Priljubljene svetopisemske vrstice iz Tio 10

Deli

Pet abʼivaq etileʼ. Tan toq intxhaq bʼen ex xoʼl inqʼa xaol, ex inqʼa bʼaʼnil nik etxhokeʼ, atz bʼaʼnil iqʼomal etaʼn, eche karneʼl uvaʼ yeʼxhkam txhiʼtxhoil iqʼomal taʼn. Pet laʼetz opoon vet ex xoʼl inqʼa xaol, tul at xaol uvaʼ toq kʼaxbʼisan ex. Tan echaq tatin, eche xoʼ uvaʼ tzaoq kuxh txhibʼ s-vatz. Pet aʼ laʼ ebʼana uvaʼ laʼ exee etibʼ, eche kan uvaʼ nal kuxh nik itzʼeq tibʼ. Pet aʼ kuxh laʼ ebʼan tiʼ talax viyolbʼal quBʼaal Tiuxh uvaʼ yeʼxhabʼil laʼ ekʼaxbʼisa, eche invaʼq txoo u paraamuxh uvaʼ yeʼ laʼ kʼulelani.

Tan jabʼil uvaʼ yeʼ laʼ tal vet tibʼ s-niman vetz tiʼ kuxh uvaʼ laʼ ikol u qʼij isaq tzitza vatz u txʼavaʼ, tul aʼetz uvaʼe, laʼ tzʼeqon u qʼij isaq tu amlikaʼ. Pet jabʼil uvaʼ laʼ tal tibʼ s-niman vetz, tul kʼuxh aʼ laʼ itzʼeq u qʼij isaq tzitza vatz u txʼavaʼ, tan aʼetz uvaʼe, at qʼij isaq tu amlikaʼ laʼ ibʼana.

Yeʼletz ex laʼ xoʼv ex, kʼuxh laʼ iyatzʼeʼl ex u xaol, tan yeʼl paqul laʼ oleʼv tiʼ iyatzʼax el vetaanxelal. Pet aʼ laʼ xoʼvik ex te u quBʼaal Tiuxh uvaʼ at tiqleʼm tiʼ iyatzʼax el vetaanxelal tuchʼ vetxhiʼoʼl, tul laʼ taqʼ bʼen tu xamal.

Tan jabʼil uvaʼ yeʼ laʼ txʼolon ipal t-inqʼa kʼaxkʼo, kʼuxh tetxhal ijaʼ vatz kurus tiʼ itxhʼuyeʼv s-viʼ, atz tiʼ innimaleʼ, tul aʼetz uvaʼe, jit ikʼulel laʼ alax s-niman vetz taʼn quBʼaal Tiuxh.

Tul yeʼl ex laʼ xoʼv ex tiʼ etalt etibʼ s-niman vetz. Tan oq yeʼ laʼ xoʼv ex, tul echatetz kuxh laʼ valt exe s-niman vetz vatz vinBʼaal uvaʼ tu amlikaʼ. Pet oqetz aʼ laʼ etal vet vatz inqʼa xaol uvaʼ jit vet ex niman vetz, tul echatetz kuxh laʼ vale vatz vinBʼaal tu amlikaʼ, uvaʼ yeʼ vootzaql ex.

Tul bʼen ebʼan bʼaʼn kaqaayil inqʼa yaabʼ, kʼuxh inqʼa qʼajchil nik ibʼan vitxhiʼoʼl t-yaabʼil. Atz bʼen etitzʼeʼvsa inqʼa kamnaʼq. Atz bʼen etuki el inqʼa demoonio t-taanima inqʼa xaol. Poro oy kuxh bʼen ebʼanvat inqʼa xaol bʼaʼn, tan oy kuxh qat taqʼvat quBʼaal Tiuxh u bʼaʼnil sete.

Echetz yeʼl ex laʼ xoʼv ex te kam inqʼa laʼ ulbʼel ex. Tan sibʼ etiqleʼm vatz quBʼaal Tiuxh viʼ inqʼa talaq tzʼichin.

Tul yeʼ etitzʼa uvaʼ bʼaʼnil ul voksa xoʼl inqʼa xaol tzitza vatz u txʼavaʼ, tiʼ ul valt inqʼa bʼaʼnla txhaq yol. Pet aʼl toq tok ixoʼl inqʼa xaol s-vatzaq, tetxhal laʼ nal alax iyatzʼaxaq el inqʼa niman vetz, poro s-viʼ kuxhtuʼ.