යෙරමියා 22
22
දුෂ්ට රජුන්ට එරෙහිව
1 ස්වාමින්වහන්සේ මෙසේ පවසන සේක: “යූදා රජුගේ මාලිගයට ගොස්, එහිදී මේ වචනය පවසමින්, 2මෙසේ කියන්න: ‘දාවිත්ගේ සිංහාසනයේ හිඳ සිටින එම්බා යූදා රජ්ජුරුවනි, ඔබ ද ඔබේ නිලධාරීන් ද මෙම දොරටුවලින් ඇතුළු වන ඔබේ ජනයා ද ස්වාමින්වහන්සේගේ වචනය අසනු! 3ස්වාමින්වහන්සේ මෙසේ පවසන සේක: යුක්තියත්, දමිටුකමත් කරන්න. කොල්ලයට හසු වූ අය පීඩකයාගේ අතින් මුදන්න. විදේශික පදිංචිකරුවන්ටත්, පියා නැති අනාථයාටත්, වැන්දඹුවටත් අයුත්තක් හෝ හිංසාවක් හෝ නො කරන්න. මේ ස්ථානයෙහි නිදොස් ලේ නො වගුරු වන්න. 4මන්ද සැබවින් ම ඔබ මේ වචනවලට අවනත වේ නම්, දාවිත්ගේ සිහසුනේ හිඳ ගන්නා රජවරුන් මෙම ගෘහයේ දොරටු තුළින් ඇතුල්වන්නේ අශ්වයින් හා අශ්ව-රථ පදවමිනි. ඔවුන් සමඟ ඔවුන්ගේ සේවකයින් හා ජනතාව ද වනු ඇත. 5එහෙත් ඔබ මේ වචනවලට කීකරු නො වන්නේ නම්, ස්වාමින්වහන්සේ ප්‍රකාශ කර සිටින්නේ, තමන්වහන්සේ ගැන ම දිවුරා සිටින්නේ, මෙම මාලිගය නටබුන් බවට පත් වන වගයි.’ ”
6මන්ද යූදා රජුගේ මාලිගය ගැන ස්වාමින්වහන්සේ මෙසේ පවසන සේක:
“ඔබ මට ගිලියාද් වනය වගේ ය.
ලෙබනොන් වන මුදුන වගේ ය.
එනමුදු මම සැබවින් ම ඔබ කාන්තාරයක් කරන්නෙමි.
ජනයා වාසය නො කරන නගරයක් කරන්නෙමි.
7හැම කෙනකු ම ආයුධ දරන විනාශකයින්,
මම ඔබට එරෙහිව කැප කරන්නෙමි.
ඔවුන් ඔබගේ අගනා දේවදාර කඳන් කපා,
ඒවා ගින්නට ඇද දමනු ඇත.
8“නොයෙකුත් ජාතීන් මේ නගරය පසු කර යන අතර, ‘මේ ශ්‍රේෂ්ඨ පුරවරයට ස්වාමින්වහන්සේ මෙවැන්නක් කළේ මන්දැ?’ යි හැම මිනිසකු ම එකිනෙකාගෙන් විමසනු ඇත. 9එවිට ඔවුන් පිළිතුරු දෙනු ඇත්තේ, ‘ඔවුන් තමන්ගේ දෙවියන්වහන්සේ වන ස්වාමින්වහන්සේගේ ගිවිසුම ප්‍රතික්ෂේප කර, වෙනත් දෙවිවරුනට නමස්කාර කළ නිසාත්, ඔවුන්ට සේවය කළ නිසාත් ය.’ ”
10මළ තැනැත්තා උදෙසා නො වැලපෙන්න.
ඔහු ගැන ශෝක නො වන්න.
එහෙත් ඉවත ගෙන ගිය තැනැත්තා උදෙසා දැඩි සේ වැලපෙන්න.
මන්ද තම මවු බිම දකින්නට ඔහු කිසි දින ආපසු එන්නේ නැත.
11මන්ද තම පියාණන් වූ යොෂීයාගෙන් පසු රජකමට පත් වී, මේ ස්ථානයෙන් බැහැර ව ගිය යූදාහි රජු වූ යොෂීයාගේ පුත් ෂල්ලූම් ගැන ස්වාමින්වහන්සේ මෙසේ කියන සේක: “ඔහු කිසි දින ආපසු එන්නේ නැත. 12ඔවුන් වාලට ඔහු ගෙන ගිය තැන්හි දී ම, ඔහු මියෙනු ඇත. ඔහු මේ දේශය යළි දකින්නේ නැත.”
13“අධර්මිෂ්ඨකමින් තම නිවස ද
අයුක්තියෙන් තම උඩු මහල් ද තනාගන්නා වූ
තමන්ට සේවය කිරීමට තම අසල්වැසියාට කුලී නො ගෙවා,
ඔහුගෙන් නිකම් වැඩගන්නා වූ තැනැත්තාට ශාප වේ!
14‘විසල් උඩු මහල් කාමරවලින් යුතු
මහ මන්දිරයක් මම ගොඩ නගමි’ යි ඔහු කියයි.
ඔහු දේවදාර පනෙල් ගසා,
සාදලිංගම් පින්තාරුයෙන් සරසා#22:14 සාදලිංගම් පින්තාරුයෙන් සරසා හෙවත් රත් පැහැයෙන් සරසා,
ඊට ජනේල කැප්පවී ය.
15“ඔබ රජකු බවට පත් වූයේ,
වඩ වඩා දේවදාර සමඟ තරඟ කළ නිසායැයි ඔබ සිතනවා ද?
ඔබේ පියා ආහාර පාන ලැබුවේ නැද්ද?
ඔහු යුක්තියත්, දමිටුකමත් කළේ ය.
එබැවින් ඔහුට සුබ සිද්ධ විණ.
16ඔහු දිළිඳුන්ගේ ද දුප්පතුන්ගේ ද යුක්තිය ඉෂ්ට කළේ ය;
එමඟින් සුබ සිද්ධිය සැලසුණේ ය.
මා හැඳින ගැනීම යනු එය ම නො වේ” දැයි
ස්වාමින්වහන්සේ ප්‍රකාශ කරන සේක.
17“එහෙත් ඔබගේ ඇස් ද ඔබගේ හදවත ද
යොමු ව ඇත්තේ අයුතු වාසියට ය;
නිදොස් ලේ හැලීමට,
හිංසා-පීඩාවට හා ගසාකෑමට පමණි.”
18එබැවින්, යොෂීයාගේ පුත්‍ර, යූදාහි රජු වූ යෙහෝයාකීම් ගැන ස්වාමින්වහන්සේ මෙසේ පවසන සේක:
“ ‘අහෝ මගේ සහෝදරය, අහෝ සහෝදරිය’ කියමින්,
කිසිවකුත් ඔහු ගැන වැලපෙන්නේ නැත.
‘අනේ මගේ හාම්පුතාණනි, අපොයි ඔහුගේ තේජස’ යයි
ඔවුන් ඔහු ගැන වැලපෙන්නේ නැත.
19ඔහු වළලනු ලබන්නේ බූරුවකු වළලන පරිද්දෙනි.
ඉවතට ඇදගෙන ගොස්,
යෙරුසලම් දොරටුවලින් පිටත හෙළනු ලැබීමෙනි.”
20“ලෙබනොන් වෙත ගොස්, කෑ මොර දෙන්න.
බාෂාන්හි දී ඔබේ කටහඬින් උස් හඬ නගන්න.
අබාරීම්හි සිට කෑ මොර ගසන්න.
මන්ද ඔබේ සියලු පෙම්වතුන් මිරිකා දමනු ලැබ ඇත.
