Priljubljene svetopisemske vrstice iz Loma 6

Deli

Fa'ina dewa koyona fatana alika. Atu Yaubada yana abahawahega ma yawai-vagata, higa omi Yesu Keliso buye wave'atutamo'aimi-yo yawai-vagahimi givelemi.

Wa'ita, kaliva tufoidi Yaubada yana vehimeya ana idibumuhiga againe yadi yegayega hilelelena. Mena vehimeyai-nadi Mosese awane gilakayemu. Tu omi keke Mosese yana vehimeya dibune wadamiyami. Au yami yegayega Keliso ana vetumagana againe ahe wavaina be yana leme againe koyona wavenivenikohiyena fa'ina, Yaubada yana nuwadoga ana abavehimeya againe wamimiyami. Yaubada yana nuwadoga againe wamimiyami fa'ina, nuwanuwa koyona keke-mo'a ginavehimeyemi.

Au Keliso gi'alika be hitauna amine, meda ide yada bafitaiso againe gufeya katowa kagahe kagayo, “Adamoya ide Yesu buye ka'alika be ide wayawaida tuwaina kamiyami-ma kalivai-dana hitauda.” Hidede amine ka'alika be higa Tamada yana faiwala kikaiwabuna againe Keliso alikeya gisivemididina amine, meda ide ginasivemididida-yo wayawaida ivaguna kanamiyami.

Keke wowomi talaina koyona againe wanahawahegeni vaita Setani talaimi ginavegiyoyeni be higa nuwanuwa koyona ginafaiwala. Au omi vaita alikeya wadamididi-havagi be wayawaimi ivaguna wadamiyami-ma kalivai-mina taumiyao Yaubada againe wanahawahegemi, kadu talaimi wanahawahegena be vaita Yaubada talaimi ginavegiyoyena be higa nuwanuwa tunutunugina ginafaiwala-mo'a.

Ide kahalamanena Yesu keloseya hitutuvefosena ana toveya, kadu ide tuwaina yada nuwanuwa koyona againe kamiyami-ma kalivai-dana keloseya ka'alika be higa Yaubada dibuda huluva koyona nuwanuwana-ma ana faiwala ginadabana. E, dibuda koyona ana faiwala gidabana be higa koyona aimo keke ginavehimeyeda-yo koyona ana ve'agetogeya kanamiyami.

Meda anafaiweya omi taumiyao wananuwenuwemi vaita Yesu Keliso buye wave'atutamo'aimi fa'ina, ahe wa'alika be Keliso koyona ana laufata givaini-yo yami miyami dewa koyona againe gihavaina. E, wananuwenuwemi vaita ahe wa'alika tu wayawaimi ivaguna wamimiyami be Yaubada againe wahawahege-vagahimi.

Hida kagahe vaita Yaubada yana nuwadoga kaliva yada koyona gifaiwalahegena. Gavaiyami? Ka'i gilubodana be yada huluva koyona kananunauwena be higa Yaubada yana nuwadoga ginafaiwala-mo'a? Keke, keke-mo'a! Kaliva gi'alika againe yana miya babiya gihavaina amine, meda ide ka'alika be yada miyami dewa koyona againe gihavaina. Ahe ka'alika be koyona ana abavehimeya agaideya gihavaina fa'ina, keke-mo'a gidalubodada be huluva koyona againe kanamiyami.

Wa'ita, ka'i tamo kaliva lakahina againe wanahawahegemi be vaita agetoga amine bonana wana'abina, au omi bana bonana wa'abi'abina-ma kalivai-nadi againe wave'agetoga. Meda ka'i dewa koyona againe wanahawahegemi, au koyona againe wave'agetoga be koyona guwana higa alika wananuhagana. O ka'i Yaubada ana dibumuhiga againe wanahawahegemi, au Yaubada againe wave'agetoga be yami yegayega Bana matane wananuhagana. Mena ve'agetoga ana dewa higa vaita hakwadi bonana wa'abina, ka'i koyona o ka'i Yaubada, medema againe wave'agetoga ma ma'i wanuwenuwena o ka'i keke?

Atu Yaubada againe gavesiule fa'ina tuwaina koyona againe wave'agetoga tu tova adamoya vehawala ana ita nuwanuwa velemo'ena amine Keliso yana kaliva hihawavelevelemi-ma yami wa'asehawahega wadibumuhigena. E, Yaubada yami ve'agetoga koyona againe gidabana tu dewa tunutunugina againe wave'agetoga.