NDS 6
6
Dɔmalɛ wole sɔbaa bɔ
1Bɛa biikoo kɛ lɛ li, màn mɛ Yezu a kialandɛnan lɛn li, ǹ nə́ mɔnaa. Zuifun mɛnɛn nə́ bɔ bǎã kɔsɔn nɛ, ǹ nə́ Grɛki bɔlɔ pii, bɛn nə́ goã gungunun sii gána gɔ́ɔ̃ wɔn kɛn ganaa, a giala, mà maǹ màn-bii gii baraabaraa, ǹ ba ǹ lɔ giɔɔrɔn goe taãn wa. 2Dia dí-a wole fulupaa lɛ lɛ dia kialandɛnan lɛn la lɛsɔkɔn gole ganaa, ǹ nə́ pɛ: «Dɔɔ̃nɔn lɛn, a siĩni wɔsɛn nə Lawa a boo lɛ a pɛ toa walan, wɔ da ga màn-bii sii walan wa. 3Ka ga ka dinin bii, ka min sɔbaa bɔ, minin mɛnɛn tɔ bǐɛ̃ bɛ́ boe, Yiri Fu nə́ ǹ la, ǹ nə́ sii dɔ doɛ̃. Ka bɛa minin lɛn bɔ wɔsɛn nə ǹ da màn-bii dí lɛ mìi la. 4Wɔsɛn dininmaan kɛn tá re woe nyɛɛnɛ, wɔ n dinin kɔ Lawa nyankɔ la, ka Lawa a boo pɛ kɛ a dí ni.»
5Zaman lɛ tumaa lɛ kɔ boo kɛ ganaa. Ǹ nə́ Itian bɔ, golee Lawa li tá a lon parsiini, Yiri Fu dɔ tá la. Maǹ ná asɛ bɔ ka Filipi ni, Prokɔɔrɔ nɛ, Nikanɔɔrɔ nɛ, Tiimɔn nɛ, Parmanaasi ni, ka Nikolaa nɛ, bɛ n Antiɔsi kiwi min lɛa á wɔ Zuifubaa nɛ. 6Ǹ nə́ bɛa min sɔbaa lɛ nyaa dia dí-a wolen lɛn manɛ, ǹ nə́ Lawa nyankɔ ǹ nɛ, ǹ nə́ n gɔn da ǹ mìi ni.
7Bɛ kio, Lawa a boo lɛ a pɛ goã woe nyɛɛnɛ, màn na á goã miɛ kialandɛnan lɛn li taãn-taãn Zeruzalɛmu kiwi lɛ nɛ. Lawa a Kion wúlu-bɔle gigiã dɔ́ lɛ kɔ ǹ nə́ golee Lawa li.
Itian a kuĩ boo
8Lawa pàã kɔ Itian la parsiini, á goã sii-nyaa ǹ sii dadaran zɛnɛɛ zaman lɛ bii. 9Sɛnɛ, bɛa siin kɛn lɛn zɛnaa gɔ́ɔ̃ nɛ, liere wɔ Itian laanka minin kɔnɔn bii ni. Ǹ tɛnɛn man boe lɛsɔkɔn kion kɔ́n nɛ, ǹ nə́ bíi mà Bɔ Bɛ̀rɛbaa-n Wolen lɛsɔkɔn kion, gialakunun man Sirɛni gána minin lɛa, ka Alɛksandrii kiwi minin ni, kɔsɔn dɔn man Siliisii laanka Azii gána minin lɛa. 10Ǹ goã boe la ǹ tá Itian naɛ ka boo-n wa, a giala, a na á goã boo diɛ ka sii-doɛ̃ nɛ, Lawa a Yiri Fu bɛ́ sii-doɛ̃ mɛn koe la. 11Maǹ nə́ nɔmaa ǹ nə́ minin pii, mà bɛn nə pɛ mà ǹsɛn ná a lɛ ma, a n sɔ koe Muizu ganaa, ka Lawa dinmaa dɔ nɛ. 12Ǹ nə́ zaman lɛ sɔmɔ, ka min golen laanka landa sii-daraalin ni. Bɛn nə́ Itian kũ fufuu, ǹ nə́ woo-n kiri-wɔlen bǎã nɛ. 13Ǹ nə́ ga siére soɛ-bɔlen li walan, bɛn nə́ pɛ: «Giĩ ke ka yii tá-a, a n boo baraa diɛ biikoo tumaa waáraa Lawa a kion kɛ wɔ gɔn la, ka Lawa dín mɛnɛn pɛ Muizu ni. 14Wɔsɛn ná a lɛ ma pii, mà Nazarɛtin Yezu dɛnaa kɛ lɛ n die Lawa a kion lɛ wurii, Muizu landa siin mɛnɛn nyaa wɔsɛn manɛ mà wɔ zɛnaa, mà a n die bɛn bɔyɛɛ.»
15Kiri-wɔlen mɛnɛn tumaa goã bǎã lɛ nɛ, bɛn yii na á goã doa nɛ a din la, ǹ ná a yɔrɔ yɛ tɛ pii ka lon a dia dí-a wole wɔ bɛ́ lɔn.
දැනට තෝරාගෙන ඇත:
NDS 6: SBPE2011
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
San Bible Protestant Edition © Bible Society of Burkina Faso, 2011.