أيث-روما 14
14
وَار تْعيَّاب شَا خ وُوْمَاش
1فَا ونِّي ؤُمِي يضْعف لإِيمَان نّس قبْڒم-ث جَارَاوم بْڒَا مَا اَكِذس ثْمنْغم خ لْأَفْكَار نّس. 2ئِجّن يتْوَاڒَا لْمَكْلَا مَارَّا حَلَال. ئِجّن نّغْنِي ونِّي غَار يدْجَا لإِيمَان نّس يضْعف يتتّ غِير زِي ڒْخُضَارْث. 3ونِّي يتْوَاڒَان مَارَّا لْمَكْلَا حَلَال يتْخصَّا-يَاس وَار يسحْقِير شَا ونِّي وَار يتتّن شَا. عَاوذ ونِّي وَار يتتّن شَا يتْخصَّا-يَاس وَار يتْعيِّيب شَا خ ونِّي يتْوَاڒَان لْمَكْلَا مَارَّا حَلَال لِأَنَّا أَربِّـي يقْبڒ-يث. 4شك مِين ثعْنِيذ بَاش اَذ تْعيّْبذ اَخدَّام ن مِيدّن؟ ئِنْجح نِغ وَار ينْجِيح، وَانِيتَا ذ شّْغڒ ن سِيذس. أُو ذ صَّح نتَّا اَذ ينْجح لِأَنَّا سِيذِي أَربِّـي يزمَّر اَث يسنْجح.
5شُوْف، ئِجّن يتْوَاڒَا يجّن ن نْهَار مُبَارَك زِي نْهُوْرَاث نّغْنِي. ئِجّن يتْوَاڒَا-ثن قَاع كِيف-كِيف. كُڒ يجّن يتْخصَّا-ٱس لَابُد اَذ يِيڒِي مقْتَنَاع مْلِيح س اَرَّاي نّس. 6ونِّي يتْوَاڒَان يجّن ن نْهَار مُبَارَك زݣ ونّغْنِي اَذ يݣّ مَانَايَا بَاش اَذ يوقَّر سِيذِي أَربِّـي. ونِّي يتتّن زِي مَارَّا لْمَكْلَا قَا يتتّ بَاش اَذ يوقَّر سِيذِي أَربِّـي لِأَنَّا اَذ يشكَّر أَربِّـي. ونِّي وَار يتتّن شَا زِي مَارَّا لْمَكْلَا قَا يتݣّ مَانَايَا حمَا اَذ يوقَّر سِيذِي أَربِّـي، ؤُڒَا ذ نتَّا اَذ يشكَّر أَربِّـي.
7شُوْف، وَار ذَايْنغ حَدّ يدَّر إِ يِيخف نّس، وَار ذَايْنغ حَدّ يتْمتَّا إِ يِيخف نّس. 8نشِّين مڒَا ندَّر، أَ ندَّر إِ سِيذِي أَربِّـي. مڒَا نمُّوْث، أَ نمّث إِ سِيذِي أَربِّـي. فَلِهَذَا، مڒَا ندَّر نِغ نمُّوْث نشِّين ن سِيذِي أَربِّـي. 9لِأَنَّا خ مَانَايَا إِي خف يمُّوْث لْمَسِيح أُوْشَا ثعْقب-د ذَايس ثُوْذَارْث حمَا اَذ يِيڒِي نتَّا ذ سِيذِيثْسن ن يِنِّي يمُّوْثن ذ يِنِّي يدَّرن. 10إِيوَا شك مَايمِّي تْعيَّابذ ؤُمَاش؟ شك مَايمِّي ثْسحْقَرذ ؤُمَاش؟ نشِّين مَارَّا أَ نْبدّ زَّاث إِ لْعَرْش ن أَربِّـي مَانِي إِي غَا نتْوَاحْكم. 11أَقَا يُوْرَا ذِي لْكِتَاب:
<نش تْجَادْجِيغ س ثُوْذَارْث ينُو، ئِقَّار-يت سِيذِي أَربِّـي،
أَقَا مَارَّا يوْذَان اَذَايِي سجّْذن خ يفَادّن نْسن،
مْكُڒ يڒس اَذ يشْهذ نش ذ سِيذِي أَربِّـي.>
12فَلِهَذَا، مْكُڒ يجّن زَّايْنغ اَذ يتْوَاحَاسب زَّاث إِ أَربِّـي.
