CAWA'TA TUNITA 25
25
Mitta vi Abraham
1Abraham sli cat tara lo ya' Ketura. 2Na' vuɗum Zimran, Yoksan Medan, Madiyan, Yisbak hiɗi Suwah. 3Yoksan vuɗ Seba hiɗi Dedan. Gurona vi Dedan nisi si sum sa Asurimna, sa Letusimna, hiɗi sa Lewmimna. 4Gurona vi Madiyan nisi kayni: Efa, Efer, Henok, Abida, hiɗi Eldaa. Nisi kaf kayni si gurona vi Ketura.
5Abraham vul farayna valam kaf mi Isaak. 6Nam vul sle mi gurona vi boy sa sunumna lay. Hay li ma nam ka iri tuwan kayni, nam gisi irsi goy gine'e hiɗi goora valam Isaak, hay nagat ta gal kuɗuwta.
7Busat ma Abraham mus iri hay nagat noŋ pet kayni kis kalam dok-siɗiya yam vasl. 8Abraham sukam kal goyo nam mita. Nam mit hay maarta hiɗi sle'ta, busan liy kalam noŋ li, nisi burum gaa'a jar sumuna valamu. 9Gurona valamu Isaak hiɗi Ismayel pumu, hay zul-hiɗiyn ma hay Makpelana, hay sinena vi Efron, goora vi Cowar ma Hetiyena ɗiger vok Mamre. 10Kayni mi sinena ma Abraham gusum hay ɓam gurona vi Hetiyena. Abraham hiɗi Sara cata valam pisi kayn haya. 11Bugol mitta vi Abraham, Lawn gi bol kay Isaak. Nam musi goboy hiɗi kaata vi Lahay-Roy.
LABARA VI ISMAYEL HIƊI JAFNA VALAMU
Jafna vi Ismayel
12Kayni mi jafna vi Ismayel goora vi Abraham, ma Hagar ta Egiptet vuɗumna: 13Kayni mi semda vi gurona ki Ismayel: Semda visiya kuɗ vu'da visiya visiya: Nebayot ma vuɗ jewna. Kedar, Adbeel, Mibsam; 14Misma, Duma, Masa, 15Hadad, Tema, Yetur, Nafis hiɗi Kedma. 16Kayni mi semda vi gurona vi Ismayel, kuɗ farana visiya hiɗi vokŋa visiya visiya. Nisi doogo yam ma' kayni ay si sa ŋulona vi sumuna visiya. 17Ismayel li busat noŋ kaf kis hiɗi diram dok-ɦidi yam siɗiya. Bugol kayni sukka valam kal goyo nam mita. Nisi burum gaa'a jar sumuna valamu. 18Gurona valamu ziyna visi vunam ay Havila zaw ta-ta Sur, ta ka ɗiger vok Egipte hay ay hagata ta kal Asiriya, ziyna visi cuki goy vok ɓosiyosin kafe.
LABARA VI ISAAK HIƊI JAFNA VALAMU
19Kayni mi jafna vi Isaak goora vi Abraham. 20Abraham vuɗ Isaak. Hay li ma busata vi Isaak co dok-fiɗi cona, nam sli Rebekka, goota vi Betuwel, ma Arameena, ma hay Padan-Aram na'a ti ɓasum Labanta. 21Rebekka ay gediya, Isaak siɗaw Lawn ka'a, Lawn hum siɗawta valamu. Cata valam Rebekka sli haya. 22Guron tun zaw zut tuwsi kalaf haya'a. Na' di'e; la ki kayn nala, nan sli haya kay mige? Na' kaliya kay job Lawna. 23Ma-Vatɗin da'a: Jaf-sumun ma' ka hayagu, sum nisi sa ma' hayag lakŋi, hay li ma nisi kaliyawa goyo, nisi ma ɓuraw goyo. Ma kepna ma li ŋol suw hena, ma ŋolla ma hot gaa kuɗ ma goora.
24Buur ma na' min pukŋ coowa; ɗuw na kayn guro ŋonayn ka haya' ma'. 25Ma kalay goy jew na tuwam slawi, tuwam ŋusu ki sligar-bakŋa nala. Nisi tunum selem ala Esaw. 26Bugolda ɓasulumna Yakub kal ay goyo, dubuk Esaw moki kalam tep', nisi tunum selem ala Yakub. Hay li ma nisi vuɗ kayni, busata vi Isaak coy dok-karkiya.
27Nisi wuliya, Esaw muɗi mi sa ma ci muura, sana vi sinena. May Yakub mi sa ma kiliŋi. Nam mus kayn gaa kuɗ guɗukŋa. 28Isaak min Esaw, kay nam ti sliw muur kuɗumu; may Rebekka minim mi Yakub.
29Yakub kot tin ma ŋaana, Esaw ay goy hay sinen pa, nam makay ŋolo. 30Nam di tam Yakub: Nan siɗawaŋu, naŋ hinan ti kuɗ va ma iram slawn tani kay nan makaya. Kuɗ na'ta kayni nisi vul semda mi Esaw ala Edom. 31Yakub di'e: Naŋ gusan ŋolda vaŋ goy vaydi. 32Esaw di'e: Nan mit ɗawn mitiya, ŋolda nan lum hiɗi na' mi mige? 33Yakub di'e: Naŋ ma yi va kaŋ tuwa. Nam yi va kalamu, gus ŋolda valam goy mi Yakub. 34Yakub vul funa hiɗi naayna ma zalayna mi Esaw. Esaw ti'e ci'e kaw, fok malam kulo cuɓaŋ-cuɓaŋ' kaliya. Ki kayn nala Esaw hin ŋolda valam muɗ kiram bisi.
Aktuálne označené:
CAWA'TA TUNITA 25: Massana
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
BIBALDA TA PELDETTA © L'Alliance Biblique du Cameroun, 2001