යෙරමියා 23
23
දමිටුකමේ අත්ත
1“මගේ තණ බිමෙහි බැටළුවන් විනාශ කරන, උන් විසුරුවා හරින එඬේරුන්ට දුක් පැමිණේ යැ” යි ස්වාමින්වහන්සේ ප්‍රකාශ කරන සේක. 2එබැවින් මගේ ජනයා බලාගන්නා එඬේරුන්ට, ඉශ්‍රායෙල්ගේ දෙවියන්වහන්සේ වන ස්වාමින්වහන්සේ මෙසේ පවසන සේක: “නුඹලා මගේ බැටළු රැළ විසුරුවා හළ නිසාත්, ඔවුන් ඉවත පලවා හැරිය නිසාත්, ඔවුන් බලාගැනීම නො කළ නිසාත්, ඔන්න මම ද නුඹලා කළ නපුරුකම් ගැන බලා ගන්නෙමි” යි ස්වාමින්වහන්සේ ප්‍රකාශ කරන සේක. 3“මගේ බැටළු රැළෙහි ඉතිරි ස්වල්ප දෙනා මා විසින් ඔවුන් පලවා හරින ලද සියලු දේශවලින් මම එකතු කර, ඔවුන්ගේ පට්ටියට ආපසු ගෙනෙන්නෙමි. එහිදී ඔවුන් සඵල වී, ගණනින් ද වැඩිවනු ඇත. 4ඔවුන් රැක බලාගන්නා එඬේරුන් මම ඔවුන්ට පත් කර දෙන්නෙමි. තවදුරටත් ඔවුන් භයට පත් වන්නේවත්, තැති ගන්නේවත් නැත. එකකුදු නැති වන්නේ ද නැතැ” යි ස්වාමින්වහන්සේ ප්‍රකාශ කරන සේක.
5 ස්වාමින්වහන්සේ මෙසේ ප්‍රකාශ කරන සේක:
“මෙන්න! දේශයෙහි යුක්තියත්, දමිටුකමත් ඉටු කරමින්,
ප්‍රඥාවෙන් රජකම් කරන රජකු වන ධර්මිෂ්ඨ ශාඛාවක්,
දාවිත්ගේ පරපුරින් මා විසින් නැගිටුවන දවස් පැමිණෙන්නේ ය.
6එතුමන්ගේ දවස්හි දී යූදා ගලවනු ලබන්නේ ය.
ඉශ්‍රායෙල් සුරැකි ව වාසය කරන්නේ ය.
එතුමන් හඳුන්වනු ලබන නාමය වන්නේ,
‘අපේ ධර්මිෂ්ඨකම වන ස්වාමින්වහන්සේ’#23:6 යෙහෝවා-සිද්කේනූ හෙවත් යාවේ-සිද්කේනු යනුවෙනි.
7“ඔන්න මෙබඳු දවස් පැමිණෙතැ” යි ස්වාමින්වහන්සේ ප්‍රකාශ කරන සේක, “ ‘ඉශ්‍රායෙල් ජනයින් ඊජිප්තු දේශයෙන් පිටතට ගෙන ආ ස්වාමින්වහන්සේ ජීවත් වන්නා සේ ම යනුවෙන්’ තවදුරටත් කියන්නේ නැත. 8‘ඉශ්‍රායෙල් වංශයෙන් පැවතෙන්නන්, උතුරු දේශයෙන් ද උන්වහන්සේ විසින් ඔවුන් පලවා හැර තිබූ සෙසු සියලු රටවලින් ද ඔවුන් ආපසු ගෙන ආ ස්වාමින්වහන්සේ ජීවත් වන වග සැබෑ සේ ම යනුවෙන්’ කියන දවස් පැමිණෙන්නේ ය. එවිට ඔවුන් තමන්ගේ ම වූ දේශයේ වාසය කරනු ඇත.”
බොරු දිවැසිවරුන්
9දිවැසිවරුන් සම්බන්ධ ව ය:
මගේ හදවත මා තුළ ම බිඳෙයි.
මගේ ඇටකටු සියල්ල වෙවුලුම් කයි.
ස්වාමින්වහන්සේ නිසාත්,
උන්වහන්සේගේ ශුද්ධ වචන නිසාත්
මා බීමත් මිනිසකු වැන්න.
මිදි යුෂ මතට යට වූ මිනිසකු වැන්න.
10මන්ද දේශය පරදාරිකයින්ගෙන් පිරිලා ය.
ශාපය නිසා දේශය වැලපෙයි.
පාළුකරයේ තණ බිම් වියළෙයි.
ඔවුන්ගේ චර්යාව නපුරු ය.
ඔවුන්ගේ බලය ද හරි නැත.
11“දිවැසිවරයා සේ ම පූජකයා ද දේව අභක්තික ය.
මගේ ගෘහය තුළ පවා ඔවුන්ගේ දුෂ්ටකම් මට හමුවිණැ” යි
ස්වාමින්වහන්සේ ප්‍රකාශ කරන සේක.
12“එබැවින් ඔවුන්ගේ මාවත් ලිස්සා යයි.
ඔවුහු අඳුරට පලවා හරිනු ලැබ,
ඇද වැටෙති.
ඔවුන්ට දඬුවම් කෙරෙන අවුරුද්දේදී
මම ඔවුන් පිටට විපත්තිය පමුණු වන්නෙමි” යි
ස්වාමින්වහන්සේ ප්‍රකාශ කරන සේක.
13“පිළිකුල දනවන දෙයක් මම සමාරියේ
දිවැසිවරුන් අතරේ දුටිමි:
ඔවුහු බාල් දෙවියාගේ නමින් දිවැසි වැකි පවසා,
මගේ ජනයා වන ඉශ්‍රායෙල්වරුන් නොමග යැවූහ.
14තවද භයංකර දෙයක්
යෙරුසලමේ දිවැසිවරුන් අතරේ ද මම දිටිමි:
ඔවුහු පරදාර සේවනයේ යෙදෙමින්, බොරුවෙන් ජීවත් වෙති.
කිසිවකුත් තම දුෂ්ටකම්වලින් නොහැරෙන පිණිස,
ඔවුහු දුෂ්ටකම් කරන්නන් දිරිගන්වති.
ඔවුන් සියල්ලෝ මට සොදොම වැන්න.
එහි වැසියෝ ගොමොරාව වැන්න.”
15එබැවින් සේනාංකවල ස්වාමින්වහන්සේ, දිවැසිවරුන් සම්බන්ධයෙන් මෙසේ පවසන සේක:
“මෙන්න! මම ඔවුන්ට තිත්ත අහර කෑමටත්,
විස වතුර බොන්නටත් සලස්වන්නෙමි.
මන්ද යෙරුසලමේ දිවැසිවරුන් වෙතින්
දූෂිතකම මුළු දේශය පුරා පැතිර ගොස් ඇත.”
16සේනාංකවල ස්වාමින්වහන්සේ මෙසේ පවසන සේක:
“නොහොබිනා බලාපොරොත්තුවලින් ඔබ පුරවමින්
ඔබට දිවැසි වැකියෙන් පවසන දිවැසිවරුන්ගේ වචනවලට සවන් නො දෙන්න;
ස්වාමින්වහන්සේගේ මුවින් කී දෑ නො ව
තමන්ගේ ම මනසින් මවා ගත් දර්ශන ය.
17මට ගර්හා කරන්නවුන්ට ඔවුන් පවසන්නේ,
‘ස්වාමින්වහන්සේ, ඔබට සුබ සිද්ධ වේ කියා’ ය.
තවද තම හදෙහි මුරණ්ඩුකමින් හැසිරෙන සියල්ලන්ට ඔවුන් කියන්නේ,
‘ඔබට කිසි අනර්ථයක් සිදු නො වේ’ කියා ය.
18උන්වහන්සේගේ වචනය ඇසීමටත්, බැලීමටත්
ස්වාමින්වහන්සේගේ මන්ත්‍රණ සභාව හමුවේ පෙනී සිටියේ, ඔවුන් අතරින් කවරෙක් ද?
නැතහොත් උන්වහන්සේගේ වචනයට අවධානය යොමා, ඊට සවන් දුන්නේත් කවරෙක් ද?
19මෙන්න, ස්වාමින්වහන්සේගේ කුණාටුව!
උදහසින් පෙරට ම හමයි.
සුළි සුළං කුණාටුවක් හැමේ.
එය දුෂ්ටයින්ගේ හිස මතට කඩා වැටේ.
20ස්වකීය හදෙහි අරමුණු ඉටු කර,
සම්පූර්ණ කරන තෙක්,
ස්වාමින්වහන්සේගේ කෝපය,
ආපසු හැරෙන්නේ නැත.
මතු දවස්හි දී
ඔබ එය පැහැදිලි ව වටහා ගනු ඇත.
21මා මේ දිවැසිවරුන් යැව්වේ නැත;
එහෙත් ඔවුහු දුවගෙන ගියහ.
මා ඔවුනට කතා කළේ නැත;
එහෙත් ඔවුහු දිවැසි වැකි කිවූහ.
22එහෙත් ඔවුන් මගේ මන්ත්‍රණ සභාව හමුවේ පෙනී සිටියේ නම්,
මගේ ජනතාවට මගේ වචන ප්‍රකාශ කරන්නට තිබිණ.
එවිට ඔවුන් තම නපුරු මාර්ගවලින් හා තම නපුරු ක්‍රියාවලින්
ඉවත හැරෙන්නට තිබිණ.
23“මම ළඟ පාත සිටින දෙවියෙක් ද?
මම දුරස්ථ ස්ථානවල සිටින දෙවියන්වහන්සේ නො වන්නෙම් දැ?” යි
ස්වාමින්වහන්සේ ප්‍රකාශ කරන සේක.
24“මට නො පෙනෙන ලෙස
රහස් තැනක සැඟවෙන්නට මිනිසකුට පුළුවන් දැ?” යි
ස්වාමින්වහන්සේ ප්‍රකාශ කරන සේක.
“ස්වර්ගයත්, පොළොවත් පුරවන්නේ මම නො වෙම් දැ?” යි
ස්වාමින්වහන්සේ ප්‍රකාශ කරන සේක.
25“ ‘මම ස්වප්නයක් දැක්කෙමි; මම ස්වප්නයක් දැක්කෙමි’ යි කියමින් මගේ නාමයෙන් බොරු දිවැසි වැකි පවසන, දිවැසිවරුන් කියන දෑ මම ඇසීමි. 26තම හදෙහි මායාවන් දිවැසි වැකියෙන් පවසන මෙම බොරු දිවැසිවරුන්ගේ හදවත්වල තව කොතෙක් කලක් මේවා පවතී ද? 27තමන් එකිනෙකාට පවසන ස්වප්න මගින් මගේ නාමය අමතක කරවන්නට ඔවුන් අදහස් කරන්නේ, ඔවුන්ගේ පියවරුන් බාල් වන්දනාව මගින් මගේ නාමය අමතක කරන පරිද්දෙනි. 28ස්වප්නයක් දකින දිවැසිවරයා තමාගේ ස්වප්නය පැවසුවාදෙන්. එහෙත් මගේ වචනය ඇත්තා, මගේ වචනය විශ්වාසවන්ත ව පවසත්වා. පිදුරුවලට ධාන්‍ය සමඟ ඇති කාරිය කිමෙක් දැ” යි ස්වාමින්වහන්සේ ප්‍රකාශ කරන සේක. 29“මගේ වචනය ගින්දර වැනි නො වේ ද? පර්වතයක් කැබලි කර දමන කුළු ගෙඩියක් බඳු නො වේ දැ?” යි ස්වාමින්වහන්සේ ප්‍රකාශ කරන සේක.
30“එබැවින් මෙන්න, එකිනෙකාගෙන් මගේ වචන සොරකම් කරන දිවැසිවරුන්ට මා විරුද්ධ යැ” යි ස්වාමින්වහන්සේ ප්‍රකාශ කරන සේක. 31“එසේය, ‘ස්වාමින්වහන්සේ ප්‍රකාශ කරන සේකැ’ යි කියමින්, තමන්ගේ ම දිවෙන් දොඩවන දිවැසිවරුන්ට ඔන්න මා විරුද්ධ යැ” යි ස්වාමින්වහන්සේ ප්‍රකාශ කරන සේක. 32“එසේ ම, ඔන්න! බොරු ස්වප්න දිවැසි වැකි පවසන අයට මා විරුද්ධ යැ” යි ස්වාමින්වහන්සේ ප්‍රකාශ කරන සේක. “ඔවුහු ඒවා පවසමින්, තැකීමක් නැති තම මිථ්‍යාවන් මගින් මගේ ජනයා මුළා කරති. එහෙත් මා ඔවුන් යැව්වේවත්, ඔවුන්ට අණ කළේවත් නැත. මෙම ජනතාවට ඔවුන්ගෙන් අබමල් රේණුවක සෙතක් නැතැ” යි ස්වාමින්වහන්සේ ප්‍රකාශ කරන සේක.
