मत्ती 28
28
प्रभू यीशू ऊबे जिऐं
(मरकुस 16:1-10; लूका 24:1-12; यूहन्ना 20:1-10)
1बिषाँव के देसो पाछी हफ्ते के आगले देसे धुरोंह् उक्क्षोदें ही भियाँसरों दी मरियम मगदलीनी अरह् ओकी मरियम खात्ती-कबरी दे:ख्दी आई।
2अरह् दे:खो, ऐक बड़ो भूईच़ल़ लागों, किन्देखे के प्रभू का ऐक दूत्त स्वर्गो शा ऊदा आया; अरह् तिन्के नंजीक आऐयों, तेने सेजा पाथर रड़काया अरह् तिन्दें गाशी बऐठी गुवा। 3तेस्का रूप बिजूल़ी जेष्णाँ थिया, अरह् तेस्के खोट्णों पाल़ै जेष्णें ऊज्ल़े थिऐ। 4तेस्के डरह् के मारे रख्वाल़े काँम्बलिऐं, अरह् मरे अंदे के जिऐं हऐ गुऐ।
5तबे तेने दूत्त ऐ तिनू तिरोंई खे बुलो, “डरे ने, हाँव जाँणुऐं के तुँऐं यीशू जिनू शुँल़ी-फ़ाँशी चड़ाऐ गुऐ, तुऐ तिनू जूँऐ लुऐ। 6से ईथै आथी ने, परह् आप्णें बचन के मुँताबिक ऊबे जीऊँदें हऐ रूऐ; आओं, ऐजी जागा दे:खो, जेथै तिन का मड़दा थऐ थुवा थिया, 7अरह् शट ज़ाऐयों तिनके चैले कैई बुलो, के से मरे अंदे मुँझ्षे ऊबे जीऊँदे हऐ रूऐ, अरह् से तुँओं शे आगे गलील ईलाके खे हुट्दे, तुँऐं तेथै तिनका दर्शण पाँदे! दे:खो, मुँऐं तुँओं कैई बुली पाओं।”
8से डर अरह् बड़े मंजे आरी खात्ती-कबरी कैई शी शट पाछू आऐयों चैले कैई खुषख्बरी देंदी बिच़्ड़ी गई। 9बाटो पुडे ही अचाँणक प्रभू यीशू तिनू भेंटे। अरह् बुलो, “नंमष्कार”। तिन्ऐ लातो गाशी पड़ियों तिनखे लाम्बे पसरियों नंमष्कार करी।
10तबे प्रभू यीशू ऐ तिनखे बुलो, “डरे ने! मेरे भाईयों कैई ज़ाऐयों समाचार पंईचाल़ो, के से गलील खे चालो, तेथै से मुँह कैई शे भेंटदें।”
रख्वाल़े का शुज़ा
11से जबे बाटो पुँडी थी, तअ रख्वाल़े मुँझ्षे किऐ लोगे नंगर दे आऐयों पुरा हाल-चाल प्रधान-याजकों कैई बुलियों शुणाँया। 12तबे तिन्ऐ यहूदी लोगों के ठगड़े आरी कठे हऐयों ठाट करी, अरह् रख्वाल़े सपाऐ खे तिनिऐं बैजाऐ धंन देऐयों बुलो, 13“तुँऐं ऐजो बुले, के रात्ती खे जबे आँमें सुत्ती रूऐ थिऐ, तअ तेस्के चैले ऐ तेसी चुप्पी चुरियों तेथै शा आगू नियाँ। 14अरह् जे ऐजी बात हाक्मों के काँन तोड़ी पंऐचीं, तअ आँमें तिनू सम्झाऐ पाऊँबे अरह् तुँओं खत्रे शे बंचाऐ पाँऊँबे।” 15तअ: तिन्ऐ बैजाऐ धंन लईयों जेष्णों तिन कैई शो शिखाऐ थुओं थियों, जिनिऐं तेष्णों ही करो। ऐजी बात ऐतलो तोड़ी यहूदियों मुँझी जाणी चोग्री असो।
यीशू दे:खिऐं अरह् आखरी की अज्ञाँ
(मरकुस 16:14-18; लूका 24:36-49; यूहन्ना 20:19-23; खा.चै.काँम 1:6-8)
16गियारह् खास-चैले गलील दे तियों धारोंह् गाशी हुटे, जेथै ज़ाँणों खे तिनखे प्रभू यीशू ऐ बुलो थियों। 17तिन्ऐ प्रभू यीशू का दर्शण करियों तिनखे नमंष्कार करी, परह् तिन गाशी कोसी-कोसी के षकं हुवा। 18प्रभू यीशू ऐ तिन कैई आऐयों बुलो, “स्वर्गो अरह् धर्ती का बादा हंक-अधिकार मुँखे दिया गुवा। 19ईन्देंखे तुँऐं ज़ाओं, अरह् बादी संईसारी दे ज़ाऐयों गऐर यहूदी के लोग मेरे चैले बंणाँव; अरह् तिनको पिता, पुत्र, अरह् पबित्र-आत्त्मा के नाँव शो नहाँण-नुहाँव, 20अरह् जुण्जी मुँऐं अज्ञाँ देऐ थई, सेजी बादी बातो तिन कैई शी माँनणीं शिखाव: अरह् दे:खो, हाँव संईसारी की अंन्त्त तोड़ी सदा तुँवारी गईलो असो।”
Aktuálne označené:
मत्ती 28: sri
Zvýraznenie
Zdieľať
Porovnať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2022, Wycliffe Bible Translators, Inc. All rights reserved.
