Priljubljene svetopisemske vrstice iz Loma 1

Deli

Mena Venuwa'ata Yamumuna keke gada'iwowomumuyeni. Venuwa'ata Yamumuna keke gaitoma kowakowana. Au Yaubada yana Venuwa'ata Yamumuna againe yana faiwala-mo'a giseyemaunena, higa gaveyao moya'aidi Bana againe hivetumagana, medema yadi koyona agaidiya gikibababaledi. Nagona ide miYuda Venuwa'ata Yamumuna kamidinogalina tu muliya omi keke miYuda tu yo'o tulimiyao kalivai-mina wanogalina.

Venuwa'ata Yamumuna gihawavemogatala gavaiya'amine Yaubada ginaseda yegayegadeyao Bana matane. Yada yegayega hidede amine. Yesu Keliso againe kavetumagana fa'ina, ide tokoyona nonogana Yaubada ide fa'ideya gigahe gigayo, “Badi kaliva yegayegadiyao.” Ada ka'i vetumagana againe kanamiyami inubane be gina ana abalauyabu, au ide yegayegadeyao Yaubada matane kanamiyami. Meda tuwaina Yaubada Veyao Tuwaina ana bukiya yada yegayega inubana fa'ina gigahe gigayo, Hai kaliva vetumagana againe gimimiyami fa'ina bana yegayegana Yaubada matane, medema wayawaina velemo'ena ginamiyami.

Wa'ita, gavadi Yaubada fa'ine adifaiweya hinahalamanena medema keke gidasevauyeni, au gi'ivemogatalina. Gavaiya'amine gi'ivemogatalini? Me yana aibubuna againe. Boi tuwai-lokalokana Yaubada babi gibubuna ana toveya be ginunauwena tova hidevama Bana inubana kadu yana faiwala miyamiya-vagahina kabu'avane gidadauda be kaliva hi'itahalamanena. Keke matadiya Yaubada hida'itani tu yana aibubuna againe Bana'e velemo'ena gimiyamiya-vagata Yaubada kadu yana faiwala au miyamiya-vagahina ma hi'itahalamanena. Yaubada ana ita'ita yana aibubuna againe hi'itahalamanena fa'ina, keke adifaiweya hinagahe hinagayo, “Ime fanifanimeyao fa'ina, akoyo.” Taumadi Yaubada ana halamana au adifaiweya, tu Bana inubana keke hidanuwenuweni fa'ina givematahiwadiyedi.

Yadi koyona hidede amine. Badi kaliva koyodiyao Yaubada hihalamanena nonogana, keke Bana againe hidavesivesiule kadu ana egana keke hidakikilakahini hidagagayo, “O velemona Yaubada.” Au yadi nuwanuwa give'iyohoyoho kadu nuwadi gifani, e gi'uyuyu-mo'a.

Yaubada velemo'ena ma hikilowena tu gaitoma i'ibubunidi agaidiya hihawahegedi be hihawadavadavadi. Bana adi To'aibubuna keke hidanuwenuweni, Bana ana egana ma gilubodada be kanakikilakahina tova inaga inaga keke ana abalauyabu. Ehe hidedemi.

Tu Yaubada lobameya gimimiyami-ma yana ila'a tomiyababi koyodiyao agaidiya ahe gi'ivemogatalina. Yana ivemogatala hidede amine. Tomiyababi Yaubada hivekwaulaugena be koyona moya'aina hififaisewana fa'ina, yana ila'a guwana higa adi matahiwadi hinanuhagana. Yadi dewa koyona againe Yaubada yana nuwanuwa velemo'ena hive'alatagona.

Tu mena gaitoma-kawowodi agaidiya hihawahawahegedi fa'ina, Yaubada yadi nuwanuwa aya'ayafanina wowowomumuna agaidiya gihegedi. Higa yadi vevine keke kaliva agaidiya hida'ayafana Yaubada adi ayauna giveledi amine. Au vevine mali vevine hi'aya'ayafanedi be hivemavemai. Meda anafaiweya kaliva keke nuwanuwadi vevine buye hinadauda Yaubada adi ayauna giveledi amine. Au mali kaliva agaidiya matadi giludigadigaga-mo'a be dewa wowowomumuna buye hififaisewana. Medede amine hivetuvetubo fa'ina, adi matahiwadi mena dewa koyo-mo'ena gilubodana-ma amine wowodiya hinunuhagana. Kadu'e hinuwanuwa vaita Yaubada ana halamana gaitoma-kawowo yo hivekwaulaugena fa'ina, Yaubada nuwadi uyu'uyuyuna againe gihegedi-yo dewa keke gidalubodadi-ma hihuluhuluvina.

Higahegahe higa vaita badi nuwanuwahuyadiyao tu tagadi gikulu. Yaubada Tomiya-vagata ana hawadavadava hidibutoyogena kadu yana kaiwabu hagihagi-mo'ena hikilowena. Tu ikilukiluma hihawadavadavadi, ikilukilumai-dina adi ita vaita tomiyababi yawaidi keke miyamiya-vagahina amine, kadu vaita manuga amine kadu vaita kevakeva nunudadanidiyao amine kadu kevakeva gayagayagidiyao amine.