وَار غطّڒ شَا ؤُمَاش
13إِذن زِي سَّا اَڒ ثْسَاونْت يتْخصَّا-يَانغ أُو لَابُد وَار نتْعيِّيب شَا خ وَايَاوْيَا؛ لَّا، ئِتْخصَّا-كنِّيو اَذ تْفكَّرم مْلِيح حمَا وَار ثْغطّْڒم شَا يجّن وُوْمَاثْوم نِغ اَث تسْفشْڒم. 14نش سّْنغ أُو مْتيّْقن ذِي سِيذِيثْنغ عِيْسَى اَقَا مِين نتّت وَار ذَايس بُو شَان ڒْحَاجث حْرَام. وَلَكِن يتِيڒِي حْرَام خ ونِّي إِي ت يتْوَاڒَان حْرَام. 15لِأَنَّا مڒَا يتْخيَّاق وُوْمَاش س مَشَّا نِّي إِي تتّذ، أَتَاف شك وَار ثُوْݣُّوْرذ شَا نِيشَان س ڒمْحِبّث. وَار تݣّ شَا مَشَّا نّش ذ سَّبَاب إِي زِي غَا ينهْذم وُوْمَاش ونِّي مِيخ يمُّوْث لْمَسِيح. 16أَمنِّي وَار تجَّام شَا يِوْذَان اَذ سِّيوْڒن شَّرّْ خ مِين تْوَاڒِيم ذ اَصبْحَان. 17لِأَنَّا ڒْمُلْك ن أَربِّـي نتَّا وَار يدْجِي شَا س مَشَّا نِغ ذ ثِيسسِّي؛ نتَّا س ؤُمْصْڒَاح اَك أَربِّـي ذ ڒهْنَا ذ ڒفْرَاحث س اَرُّوْح يقدّْسن. 18ونِّي إِي غَا يخذْمن إِ لْمَسِيح اَمنِّي، أَقَا أَربِّـي يرطَّا خَاس يوْذَان تْشكَّرن-ث.
19إِذن فَا يتْخصَّا-يَانغ أُو لَابُد أَ نݣّ لْمجْهُوْد نّغ بَاش أَ نݣّ مِين يتَاوِين غَار ڒهْنَا ذ مِينْزِي غَا نْشجّع اَيَاوْيَا. 20وَار هدّم شَا ڒْخذْمث ن أَربِّـي عْلَاحْسَاب لْمَكْلَا. ذ صَّح مَارَّا مِين يدْجَان نتَّا حَلَال، وَلَكِن ذ ڒْعِيب مڒَا ثْغظْڒذ شَان يِجّن س سَّبَاب ن مِين تتّذ. 21ذ يجّن ن ڒْخِير مڒَا وَار تتّذ شَا اَيْسُوْم، نِغ وَار ثْسسّذ شَا اَمَان وضِيڒ، نِغ ذ شَان ڒْحَاجث نّغْنِي إِي غَا يغظْڒن ؤُمَاش. 22مِين مَا ثُوْمْنذ خ ثْمسْڒَايِين-أَ، اجّ-يثنْت جَارَاش-د ذ أَربِّـي. سَّعْذ ن ونِّي وَار د يتِيوِين لْحِسَاب ذ لْعِقَاب إِ يِيخف نّس خ مِين يتْوَاڒَا حَلَال. 23وَلَكِن مڒَا يجّن يتتّ يتْشكَّا ذِي لْمَكْلَا نّس، أَخَاس يتْوَاحَاكم اَخَاس يتْوَاعَاقب لِأَنَّا وَار يتتّ شَا س لْإِيمَان نّس إِي ذَايس. أُو مَارَّا مِين وَار يتِيڒِين س لإِيمَان نِّي نتَّا ذ يجّن ن ڒْمُعْصِيّث.
Aktuálne označené:
أيث-روما 14: ريف
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás