Priljubljene svetopisemske vrstice iz Hebräa 11

Deli

De Gloowen es de Jewesheit, daut wie daut kjrieen woaren, opp waut wie hopen, un es een nich twiewlen aun daut, waut wie nich seenen. Derch disen Gloowen haben de Väavodasch een goodet Zeichnis von Gott jekjräajen.

Oba onen Gloowen es daut ommäajlich, Gott to jefaulen. Wäa no Gott komen well, mott jleewen, daut hee es, un daut hee dee beloont, dee am iernstlich sieekjen.

Derch dän Gloowen kjenn wie daut weeten, daut Gott de gaunze Welt derch sien Wuat jemoakt haft, soo daut aules waut nu to seenen es, von nuscht jemoakt es.

Derch dän Gloowen wia Abraham jehuarsom aus hee jeroopt wort, en een Launt nenn to trakjen, daut hee nohäa oawen sull. Hee trock loos onen to weeten, wua hee han sull. Derch dän Gloowen wond hee aus een framda en daut Launt, daut Gott am vesproaken haud. Hee wond en Zelten soo aus uk Isaak un Jakob, dän daut Oafgoot uk vesproaken wia.

Derch dän Gloowen acht Noah doaropp waut Gott säd, un bud daut Schepp, om siene Famielje to raden. Gott räd to am äwa Sachen, wuavon noch nuscht to seenen wia. Derch dän Gloowen jeef hee de Welt äa Uadeel un oawd de Jerajchtichkjeit, dee derch dän Gloowen kjemt.

Derch dän Gloowen wort Henoch vonne Ieed wajch jenomen, daut hee nich dän Doot sach. Un hee wort nich mea jefungen, wiels Gott am wajch jenomen haud. Ea hee wajch jenomen wort, haud hee daut Zeichnis, daut Gott aun am Jefaulen haud.

Derch dän Gloowen opfad Abel Gott een bätret Opfa aus Kain. Gott aunerkjand sien Opfa un jeef am daut Tieekjen, daut hee jerajcht wia. Un derch dän Gloowen rät Abel noch, wan hee uk aul doot es.

Derch dän Gloowen kjrieech Sara Krauft, Mutta to woaren, aus see uk aul too oolt doatoo wia. See sach dän fa tru aun, dee daut vesproaken haud.

Hee luad opp eene Staut met fausten Grunt, dee Gott selfst plonen un buen wudd.

Derch dän Gloowen wull Moses, aus hee ieescht oppjewossen wia, nich mea aus een Sän von de ägiptische Kjennichs Dochta jellen. Hee wäld sikj, leewa met Gott sien Volkj toop to lieden, aus sikj noch een stootje aun de Sind to erjazen. Hee hilt daut lieden fa Christus aus eenen jratren Rikjtum aus aulet ägiptische Goot, wiels hee sach waut de Beloonunk sennen wudd. Derch dän Gloowen veleet hee Ägipten un fercht nich dän Oaja vom Kjennich. Hee hilt sikj aun dän, dän hee nich sach, soo aus wan hee am sach.

Derch dän Gloowen opfad Abraham dän Isaak, aus hee opp de Proow jestalt wort. Hee, dee de Vespräakjungen jekjräajen haud, wia reed, sienen eensjen Sän to opfren.

Derch dän Gloowen wort de Hua Rahab nich met de onjehuarsome toop omjebrocht, wiels see de Spionen frintlich oppjenomen haud.

Derch dän Gloowen jinjen de Israeliten derch daut Roode Mäa aus äwa drieejet Launt, waut de Ägipta uk vesochten, oba vedrunken.

Derch dän Gloowen foll de Mia om Jericho om, aus see doa säwen Doag romjegonen wieren.

Derch dän Gloowen hilt hee daut Passa un daut bestrikjen von de Däaren met Bloot, doamet de Doodesenjel de ieeschtjebuarne en Israel nich ombrocht.

Derch dän Gloowen räd Josef aus hee storf doavon, daut de Israeliten noch emol wudden ut Ägipten rut trakjen, un säd waut see dan met sienen Kjarpa doonen sullen.

Derch dän Gloowen säajend Jakob, aus hee aum stoawen wia, Josef siene beid Säns, un bäd Gott aun aus hee sikj opp dän Gonstock länd.

Derch dän Gloowen säajend Isaak dän Jakob un Esau un räakjend doamet, daut de Tookunft daut soo brinjen wudd.