NDS 5
5
Ananiasi ka Safira
1Giĩ goon dɔ nɛ, a tɔ n Ananiasi, a laanka a lɔ Safira kɔn wɔ ma, ǹ nə ǹ tán sã. 2Sɛnɛ, asɛ laanka a lɔ lɛ golee bɔlɔ goon la, á tán giɔ̀mɔ lɛ kɔ́n bɔ, á daa ka a gialakun kɛ nɛ, á kɔ dia dí-a wolen lɛn la. 3Sɛnɛ, Piɛrɛ pɛ nɛ: «Ananiasi, wàa na á baa ń toa *Sɛtaan nə́ n gɔ́ɔ̃ tii kɛnɛn, á n diɛ soɛ bɔ ganaa Lawa a Yiri Fu ni? Táa ma nə n tán giɔ̀mɔ lɛ kɔ́n bɔ. 4Min kɔ́n nə n da n tán lɛ a siɛ̃ ganaa wa. N bɛ́ ń sã dɔn, min kɔ́n nə n bíi mà n da ka a wɔrɔ-n wa. A na á saa lɔn sii kɛ a zɛnaa ǹ gɔn wɔ n foo ne? N bie n soɛ bɔ min ni wa, ma nə́ n soɛ bɔ Lawa nɛ.»
5Ananiasi bɛ́ á bɛa boon kɛn lɛn ma lɔn gɔrɔ, á bɔ á mɛnaa á gã. Minin mɛnɛn tumaa na a gɛ̀ boo ma, nyɛ́ɛ gole bɛn kũ. 6Tɔntɔraan nə́ yoo ǹ nə́ màn pɛnɛ a gere ganaa, ǹ nə́ saa ǹ nə́ woo bĩ.
7Biikoo sɔɔ miã bɛ kio, a lɔ daa wɔ. Sii mɛn bɛ́ á n zɛnaa, a bɛ dɔ̃ wa. 8Piɛrɛ lɛ dia la á pɛ nɛ: «Masɛ n nɔ̀n diɛ n la, ka ǹ ka tán lɛ sã giɔ̀mɔ kɛ ganaa?»
Lɔ lɛ ná a lɛ si mà hiĩ, mà bɛa lɛ kɛ lɛ nɛ.
9Piɛrɛ tɔ́n wusoo á pɛ nɛ: «A na á saa lɔn ka kɔn wɔ ma kɛnɛn, ka wɔ Dɛnaa a Yiri Fu lon? Haya! Minin mɛnɛn nə wo n zuũ gere bĩ, bɛn nə́ wusoo ǹ nə́ daa, ma á ke ǹ gòã wuu miɛ kiɛnlɛ-a, maǹ die n dɔ gere siɛ.»
10A din bǎã-n gɔrɔ, lɔ lɛ bɔ á mɛnaa Piɛrɛ giulun, á gã. Tɔntɔraan lɛn bɛ́ ǹ nə́ wɔ kion, ǹ nə́ daa yaa a dɔ́ gã, ǹ nə́ saa ǹ ná a gere bĩ, a yala nə́ ǹ zuũ wɔ li. 11Bɛa sii kɛ lɛ a zɛnaa nyɛ́ɛ da Lawa a sɔmɔ minin ganaa parsiini, ka a ma wolen tumaa nɛ.
Dia dí-a wolen nə kaãbaa ǹ siin mɛnɛn zɛnaa
12Dia dí-a wolen lɛn man nə́ goã kaãbaa ǹ sii dadara gigiã zɛnɛɛ minin bii. Ǹ tumaa, dia dí-a wolen laanka Lawa-nyankɔle gialakunun kɛn man nə́ goã kun, bɛ̀ ǹ golee Salomɔn a Siã Bǎã kɛ nɛ. 13Sɛnɛ, min kooro kɛ kɔ́n yii wɔ á woo wɔ kunun ǹ ni wa, a da yaa minin lɛn dɔn manə ǹ tɔ bǐɛ̃ pii. 14Màn na á goã miɛ zaman gole kɛ li die golee Dɛnaa Yezu li, giĩ gigiã nɛ ka lɔ gigiã nɛ, bɛn man nə́ goã kiɛ Lawa a zaman lɛ li. 15Minin man nə́ goã ǹ busulən naɛ piìn la hinlaa kataran la, bɛ̀ ǹ soo ǹ ne zii la, màn mɛn bɛ́ toɛ, bɛ̀ Piɛrɛ á kiɛ̃, ta a wúlu dinsɔɔ̃ nɛ, bɛ kaa ǹ mɛn ganaa. 16Min gigiã dɔ na á goã boe Zeruzalɛmu lɛkoro lɛ-a kiwin ni, ǹ nə́ die ka busulən ne, ka minin mɛnɛn dɔn bɛ́ nɔ̀ɔn baraan nə́ ǹ nɔmiɛ. Bɛn tumaa dɔ a nɔmaa na á goã nyɛɛ.
Dia dí-a wolen lɛn nɔmaa
17Bɛa siin kɛn lɛn zɛnaa gɔ́ɔ̃ nɛ, Lawa a Kion wúlu-bɔlen kiã foo yoo, kun ka *Sadusɛɛ̃n lɛsɔkɔn minin kɛn tumaa nɛ a tá kun wolen lɛa. Ǹ nə́ pɛ mà yǎa ǹsɛn nə yui ǹ sii zɛnɛɛ. 18Ǹ nə́ minin kaa dia dí-a wolen lɛn ganaa, ǹ nə́ ǹ kũ, ǹ nə́ ǹ zũ kòso-n min tumaa yɔrɔ-a. 19Sɛnɛ, tèlò-n, Dɛnaa a lon a dia dí-a wole goon nə́ kòso kion lɛ a kiɛnlɛ bũ, á ǹ waa á ǹ kaa, á pɛ ǹ nɛ: 20«Ka wo Lawa a kion, Yezu da ka yiikoonaabaa mɛn nɛ, ka bɛ boo da zaman nɛ.»
21Dia dí-a wolen lɛn ná a bɔlɔ si, bɛ lɛ a lɛa baayɛlɛ yiisoone gɔrɔ, ǹ nə́ woo Lawa a kion lɛ nɛ, ǹ nə́ minin daraa walan.
Lawa a Kion wúlu-bɔlen kiã laanka a tá kun wolen nə́ daa, ǹ nə́ kiri-wɔlen kuru lɛ sɔkɔn, ka Izirayeli a min golen ne. Ǹ nə́ minin dia, mà ǹ wo dia dí-a wolen lɛn waa kòso-n, ǹ da ǹ nɛ. 22Sɛnɛ, dí-nyalin lɛn bɛ́ ǹ nə́ dɔ kòso lɛ nɛ, ǹ wo dia dí-a wolen lɛn yaa wa. Ǹ bɛ́ ǹ nə́ n bɔyaa, ǹ nə́ daa pɛ, 23mà ǹsɛn nə́ woo kòso lɛ yaa a lɛ n tiɛ̃-n sɔnbɔraanɛ, sɔraasin dɔn nə́ doa nɛ a kiɛnlɛ-a. Sɛnɛ, mà ǹsɛn bɛ́ ǹ nə́ kiɛnlɛ lɛ bũ, ma ǹsɛn nə min kɔn yɛ kòsokion lɛ gɔ́ɔ̃-n wa.
24Ǹ bɛ́ ǹ nə́ boon kɛn ma, Lawa a Kion-lɛduə̃lin goledɛnaa laanka wúlu-bɔlen goledɛnan yiri nə́ n lɔlɔkɔn, ǹ ba doɛ̃ ǹ bɛ́ re màn mɛn taasɛ dia dí-a wolen kɛn papaã wɔ gɔn la doo wa. 25Sɛnɛ, min goon daa pɛ ǹ nɛ: «Á ke, ka bɛ́ ka minin mɛnɛn kaa kòso-n lɛn, ǹ tá Lawa a Kion, ǹ nə́ minin darɛɛ.»
26Lawa a Kion-lɛduə̃lin goledɛnaa lɛ sɛ yoo gɔrɔ, á woo kun ka dí-nyalin ni, ǹ nə́ dia dí-a wolen lɛn kũ, ǹ nə́ daa ǹ nɛ. Sɛnɛ, ǹ nə ǹ nɔmaa wa, a giala, maǹ nə́ goã nyɛ́ɛ biɛ, mà zaman lɛ á die ǹsɛn dii ka kɔlɔ nɛ.
27Ǹ nə́ daa ka dia dí-a wolen lɛn nɛ, ǹ nə́ ǹ nyaa kiri-wɔlen kuru lɛ nɛ. Lawa a Kion wúlu-bɔlen kiã lɛ tɔ́n nɔ̀n da ǹ la: 28#Mat 27.25 «Táa wɔsɛn nə́ pɛ wɔ́ laa ka ganaa, wáa ka baran minin daraa bɛa tɔ kɛ lɛ ganaa wa. Á ke, ka kaa daraa lɛ wɔ Zeruzalɛmu kiwi minin tumaa yiri ni. Ka ǹ li mà giĩ kɛ lɛ a gɛ̀ dɔlɔ wɔsɛn kũ?»
29Sɛnɛ, Piɛrɛ laanka dia dí-a wole gialakunun lɛn nə́ ǹ lɛ si: «Wɔsɛn doamaa nɛ, wɔ Lawa bɔlɔ si a la minbuiinin wɔ nɛ. 30Ka Yezu mɛn dere gɔn-a, ka dɛ lɛn, wɔ digolon Lawa lɛ na á bɛ lɛ yii kaa á bɔ geren bii. 31Lawa na á ná a din lɛ saa lon, á koa gugurubaa ǹ bǎã nɛ a din gusin, kii lɛa, kirisibaali lɛa, màn mɛn bɛ́ toɛ, Izirayeli minin nə boo la, ǹ wusoo ǹ sii baraan kio, Lawa nə ǹ sii baraan toa ǹ nɛ. 32Wɔsɛn dinin man bɛa siin kɛn lɛn siéren lɛa, wɔsɛn laanka Yiri Fu kɛ nɛ, Lawa din nə ǹ mɛn kɔ a bɔlɔ-silin la.»
33Kiri-wɔlen lɛn bɛ́ ǹ nə́ bɛa boon kɛn ma, ǹ foo yoo. Maǹ nə́ goã giɛ li ǹ dia dí-a wolen lɛn dɛ ǹ gã. 34Sɛnɛ, giĩ goon nə́ yoo kiri-wɔlen lɛn bii, á pɛ mà ǹ soo ka kòso nɛn lɛn nɛ kanaa boɛɛn nɛ. Bɛa giĩ lɛ n *Fariziɛ̃ lɛa, a tɔ n Gamalieli, landa sii-daraali goon ne, a sii á kɔɔ̃n gána lɛ a minin-a parsiini. 35Ǹ bɛ́ ǹ nə́ soo ka kòso nɛn lɛn nɛ, asɛ pɛ: «Izirayeli minin lɛn, ka yiri bɔ kaa zɛnaa ǹ sii li minin kɛn wɔ gɔn la. 36A tɔn belebɔ wa, wɔsɛn nə́ Tedaasi a yoo yɛ, a na á goã n din biɛ màn gole lɛa, á min biɛ sii (400) miã yɛ, á kaa kun a din ni. Wɔ́ yɛ ǹ nə́ dɛ á gã, min mɛnɛn nə goã koe lɛ, bɛn nə́ sasawaa, ǹ kɔ́n goã wa. 37Bɛ kio, wɔsɛn nə́ Galileen Zudaasi a yoo yɛ, á kɔnpɛ ka minin-nimii biikoo ne. A dɔ́ zaman baã á kaa a din kio. Sɛnɛ, wɔ yɛ, a dɔ́ gã, minin mɛnɛn tumaa kɔ lɛ, bɛn yii sasawaa. 38Bɛ lɛ nɛ, ma á pii ka nɛ, máa ka baran ga minin kɛn lɛn walan doo wa, ka toa ǹ woo. Minin kɛn lɛn, bɛ̀ ǹ gù we yii ǹ sii kɛ lɛ, hinlaa bɛ̀ ǹ dí kɛ lɛ n boe min li, á re papaɛ̃ a din ganaa. 39Sɛnɛ, bɛ̀ a n boe Lawa li, ka a boe la ka sii kɛ laanka dí kɛ papaã wa. Ka yiri bɔ ka dinin li, ka baran ga zia li Lawa li wa.»
Kiri-wɔlen lɛn nə́ lɛ kɔ Gamalieli a doroo lɛ ganaa. 40Ǹ nə́ lɛ dia dia dí-a wolen lɛn la, mà ǹ da wɔ. Ǹ nə́ minin kaa ǹ-a ǹ nə́ ǹ dɛ. Ǹ nə́ tɔ́n nə n gòon pepere ǹ yii li doo, mà ǹ baran toa ǹ Yezu tɔ kɛ pɛ doo wa. Bɛ kio, ǹ nə́ ǹ kaa. 41Dia dí-a wolen lɛn nə́ n bɔ kiri-wɔlen lɛn li ǹ nə́ woo. Ǹ foo goã kɔɔ̃n parsiini, a giala, Lawa ga ǹ ganaa, mà ǹ doamaa nɛ, ǹ fuu yɛ Yezu tɔ kɛ a lɛa. 42Baraabaraa, Lawa a kion gɔ́ɔ̃ nɛ hinlaa ǹ dinin piɛn nɛ, ǹ goã minin daraa laanka Yezu Minin Nyin-sili boo kɔɔ̃n kɛ a pɛ lɛ diɛ wa.
දැනට තෝරාගෙන ඇත:
NDS 5: SBPE2011
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
San Bible Protestant Edition © Bible Society of Burkina Faso, 2011.