Obľúbené biblické verše z 2 Timothy 1

Zdieľať

Nil God.angan Ngeen-Wiy Min nungantaman kuchan ngamparan-a, nilan keꞌ winynyathiy ngampanga yaꞌa, nil thayanathow ngampang, aꞌ maꞌ-aath-aathow ngampanga kaangk wun-wunāmp ngamparakamana, putha kuchek min anman iiy-iiyāmp.

Nilam God.ang thonakama kaaꞌ-piichanath ngampang way ngamparam anpalana, aꞌ umpa ngampang pam wanch nungantam iiy-iiyāmp. Than pam wanch wiyangan nath ngaantam-ngeeyiythan than minam nathwey iiy-iiyaynan-a, yaa, nil God.angan puthangkan pam wanch nungantaman waaꞌ-waaꞌow thanang. Puth aak God.antan yimanangan keꞌam wun, yaꞌa. Nilan kaangk wunan ngampara, aꞌ umpan ngampang nilan puth min anman iiy-iiyan ngampar. Nilana ngangk minangam iiy-iiyan ngampar puth aak keenkanamana nil ngaantam-ngeey Jesus Christ.an kuchow ngampara.

Puth nanpalana ngay putham thawāng nungka nint work minam iiy-iiyān God.antan. Kaꞌathangamana ngan maꞌan wunpan kuchek nungkaramangan-a, nil God.angan an-aniyangan ngangk thayanath nintang work nungantan iiy-iiyāna, wik nungantaman waaꞌ-waaꞌān thakana, yaa, nintaniy-a, keꞌ-ngoongkam iiy-iiyān work nungantamaniya.

Puth nint ngangk thayanam than-thanān, ngul-nyaaꞌana keꞌ wun-wunān, nint wikan waaꞌ-waaꞌān wiyantan woyan min Jesus.antamana, aꞌ putha nint ngul-nyaaꞌana keꞌ wun-wunān ngatharamana, puth ngay in jailang wun-wunanga puth anpalman ngay Jesus.an monkan-wak-wakang nunang. Puungk wiyangana way yump-yumpayn nungkar thampa puth nintan wik min Jesus.antaman waaꞌ-waaꞌangan thant. Puth nintana keꞌ wantāna, than mak way thakan yump-yumpayn nungka, nintana keꞌ-ngoongkam monkan-wak-wakān God.an. Nil ngul thayanathow nintang aak wayan wampow nungka.

Puth anpalmana than wiy al-alangana wayan yumpin ngathara, aꞌ puth ngay in jailang ngula. Puth ngayana keꞌ ngul-nyaaꞌan wun-wunang yaꞌa, puth ngay meeꞌmiy nil Christ.an min-minam paththam putha piꞌana, puth ngayan nunangam anman ngangkangan piꞌ-piꞌang. An nilam theeꞌ maꞌ ngatharang work inan wik min nungantaman waaꞌ-waaꞌāng wiyantana. An puth ngay meeꞌmiy an kan-kanam nil ngul maꞌ-aath-aathow ngayang wik kan-kanam waaꞌ-waaꞌāng wik min nungantaman wiyantana, aak-aakanakaman nil Christ.an palaman ngulan wampowa.