मर्कूस 16
16
येशू मरके जिन्दा भओ
(मत्ती. 28:1-8; लूक. 24:1-12; यूह. 20:1-10)
1संझाके जब पबित्र दिन बितिगओ रहए, तओ मरियम मग्दलिनी और छोटो याकूब और योसेफकी अइया मरियम और सलोमी, सुगन्धित मलम खरिदीं ताकी येशूको मरो भओ शरीरमे लगाएके बाके आदर कर सकएं। 2हप्ताको पहिलो दिनमे, सुबेरे दिन निकरतए खिना बे गड्डामे पुग्गइं। 3डगरमे बे आपसमे कहीं, “हमर ताहीं गड्डाको पत्थर कौन हटाएदेबए?”
4पर जब बैयर गुफा घेन देखीं, तओ बे देखीं, कि हुवाँ बडो पत्थर, गुफा भितर घुसन बारो ठाउँसे पहिलीयएसे लुणको रहए। 5जब बैयर गड्डा भितर पुगीं और भितर गइं, तओ बे देखीं, कि एक लोग चमकदार सेतो कुर्ता पैधो भओ बिनके दहिना घेन बैठो रहए और बे डराइ गइं।
6बो लोग बैयरनसे कही, “मत डराबओ, तुम नासरत गाउँको येशूके ढुणत हओ, जौनके क्रूसमे टँगाओ गओ रहए। बा मरे मैसे जिन्दा हुइके उठीगओ हए, बा हियाँ नाए हए। बाके धरो भओ ठिहा देखओ। 7अब जाओ और पत्रुस और बाके चेलनके जा खबर दइके बताओ, येशू तुमसे पहिले गालील परदेशमे जाए रहो हए, और तुम बाके देखैगे, जैसे कि बा पहिलीयए तुमके बताइ रहए।” 8जा सुननके, बे येशूके दफ्नान बारो ठिहासे बाहिर आइं और भागीं, काहेकी बे डरके मारे काँपत रहएं। डगरमे, बे कोइके कछु नाए बताइं काहेकी बे डराइगइ रहएं।
मरियम मगदलीनी येशूके देखी
(मत्ती. 28:9-20; लूक. 24:13-53; यूह. 20:11-23; प्रे. 1:4-11)
9इतबारके सुबेरे, जब येशू मरे मैसे जिन्दा हुइगओ, तओ सबसे पहिले जौन आदमीके बा दिखाइ दइ, बो मरियम मग्दलिनी रहए। जा बहे मरियम हए, जोके येशू एकदाओं सात भुतनको कब्जा मैसे छुटाइ रहए। 10मरियम येशूके चेलनके ठिन गइ और बिनके बताइ, कि का भओ रहए। बे येशूके ताहीं बिलकत रहएं। 11पर मरियम बिनसे कही, “येशू जिन्दा हए, और मए हबए बाके देखो हओं!” तओ बे सोचीं, “जा सच नाए होन सकत हए।”
येशू दुई चेलनके दिखाइ दइ
12बो दिन पिच्छु, येशू अपने दुई चेलनके दिखाइ दइ, जब बे यरूशलेमसे आस-पासके इलाकामे अपने घर जात रहएं। पर बे बाके तुरन्त नाए चिन पाइं, काहेकी बा बहुत दुस्रो हानी दिखात रहए। 13जब बे बाके चिनलैं, तओ दुनौ चेला यरूशलेममे लौटके चलेगए। बे बाके और चेलनके बताइं, कि का भओ रहए, पर बे जामे बिश्वास नाए करीं।
महान आदेश
14जाके पिच्छु, येशू एघार चेलनके फिर दिखाइ पणो, जब बे खानु खानके बैठे रहएं। येशू बिनके डाँटी काहेकी बे आदमीनके गवाहीमे बिश्वास करनके ताहीं बहुत जिद्दी रहएं जौन बाके मरे मैसे जिन्दा होनके पिच्छु देखी रहएं। 15तओ येशू उनसे कही, “संसारमे हर ठिहामे जाओ और सब आदमीनके बीच अच्छो समाचार परचार करओ। 16जो कोइ फिर अच्छो समाचारमे बिश्वास करैगो और एक चिन्हाके रुपमे बप्तिस्मा लेबैगो, बो परमेश्वरसे अपने पापनके ताहीं दण्ड पानसे बचाओ जएहए। पर हरकोइ, जो मोएमे बिश्वास करनसे मनाही करैगो, बो परमेश्वरद्वारा अपन पापके ताहीं दण्ड पाबैगो। 17और जौन आदमी बिश्वास करत हए, बे जे शक्तिशाली चमत्कारके प्रमाणके रुपमे करपामंगे: मिर नाउँमे बे भुतके बाहिर निकारंगे, और मए बिनके नयाँ भाषा मस्कन बारे बनामंगो, 18अगर बे बिष बारे साँपन्के पकडंगे, तहुँफिर साँप बिनके नुक्सान नाए पुगाबैगो। और अगर कुइ बिषालु चीज पिमंगे, तओ जासे बिनके कोइ हानी नाए हुइहए। बे रोगीनके उपर हात धरंगे और बे अच्छे होमंगे।”
येशूके स्वर्गमे उठाए लैगओ
19जब प्रभु येशू चेलनके जे सब बात कहेडारी, तओ परमेश्वर बाके स्वर्गमे उठाए लइ और बा परमेश्वरके सँग शासन करनके ताहीं परमेश्वरके दहिना घेन बैठिगओ। 20और चेला सब ठिहामे गए और जाएके आदमीनके बीच अच्छो समाचारको परचार करीं। प्रभु बिनके मदत करी और जा शक्तिशाली चमत्कारके दिखाइ, कि बाको बचन सच्चो रहए। आमेन।
Aktuálne označené:
मर्कूस 16: THRNT
Zvýraznenie
Kopírovať
Porovnať
Zdieľať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
