Obľúbené biblické verše z SANTIAGO 1

Aañ yaꞌ dɨr mu jam guguuxiꞌñ jiñ jaaduñ jich Xoiꞌkam bhaan na pim gɇꞌkam kɨꞌn jix bhaiꞌ pɨx jum taat kaꞌ noꞌt tuꞌx buam jum duukam jam aꞌm ba ji chu jii na panaas ku cham nakgam tu tatdaꞌ. Xi ñakooꞌndaꞌ pim, na guꞌ noꞌ pim puꞌñir maaꞌn na pim jax jix biiñak buiñor guch Gɨꞌkoraꞌ, sia ku pim bɨxchuꞌ bhaan jum tulhiiñ, puiꞌ ba machiaꞌ pim. Miꞌ dhɨr cham tuꞌ jax ka ɨlhiiꞌñdhaꞌ pim sia tuꞌx buam jum duukam jam aꞌm jimiim, panaas ku pim moo pu cham tuꞌm tulhiiñdhaꞌ, na pim guꞌ puiꞌ jaꞌk ba kaapakaꞌ.

Baꞌ noꞌ pim guꞌ jaiꞌ dhɨt aapiꞌm jix bhaiꞌx maachik na jax pɨk jaꞌk moox aaꞌ gu Dios na pim tuiꞌñgɨdaꞌ, soiꞌm ɨlhdhai pim muiꞌ xi chañiaꞌ gu Dios. Guiꞌ jam makiaꞌ maaꞌn jimdam gu matdaꞌ cham jax ji chɨꞌji, gɇꞌ cham daaxix kam, na pim baꞌ miꞌ dhɨr kɨꞌn bhaiꞌ ji machiaꞌ puꞌñi na jax pɨk jaꞌk jix aaꞌ na pim tuiꞌñgɨdaꞌ.

Jaꞌpniñ baꞌ moo tɨip xi jam tɨɨdam jiñ jaaduñ jich Xoiꞌkam bhaan, na pim siamri xi ñakgat noꞌ jaroiꞌ giilhim jam tɨtda na jax cham jir am. Chaꞌpim juandaꞌ, xi kɇɇkɇꞌ pim pɨx sia ku jax kaiꞌch.

Dai ji na pim guꞌx bhaiꞌ xim gaꞌngidhat miꞌ puiꞌ duiñchuꞌndaꞌ na jax moox kɨɨꞌ kaꞌm nɨiꞌñ guch Gɨꞌkoraꞌ, dhiꞌ pim bhaan baꞌ puꞌñi muiꞌ xim otdatgɨdaꞌ cham tuꞌ bhaan jax jim aagɨt. Dhiꞌ baꞌ bhaan bax maatɨꞌ kaꞌ na pim sɨlhkam jix biiñak buiñor gu Dios, miꞌ dhɨr baꞌx ioꞌm bhaiꞌ ji machiaꞌ pim na jax jaꞌk jix aaꞌ guiꞌ na pim tuiꞌñgɨdaꞌ.

Ku guꞌ dhiꞌm aaꞌ ji na pim tuꞌ sɨlhkam miꞌ puiꞌ xi dhuiñchuꞌndaꞌ na jɨꞌk moo jax jum kaiꞌch gux bhaiꞌm kaiꞌchdham ñioꞌkiꞌñ gu Dios, cham tuꞌ daipuꞌ na pim jix mat kaꞌ pɨx. Na guꞌr ba puiꞌ pɨx ɨp sia pim tɨix maat noꞌ pim guꞌ cham pu bua na jax jum kaiꞌch, dɨɨlh japim uaꞌtulhdharaꞌ tɨr jum iabudaꞌ, na pim guꞌ cham am buatgɨdaꞌ.

Jaꞌp moo joidham jix bhaiꞌ ba tu jimiaꞌ gu jaroiꞌ noꞌ xi ñakgat gammɨjɨ pux biiñak buiñor gu Dios, sia kut giilhim bɨɨx aixim jix buam jum duukam bhaiꞌ aꞌmiram ji chu jii, na guꞌ gatuuk na puꞌñi xim tulhiiñaimɨi, miꞌ dhɨr dai na ba baidhikaꞌ guch Xoiꞌkam jix dhaam jaꞌk na paiꞌ gammɨjɨ jix jɨkgɨm bap tuiꞌkaꞌ, na joidham jix chu abhaar. Baꞌ puiꞌ ji buusniaꞌ na ba maiꞌchiaꞌ gu kuruun na joidham jix abhaar nax dhaꞌram namɨɨk, guiꞌ nat jax chuꞌm ja iimchuda guch Xoiꞌkam na saak ja makiaꞌ guiꞌ nam jɨꞌk puꞌñi miꞌ puiꞌ jimiaꞌ na jax jix aaꞌ.