21ඔබ සමෘද්ධිමත් ව සිටියදී, මම ඔබට අනතුරු ඇඟවීමි.
එහෙත් ඔබ කීවේ, ‘මම සවන් නො දෙන්නෙමි’ කියා ය.
තුරුණු වියේ පටන් ඔබේ පිළිවෙත එසේ ය.
ඔබ මගේ කටහඬට කීකරු වූයේ නැත.
22සුළඟ ඔබේ සියලු එඬේරුන් ඉවත ගසා යවනු ඇත.
ඔබගේ පෙම්වතුන් වහල්කමට යනු ඇත.
එවිට නුඹේ සියලු දුෂ්ටකම් නිසා,
නුඹ ලජ්ජාවටත්, නින්දාවටත් පත් කෙරෙනු ඇත.
23අහෝ ලෙබනොන්හි වෙසෙන්නෙනි#22:23 ලෙබනොන්හි වෙසෙන්නෙනි එනම් යෙරුසලමේ මාලිගය,
දේවදාර අතරේ කැදලි තනා ගන්නනි,
ප්‍රසූතියේදී විලිරුජා විඳි කාන්තාවක මෙන් දැඩි වේදනා පැමිණි කල,
ඔබ කෙඳිරි ගාන්නේ කෙලෙස ද?
24“මා ජීවත් වන වග සැබෑ සේ ම, නුඹ මගේ සුරතේ පේරැස් මුදුවක් වුව ද, යෙහෝයාකීම්ගේ පුත් යූදාහි රජ වූ කොනියා#22:24 කොනියා එනම් යෙකොනියා හෙවත් යෙහෝයාකීන්, මම නුඹ ගලවා දමන්නෙමි” යි ස්වාමින්වහන්සේ ප්‍රකාශ කරන සේක. 25“නුඹේ දිවි තොර කරන්නට සොයන්නවුන් අතට, නුඹ භය වන අය අතට, බබිලෝනියේ රජු වූ නෙබුකද්නෙසර් අතට සහ කල්දිවරුන් අතට මම නුඹ හසුකර දෙන්නෙමි. 26නුඹත්, නුඹ බිහි කළ නුඹේ මවත්, වෙනත් දේශයකට, නුඹලා නූපන් වෙනත් දේශයකට මම හෙළා දමන්නෙමි. එහිදී නුඹලා මියෙනු ඇත. 27ආපසු එන්නට ඔවුන් ආශා කරන දේශයට ඔවුන් යළි එන්නේ නැත.”
28මේ මිනිසා, කොනියා, නින්දිත, බිඳුණු බඳුනක් ද?
කිසිවකුත් ගණන් නො ගන්නා උපකරණයක් ද?
ඔහුත්, ඔහුගේ වංශයත් ඉවත හෙළන ලද්දේ,
ඔවුන් නො දන්නා දේශයකට හැර දමන ලද්දේ මන්ද?
29එම්බා දේශය, දේශය, දේශය,
ස්වාමින්වහන්සේගේ වචනය අසනු!
30 ස්වාමින්වහන්සේ මෙසේ කියන සේක:
“මේ මිනිසා දරුවන් නැත්තකු සේ,
තම ජීවිත කාලය තුළ සඵල නො වූ කෙනකු සේ සටහන් කරන්න.
මන්ද ඔහුගෙන් පැවතෙන කිසිවකු හෝ සඵල නො වේ.
ඒ කිසිවකුත් දාවිත්ගේ සිහසුනේ හිඳගන්නේවත්,
යළි යූදාහි රජකම්කරන්නේවත් නැත.”
දැනට තෝරාගෙන ඇත:
යෙරමියා 22: SCV
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්‍රවේශ වීමට අවශ්‍යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Holy Bible, Sinhala Contemporary Version™ | © 1980, 1991, 1994, 2011, 2020, 2025 by Biblica, Inc. | Used with permission. All rights reserved worldwide.