Priljubljene svetopisemske vrstice iz Wɨjalangasakyaꞌ 12

Deli

Neya'mwera Sipɨzipɨya Dɨwɨnyare tawevɨna malya' wavɨla'mwaa'. Sahwara gamɨre yagaalya' wɨjalɨkurakevevɨ malya' wavɨla'mwaa'. Kwaakevakɨ nawɨ'nya mwaalya'na sɨmunya kwalaalya myawɨriwaa'. Aawa. ‘Yɨkamaangera neramakɨpɨka!’ deva baihana'na yɨwaasare. Sasare dazaburɨ malya' wavɨlaveva yɨkamaangerɨ marasɨ'nɨwaasare.

Yɨ Sɨgunyavɨ maangwɨraaya pɨrɨ' jaka dɨragɨnna kadɨwa' nɨmɨ kadɨka wɨ'nɨwa. Yɨ dara dɨna “Aawi! Dahaa' nemɨre Gotɨyai yuna nevadaihasamaa'mwa'. Yɨ ku'maayabanna gannya dɨragɨnya' mena yɨma'naabɨwa'. Yɨ dahaa' sahwai Kingɨyai mena maremwaaimwa'. Gannya Kɨraazɨtɨyai Kingɨya dahɨlakyaakerebwi yuna maa'mwa'. Sare' dare'nesɨ. Dahaa' kewewɨnɨnna mena lɨvaramwaasa'nanyɨ. Neya'mweraavɨ kotɨya marya'ne dazarɨ yuna lɨvaramwaa'. Nyɨlyavɨjɨ sawɨsavɨjɨ nemɨre Gotɨyare tɨnnyarɨ neyɨdaanganaka Sahwai nemɨnyɨ kotɨya kayaa'na dɨragɨnna maryadelyɨ. Kɨrɨ' sasarerɨ dahaa' ejelɨyara nayaa lɨvaramwaasarɨnera. Sara kyɨwaa' sai mena kewɨnɨnna waimwaawɨkerɨnera.

Yɨ Gotɨyare ejelɨyara sahwara kabaraawarya naanga dazarɨ kewɨnɨnna maralɨvaranna yɨwaa'. Yɨ kabaraawarya dazai yɨ wana sɨnnawɨ kɨgaa' kamaalyai kunanyalyɨ. Yɨ “Yuyaraavɨ Kotɨya Maryadela,” wo'nɨkei, yɨ Saataanɨ Yɨkamaangei (Sɨwaakei) wo'nɨkelyɨ. Sai Kwaakevakɨya a'mwe mwaaihata yuyaraavɨ kwaasɨ yagaala wɨdadelyɨ. Maaikelɨjɨ gamɨre ejelɨyarajɨ Kwaakevakɨna kewɨnɨnna maralɨvaranna. Yɨ gannya ejelɨyara kwaraavɨjɨ maralɨvaramwaasara sara salyɨ ye'mwannɨgwalɨna yɨwaa'.

Sarevɨdaa'nyɨ, Sɨgunya'gɨjɨ sahɨba mwaaihasaihɨlyɨ yɨlaaya ji! Kɨrɨ' Kwaakeva'gɨjɨ saalaalya'gɨjɨ kɨrɨmɨnyɨ mwaaihasaraavɨna we'! Taanginya naange' sabanyaai mwaaihasaihi sarɨmɨnyɨ yɨhima'nade'nanyɨ. Sarɨmɨnyawɨnna Yuyaraavɨ Kotɨya Maryadei mena waimwaabɨ'. ‘Yune maalɨkegaa'nanyainyɨ daakajɨ,’ sɨnna tɨke' kɨnɨnnakei Sarɨmɨnyɨ kayaa'nanya dala pɨnɨnna pɨnɨnna ya'nelyɨ.”

Sɨgunyavɨ mala naange' yɨma'naabɨna. Ejelɨya naangei Maaikelɨjɨ gamɨre ejelɨyarajɨ sara kabaraawaryalyɨ mala ye'mwannabwa'nyɨna. Yɨ kabaraawarya dazalyɨ gannya ejelɨyarajɨ yɨ sahwara kumɨre malyangɨ ayahi tɨvɨkɨ'na yɨna.

Sara nɨgu'nyɨna kyɨwa' a'mwe' yuna lɨkaanya kyɨwa' yɨ kabaraawarya dazai a'mwe dazavɨna sɨmɨlɨka wɨlɨna wiwa'. Yɨ sai “Sahɨrɨvɨre kaimɨraaya pwarajɨ malya' mala yɨnaana!” daka kaanya wɨwa'. Kaimɨraaya dazara Gotɨyare kɨwɨnya mɨdɨdɨvɨ' yɨ sahwara Jizaazarɨna jalɨkurakadɨvɨsara mwaaihasare.

Yɨ sɨgunyavɨ yɨbwarɨdaakwia naanga pɨrɨ' yɨma'nyɨna. Sa' da'dare'. A'mwe pɨrɨ' mwaalɨna. Yɨ sa' nyɨlyai gamɨre kɨlaakejɨkɨ baazɨ'ma'nɨkesɨ. Yɨ gamɨre sɨvɨlyɨraarɨ kwaaka dalaangewɨ lawei mwaalɨna. Yɨ gamɨre mɨnyagɨnyavɨ sɨlɨngaamɨnya atɨraai sɨvɨlyɨrɨdaa'nyɨ pwaraalya kingɨmwaaihɨ'nyangɨ. Sa' kaimɨraavɨmunya kɨnɨnnake' yɨ kaimɨraaya maarya'ne daange' savɨ yɨma'nyɨna yɨwa'. Yɨ daanga daza' yɨ wana kayaa'nanya'. Yɨ sara wiadaa'nyɨ yɨ sa' kaimɨraaya maarya'negaa'ne jaka dɨragɨnna dɨna.

Kuna yemwaaina yadaa'nyɨ yɨ a'mwe' gawaalɨvaangei kaimɨraaya kwalyai maarɨna. Kaimɨraaya dazai dɨvidaa'nyɨ yɨta aayɨnɨyarɨ' lɨmwagozɨ yɨ sasɨ ajɨmya yuyangɨya yuyaraavɨ dɨragɨnna maremwaaladelyɨ. Yɨ a'mwe' kaimɨraayai mena maarɨna kyɨwa' yɨ Gotɨyai kaimɨraayarɨ munyabanna yarai yɨpalamakɨlaawɨna yɨwakelyɨ. Kabaraawaryai “Maranɨma!” daka yɨwakelyɨ. Yɨpalamakɨlaawɨna yaka gannya kingɨnamwaalyɨsavɨna makɨlaawɨna kyɨwa' kabaraawaryai maranɨwakei mɨ'. Mamaranyɨ kyɨwa' yɨ a'mwe daza' a'mwamaaya kunyɨmagɨnna lɨkaanya wɨna. Dazɨmagɨ Gotɨyai gamɨnnebanya' mena yovɨrawakɨnɨkeba. A'mwe savɨ yɨnɨga wi'na 1,260 yɨrɨkerɨkaavɨ maremwaaidɨvɨ' wapaajɨ wɨjaaya'nesɨ.

Kuna jaka dɨna yadaa'nyɨ sɨgunyavɨ yɨbwarɨdaakwia pɨrɨ' yɨma'nyɨna. Daza' yɨ dare'. Yɨthaanyi! Kabaraawaryaibɨta naanga pwai mwaalɨna. Sai wayaaka yaka yɨ mɨnyagɨnya ata purɨdaa'nyɨ pwaraalya kɨnɨnnakei yɨ mɨnyagɨzaanya atɨraalyajɨyai. Yɨ gamɨre mɨnyagɨnyangɨ kingɨmwaaihɨ'nya ata purɨdaa'nyɨ pwaraalya warɨna. Yɨ gamɨre suyai sɨgunyavɨya sɨlɨngaamɨnya pɨvaa' wana pada'galabwakɨ'na yasaabɨna yaka kwaakevakɨna maralɨvaramaabɨna. Yɨ sɨlɨngaamɨnya pimagɨnyaala savaa'na sɨgunyavɨ kuna warɨna. Yɨ kabaraawarya dazai a'mwe maarya'ne dazavɨre sɨdalikɨ daavɨna, “Kaimɨraayarɨ maarɨma!” dada yadaa'nyɨ. Yɨ sahwai “A'mwe kaimɨraayarɨ mena kamaarojɨya,” daka “Sagaasagaa' kaimɨraaya dazai tɨka maranɨde'na!” daka yemwaaina.

Mɨjamakuna yadaa'nyɨ a'mwe dazavɨna bwaangya kware pɨya pɨrɨwaai wɨjaavɨna kyɨwa' yɨ sa' a'mwamaaya kunyɨmagɨnna yɨnɨga pɨlakwonnesɨ. Yɨ sa' Kamaala naangerɨ lɨke'na menyabanna mwaalya'ne' pɨlakwonnesɨ. Yɨ nabaai sahɨba kwarame dawaai da' yojɨ yɨ kwarame pimagɨnyasɨ kuna yɨwawojɨ wapaaya pada'galamaremwaaladelyɨ. A'mwe' lɨkaanya kuna wodaa'nyɨ yɨ Kamaala dazai gamɨre maangevɨdaa'nyɨ aalya' kwadaaka mudaasɨya'. Aalya daza' yɨ aalyaaka naange' yada yɨ a'mwe' mɨjamakuna. Kamaalyai dara yawɨ'da “Aalyaake' a'mwe savɨ maramɨlojɨ saba yɨwɨna yana!” sara yɨna yɨwake'nanyɨ. Aalyaaka naange' a'mwe daza' mɨjamakuna yadaa'nyɨ Kwaakeva' a'mwevɨ gaimwanna. Kwaakeva' maanga taavɨna yada aalya daza' Kamaalyai gamɨre maangevɨdaa'nyɨ kwadaaka mudakade' nɨgu'nyɨna. A'mwe' mamihaasa'na nɨgu'nyɨna.