Jax dhui na gu Dios cham tuꞌ aꞌmiram dɨr busaak gu tuꞌ nar jix buam jum duukam, dai ji guiꞌ na jɨꞌk tuꞌr jix kɨɨꞌp jum duukam. Bɨɨx guiꞌ na jɨꞌk tuꞌch aꞌm jimiim nar jix kɨɨꞌp jum duukam, Dios jir jup duniiꞌñ, guiꞌ nax dhaam jup tuꞌiiꞌ nat jaroiꞌp duu dhi chiichiaꞌ na bhaꞌñi jaꞌp daraa jix dhaam gio dhi tanoolh na bɨɨx kap tu toonniꞌñ. Gu Dios gammɨjɨ pur Dios jia, cham paiꞌ dhuuk maakam jup bar tuꞌm, pu maaꞌn na jax pɨx jir tuꞌm na jax bar tuꞌm.

Na guꞌ gu jaroiꞌ noꞌ tɨix maat na jax jaꞌk jum kaiꞌch gux bhaiꞌm kaiꞌchdham ñioꞌkiꞌñ gu Dios, guꞌ ji noꞌ guꞌ cham pu bua, dhiꞌ jaꞌpni pɨx ba ji buusan na jax gu jaroiꞌ noꞌm nɨnɨiꞌñ nax maachim na jax moo tuꞌm ba tɨ nɨiꞌñ, piam noꞌ cham jix jaꞌkkulhiꞌ. Baꞌ dai miꞌ na ka tɨꞌñchokaꞌ na kam nɨnɨiꞌñdhaꞌ, miꞌ dhɨr na jaꞌp tɨ tɨgiaꞌ, pu cham tuꞌ ka tɨꞌñchokaꞌ na pɨn jax chuꞌm tɨ nɨiꞌñ. Puꞌñi ɨp baꞌ dhiꞌ.

Guꞌ dhiꞌ matgam noꞌñ tuꞌ sɨlhkam miꞌ puiꞌ ba bhɨichuꞌ na jax tu aagix gu ñioꞌkiꞌñ gu Dios nañ ba tɨ jɨɨgiꞌñ buiñor guch Xoiꞌkam, cham tuꞌ ji nañ kañ uaꞌtulhiꞌñdhaꞌ kɨꞌn gu tuꞌ yaꞌ kam dhi oiꞌñgaꞌn, puiꞌ na jax nañ jix buam tu ñiokdaꞌ gam nañ giilhim ja tɨtdadaꞌ gu jaꞌtkam, guꞌ jaꞌpji nañ jix ja joiꞌgɨꞌndaꞌ ji gio nañ ja palhbuiꞌñdhaꞌ gu aꞌaalh nam alh jir dɨꞌdɨr koiꞌ, gio gu dɨꞌdɨlhdhɨm uꞌuub nañ xi ja maakidhat gu tuꞌ na ja aꞌm jum aagaidhaꞌ.

Guꞌ baꞌ gu jaroiꞌ noꞌ ampɨx puiꞌx buam jix chu duñiim na jax jaꞌk cham kɨɨꞌ kaꞌm nɨiꞌñ gu Dios, cham tuꞌ jax jum aaꞌndaꞌ na gu Dios puiꞌ jaꞌk jurtuꞌn ku baꞌ puiꞌ tu tatdaꞌ. Jax dhui na gu Dios cham jɨꞌxdhaꞌ puiꞌ jaꞌk jurtuꞌndaꞌ gu jaroiꞌ nax buam tu duñiaꞌ, na guꞌ cham tuꞌx buam jum duukam aꞌmiram dɨr busaak. Jaꞌpji dɨɨlh juraꞌram dɨr na buusniaꞌ gu jaroiꞌ na puꞌñi bɨɨx aixim bam aaꞌndaꞌ, na miꞌ ba ji kaayaꞌ na jax jaꞌk jurtuꞌnkaꞌ gux buam jum duukam na baꞌx buam bax chu duñiim kaꞌ na jax jaꞌk cham kɨɨꞌ kaꞌm nɨiꞌñ gu Dios.

Baꞌ gu jax chuꞌm jiñ jaduuñ jich Xoiꞌkam bhaan noꞌ gampaiꞌ pɨx tuꞌiiꞌ na cham tuꞌ biaꞌ, jix bhaiꞌ pɨx jum taat kaꞌ buiñor gu Dios, na guꞌ bhammɨ dɨr bha jaꞌk jix chumñigam ɨlhiiꞌñdhaꞌ gu Dios, na guꞌ bhaan tɨ nɨiꞌñdhaꞌ.