Sudije 8
8
O Zevah thaj o Calmun
1E Efremcura zurale korisade e Gedeone, vaćarindoj: “Sose gija ćerdan amencar? Sose ni akhardan amen kana đeljan te čalave pe Midjancura?”
2O Gedeon phenda lenđe: “Tumen ćerden pobut mandar. Džanen kaj e manuša tare Efremeso pleme save ćiden ano vinograd, ačhaven pobut drakha e čororenđe nego so šaj te ćidol e Aviezeresi familija. 3O Dol ane tumare vasta predija e midjanskone zapovednikuren, e Oreve thaj e Zeeve. Šaj li poredil pe kova so me ćerdem kolesa so tumen ćerden?”
Kana gova phenda, e Efremcura ačhade te holjavon po Gedeon.
4O Gedeon reslo dži i len o Jordan thaj pire trišele (300) manušencar nakhlo prekal. Iako but umorisajle, ni ačhile te traden pe dušmanuren.
5O Gedeon phenda e manušenđe taro Sukot: “Moliv tumen. Den me vojskaće zala mangro. But umorisajle, a me vadži tradav e midjanskone caruren, e Zevahe thaj e Calmune.”
6Al e šorutne taro Sukot phende lese: “Sose te da mangro ćire vojskaće kana vadži ni doldan e Zevahe thaj e Calmune?”
7Tegani o Gedeon phenda lenđe: “E, šukar! Kana o GOSPOD ka dol ane me vasta e Zevahe thaj e Calmune, ka avav thaj ka šibiv tumen e kangrencar tari pustinja thaj e dračosa.”
8O Gedeon gothar đelo ano Penuel thaj i lendar rodija isto gova. Al e manuša taro Penuel vaćarde lese sar e manuša taro Sukot.
9Golese o Gedeon phenda e manušenđe taro Penuel: “Kana ka iriv man sar pobedniko, ka peravav kaja kula.”
10O Zevah thaj o Calmun sesa ano foro Karkor pumare vojskasa tare dešupandž milje (15 000) džene. Samo gaći ačhilo tari vojska e istočnone narodurenđi, golese so mudardile šelubiš milje (120 000) džene naoružime mačurencar. 11O Gedeon đelo dromesa katar džana e karavanura, istočno taro Novah thaj i Jogbeha, thaj tari jekh drom čalada pi midjansko vojska kana von ni nadisajle. 12E duj midjanska carura o Zevah thaj o Calmun našle, al o Gedeon đelo pale lende. Dolda len thaj ćerda bari pometnja ani sa lenđi vojska.
13O Gedeon, o čhavo e Joašeso, irisada pe taro maripe prekalo drom o Heres savo naćhola maškare bregura. 14Ko drom dolda nesave terne čhave andaro Sukot thaj ispitujisada le, a o terno čhavo pisisada lese e alava tare eftavardešefta (77) šorutne thaj starešine taro foro Sukot.
15Tegani o Gedeon đelo ke manuša taro Sukot thaj phenda: “Kava si o Zevah thaj o Calmun baše save marden manđe muj vaćarindoj: ‘Sose te da mangro ćire vojskaće kana vadži ni doldan e Zevahe thaj e Calmune?’”
16Tegani lija e forose starešinen, pa e kangrencar tari pustinja thaj e dračosa šibisada len. Gija e manušen taro Sukot anda ani gođi. 17I kula ano Penuel o Gedeon perada, a e muršen andaro foro mudarda.
18Tegani pučlja e Zevahe thaj e Calmune: “Save manušen mudarden ko brego o Tavor?”
Von vaćarde: “Manušen sar so san tu. Dži jekh lendar sasa sar čhavo e caroso.”
19O Gedeon phenda: “Gova sesa me phrala, čhave me daće. Xav sovli po GOSPOD, te ni mudarenasa len, bi ačhavava tumen ano džuvdipe.”
20Tegani vaćarda e Jeterese, pe anglune bijande čhavese: “Ušti thaj mudar len!”
Al o Jeter ni ikalda o mačo, golese so sasa vadži čhavoro thaj darajlo.
21O Zevah thaj o Calmun phende: “Ušti tu thaj mudar amen, golese so si gova muršani bući.”
O Gedeon uštilo thaj mudarda e Zevahe thaj e Calmune. Tegani tare lenđe kamilenđe kora uljarda e ukrasura save sesa ano oblik taro opašo čhon.
O Gedeon ćerol idole taro zlato
22Tegani e Izraelcura phende e Gedeonese: “Av amaro vladari – tu, ćo čhavo thaj ćo unuko – golese so spasisadan amen andare vasta e Midjancurenđe.”
23Al o Gedeon vaćarda lenđe: “Me ni ka avav tumaro vladari, a ni mo čhavo. Tumaro vladari ka avol o GOSPOD.”
24Thaj o Gedeon vadži phenda: “Al jekh mangav tumendar. Dži jekh tumendar te den man po jekh zlatno čen taro tumaro pleno.” Golese so nesave tare manuša saven e Izraelcura pobedisade, sesa e Jišmaelcura save inđarde zlatna čeja.
25Von phende lese: “Ka da tut voljasa!” Gija buljarde jekh čaršafi, thaj savore čhudije po jekh zlatno čen taro pumaro pleno. 26Sa e zlatna čeja save o Gedeon rodija lendar sesa phare paše biš (20) kila, a gothe ni računisade e ukrasura save sesa ano oblik taro opašo čhon, e priveskura, e šeja taro skerlet save phirade e midjanska carura thaj e lancura save sesa ke kora e kamilenđe. 27O Gedeon tare gova zlato ćerda prsluko thaj čhuta le ane piro foro i Ofra. Sa o Izrael perola ke koča anglo gova zlatno prsluko, thaj gova postanisada zamka e Gedeonese thaj lese familijaće.
28Gija e Izraelcura pobedisade e Midjancuren, pa von ni ćerde lenđe vadži problemura. Ani phuv sasa mir saranda (40) berš, sa dži kaj o Gedeon sasa džuvdo.
E Gedeoneso meripe
29Al o Jeruv-Vaal, gova si o Gedeon, o čhavo e Joašeso, irisajlo te bešol ane po ćher. 30E Gedeone sasa eftavardeš (70) čhave, golese so sasa le but romnja. 31Bijanda lese čhave i lesi romni-ropkinja savi bešli ano Sihem, a vov dija le alav Avimeleh. 32O Gedeon, o čhavo e Joašeso, mulo ano baro puranipe. Prahosade le ano limori lese dadeso e Joašeso, ani Ofra e Aviezeresi.
33Samo so o Gedeon mulo, e Izraelcura ačhade te služin e Devlese thaj lije te služin e Vaalenđe. Čhute e Vaale-Berite te avol lengo dol. 34Zabistarde e GOSPODE, pe Devle, savo ikalda len andare vasta sa lenđe dušmanurenđe trujal lende. 35A ni e Jeruv-Vaalese, e Gedeonese familija ni poštujisade, iako vov ćerda but šukaripe bašo Izrael.
දැනට තෝරාගෙන ඇත:
Sudije 8: GSP
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න