බොරු දිවැසිවරයකු
33“මෙම ජනයා හෝ දිවැසිවරයකු හෝ පූජකයකු ඔබ අමතා, ‘ස්වාමින්වහන්සේගේ බර කුමක් දැ#23:33 හෙබ්‍රෙව් බසින් ස්වාමින්වහන්සේගේ ප්‍රකාශනය ලෙස ද තේරුම් ගත හැක.?’ යි ඇසූ කල, ඔබ ඔවුන්ට පිළිතුරු දෙමින්, ‘නුඹලායි බර. තවද මම නුඹලා අත්හැර දමන්නෙමි’ යි ස්වාමින්වහන්සේ ප්‍රකාශ කරන සේකැයි කියනු. 34දිවැසිවරයකු හෝ පූජකයකු හෝ අන් කවරකු හෝ, ‘මෙය ස්වාමින්වහන්සේගේ බර යැ’ යි පැවසුවහොත් මම ඒ මිනිසාට ද ඔහුගේ නිවැසියන්ට ද දඬුවම් පමුණු වන්නෙමි. 35ඔබ එකිනෙකා, තම මිතුරාටත්, තම නෑයාටත් පැවසිය යුත්තේ, ‘ස්වාමින්වහන්සේගේ පිළිතුර කුමක් ද’ කියා හෝ ‘ස්වාමින්වහන්සේ කුමක් පැවසූ සේක් ද?’ යන වශයෙනි. 36එහෙත්, ‘ස්වාමින්වහන්සේගේ බර යැ’ යි ඔබ යළි සඳහන් නො කළ යුතු ය. මන්ද හැම කෙනකුගේ ම වචනය ඔහුගේ බර වෙයි. සේනාංකවල ස්වාමින්වහන්සේ වන අපේ දෙවියන්වහන්සේගේ, ජීවමාන දෙවියන්වහන්සේගේ වචන ඔබ විකෘති කර පවසා ඇත. 37දිවැසිවරයාට ඔබ පැවසිය යුත්තේ, ‘ඔබට ස්වාමින්වහන්සේගේ පිළිතුර කුමක් ද?’ යනුවෙන් හෝ ‘ස්වාමින්වහන්සේ කුමක් පැවසූ සේක් ද?’ හෝ යනුවෙනි. 38එහෙත් ඔබ ‘ස්වාමින්වහන්සේගේ බර යැ’ යි කීවොත්, ඒ ගැන ස්වාමින්වහන්සේ මෙසේ පවසන සේක: ‘ස්වාමින්වහන්සේගේ බර’ යන වචන ඔබ නො පැවසිය යුතු යැයි මම ඔබට දන්වා තිබූ බැවින්, ‘ස්වාමින්වහන්සේගේ බර යැ’ යි ඔබ නො පැවසිය යුතු ය. 39එබැවින් මම නිසැකයෙන් ම නුඹ අමතක කොට, නුඹටත්, නුඹේ පියවරුන්ටත් මා දුන් නගරය සමඟින් මා අබියසින් නුඹ ඉවත හෙළන්නෙමි. 40අමතක නො වන සදාතනික නින්දාවක් හා සදාතනික ලජ්ජාවක් මම නුඹලා පිට තබන්නෙමි.”
දැනට තෝරාගෙන ඇත:
යෙරමියා 23: SCV
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්‍රවේශ වීමට අවශ්‍යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Holy Bible, Sinhala Contemporary Version™ | © 1980, 1991, 1994, 2011, 2020, 2025 by Biblica, Inc. | Used with permission. All rights reserved worldwide.