dɨragɨnya kɨnɨnnakei maremwaala sasare sabwi ya'ne yɨnɨga wi'na lawe a'mwe pwaraare atɨzɨvɨlɨraai yaka pɨrɨwaalyangɨ (42). Sai dare'bɨ' dɨna “Yuyaraavɨjɨ yuyaburaavɨjɨ wavɨla'dɨnyainyɨ nɨmɨ.”

Sɨgyaaryare mɨnyagɨnya pɨrɨ' yɨ mena davaka baimwanɨke'bɨsa'. Kɨrɨ' mɨnyagɨnya dazavɨya wa'waaya' sa' yaalɨka yɨnnɨke' yaka ayɨna tewaanya yɨma'nyɨna yɨnɨkerɨnera. Yɨ a'mwe yuyara sɨgyaarya dazarɨna lɨka yɨwainɨgulɨna yadɨvɨ' sarɨ mɨdɨnna.

Yɨ sɨgyaarya pwai kwaakevɨ kusawɨ dɨkaavaka munyaba yidavadaa'nyɨ yɨ sarɨ nɨmɨ tɨnna wanganna. Sai mɨnyagɨzaanya pɨrɨwaai kɨnɨnnakei mɨnyagɨzaanya sipɨzipɨdɨwɨnyare'bɨsawaalyɨyai. Yɨ kabaraawaryai yagaala dadevaaibɨ' dadei. Ayahidaasa sɨgyaarya dazai yɨ sai dɨragɨnya yuya' maremwaala sɨgyaarya aaya mudɨkere' maaraka yɨ sai aaya mudɨkere sɨnnyɨkɨ dɨragɨnya dazasɨ wawɨnya yadei. Sai wawɨnya dɨragɨnna yade'na sɨgyaarya aaya mudɨ'nanya dazarɨna Kwaakevakɨjɨ sahɨba mwaaihata saraavɨ sara lotuya yadɨvɨsa'nanyɨ. Sɨnnawɨ kɨgaa' wa'waaya kayaa'nanya' sahwarɨ yɨnahu tamakya'ne' sa' mena yaalɨka yɨlakerɨ. Yɨ sahwarɨna dɨragɨnna yada Kwaakevakɨyara yɨlaaya yɨna yadɨvɨsalyɨ.