Sudije 7
7
O Gedeon mudarol e Midjancuren
1O Jeruv-Vaal, gova si o Gedeon, thaj sa i vojska lesa katane uštile rano ki sabalin thaj ćerde logori pašo En-Harod. O logori e Midjancurengo sasa severno lendar, ani dolina pašo brego o Moreh.
2O GOSPOD phenda e Gedeonese: “Tusa si but bari vojska te bi šajine te predav e Midjancuren ane lenđe vasta. Te ne bi e Izraelcura avena barikane thaj te ne bi phenena: ‘Amare zuralimasa spasisaljam.’ 3Golese vaćar e vojskaće: ‘Ko daral thaj izdral tari dar, nek džal taro brego o Gilad thaj nek iril pe ćhere.’”
Tegani bišteduj milje (22 000) vojnikura đele pese, a ačhile deš milje (10 000).
4O GOSPOD phenda e Gedeonese: “Vadži isi tut but bari vojska. Inđar e vojska tele dži o paj, odori me ka biriv len tuće. Baše kaste vaćarav tuće: ‘Kava nek džal tusa’, gova nek džal. Al baše kaste vaćarav: ‘Kava ma te džal tusa’, gova ma te džal.”
5Gija o Gedeon inđarda e vojnikuren tele dži o paj, a o GOSPOD phenda e Gedeonese: “Crde ki jekh rig kolen save čhibasa pijen o paj sar džukle, tare kola save si ke koča dži kaj pijen paj.”
6Kola so pilje o paj čhibasa gija so vastesa čhuvena le ano muj, sesa trišel (300). A sa avera manuša sesa ke koča dži kaj pilje paj.
7O GOSPOD phenda e Gedeonese: “Ka spasiv tumen akale trišele manušencar save pilje o paj čhibasa, thaj ka predav e Midjancuren ane ćire vasta. Sa avera nek džan pese ćhere.”
8Gija o Gedeon bičhalda kole Izraelcuren ćhere, a lesa ačhada samo kole trišele manušen. Kola so ačhile lije tare kola so đele ćhere o xape thaj e bakrane šinga.
A o logori e Midjancurengo sasa ani dolina, talo logori e Gedeoneso.
9Goja rat o GOSPOD vaćarda e Gedeonese: “Ušti thaj čalav po logori ćire dušmanengo, golese so ka dav len tuće ane vasta. 10Al te daraljan te čalave po logori, ulji ano logori će slugasa e Puresa, 11thaj šun so vaćaren. Pale gova ka avol tu zuralipe te čalave po logori.”
Tegani o Gedeon thaj leso sluga o Pura ulile dži e logorese anglune straže. 12E Midjancura, e Amalečanura thaj avera narodura taro istok bešle ani dolina thaj sesa but sar skakavcura. Naštine te đinen pe lenđe kamile, sesa sar pošik ki morsko obala.
13O Gedeon reslo odori baš kana jekh manuš vaćarola po suno pe amalese. Phenda lese:
“Dikhljem suno sar jekh pogača taro ječam lija te vrtil pe premalo logori e Midjancurengo thaj čalada ano jekh šatori gaći zurale kaj o šatori irisajlo thaj pelo.”
14Leso amal vaćarda lese: “Gova naj khanči aver nego o mačo e Izraelcoso e Gedeoneso, e Joašese čhaveso. O Dol dija le ane vasta e Midjancuren thaj sa kava logori.”
15Kana o Gedeon šunda o suno thaj so značil gova suno, poklonisajlo e GOSPODE. Tegani irisajlo ano izraelsko logori thaj dija vika: “Ušten! O GOSPOD predija o logori e Midjancurengo ane tumare vasta!”
16Pale gova ulada kole trišele (300) manušen ane trin čete, pa dži jekhe manušese dija ane vasta po jekh bakrano šing thaj čučo khoro ane savo sasa baklja.
17Tegani o Gedeon vaćarda lenđe: “Dićhen man thaj ćeren so ćerav i me. Kana ka resav dži o krajo e logoreso, ćeren so ćerav i me. 18A kana ka me thaj savore kola so si mancar phurda ane šinga, tegani phurden i tumen ane tumare šinga trujal o logori thaj den vika: ‘Bašo GOSPOD thaj bašo Gedeon!’”
19O Gedeon thaj e šel (100) manuša lesa, avile dži o krajo e logoreso, ki opaši rat, baš kana zamenisajle e stražara. Tegani phurdije ane šinga thaj phaglje e khore save sesa lenđe ane vasta. 20So trin čete phurdije ane šinga thaj phaglje e khore. E baklje ićarde ano levo va, a ano desno va ićarde e šinga ane save phurdije thaj dije vika: “O mačo bašo GOSPOD thaj bašo Gedeon!” 21Dži jekh manuš ačhilo ke po than trujal o logori, a sa e Midjancura lije te den vika thaj te našen rojindoj. 22Kana šundile trišel (300) šinga, o GOSPOD čhuta e Midjancuren te čalaven e mačurencar jekh premal avereste. Sa i vojska našli dži i Bet-Šita premali Cerera, sa dži i granica Avel-Mehola paše o Tabat.
23Tegani dije vika e Izraelcuren tare Neftalimeso, e Asireso thaj tare sa e Manasijaso pleme, gothar te traden e Midjancuren.
24O Gedeon bičhalda glasnikuren ke sa e Efremese bregura te vaćaren kava haberi: “Uljen thaj čalaven pe Midjancura. Prelen e potokura sa dži i Bet-Bara thaj i len o Jordan.”
Gija sesa akharde sa e manuša tare Efremeso pleme thaj von prelije e potokura sa dži i Bet-Bara thaj i len o Jordan. 25Dolde thaj e duje midjanskone zapovednikuren, e Oreve thaj e Zeeve. E Oreve mudarde paši Orevesi stena, a e Zeeve paši Zeevesi presa baši mol. Pale gova palem lije te traden e Midjancuren. A e Oreveso thaj e Zeeveso šoro ande e Gedeonese savo sasa paši len o Jordan.
දැනට තෝරාගෙන ඇත:
Sudije 7: GSP
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න