NDS 4
4
Maǹ kiri kuri Piɛrɛ laanka Zaã la
1Piɛrɛ laanka Zaã bɛ́ bɛa boo lɛ diɛ zaman lɛ nɛ, wúlu-bɔlen goledɛnan nɛ, ka Lawa a kion-lɛduə̃lin goledɛnaa nɛ, ka *Sadusɛɛ̃n nə́ daa ǹ li. 2Ǹ foo yoo parsiini, mà wàa na á baa Piɛrɛ laanka Zaã tá zaman lɛ darɛɛ, ǹ nə́ pii mà Yezu yii kaa á n bɔ geren bii, ka n pɛ mà geren yii á kiɛ. 3Wasa bɛ́ á mɛ á nya, ǹ nə́ Piɛrɛ laanka Zaã kũ ǹ nə́ ǹ kaa kòso-n yǎa lɛ̀ waa. 4Sɛnɛ, minin mɛnɛn nə n too kɔ boo laakalaa lɛ li, bɛn gigiã golee Lawa li. Lawa a zaman lɛ tumaa woo dɔ min duu sooro (5 000) kɛ miã.
5A lɛawaa kəni, goledɛnan nɛ, ka min golen ne, ka landa sii-daraalin mɛnɛn bɛ́ Zeruzalɛmu, bɛn nə́ n lɛ sɔkɔn. 6Bɛa lɛsɔkɔn wolen lɛn man ke: Wúlu-bɔlen kiã Anɛ nɛ, Kayifu ni, Zaã nɛ, Alɛksandrə ne, ka wúlu-bɔlen goledɛnan kion minin tumaa nɛ. 7Ǹ nə́ minin dia ǹ nə́ woo Piɛrɛ laanka Zaã waa kòso-n, ǹ nə́ daa ǹ nɛ ǹ yɔrɔ-a. Ǹ nə́ nɔ̀n da ǹ la mà ǹ ganaa: «Ka ǹ ká giĩ kɛ lɛ kaka kɔ ka pàã mɛn nɛ? Ka n ka zɛnaa ka die tɔ nɛ?»
8Lawa a Yiri Fu pàã kɔ Piɛrɛ la, yǎa a pɛ ǹ nɛ:
– Kasɛn Zuifun nyɛɛnaandɛnan laanka ǹ min golen lɛn! 9Táa wɔsɛn nə́ bǐɛ̃ mɛn zɛnaa bɔlɔka kɛ nɛ, ka ǹ nɔ̀n diɛ wɔ la pelo ka bɛ nɛ mà wɔ n wɔ́ saa lɔn giĩ kɛ a busu nya. 10Ka dinin tumaa laanka Izirayeli gána minin tumaa dɔ̃ kəni, mà Nazarɛtin Yezu tɔ kɛ pàã nɛ, giĩ kɛ á golee ne ka yɔrɔ-a min kaka lɛa. Yezu *Krita mɛn bɛ́ ka dinin nə́ dere gɔn-a, Lawa na á yii kaa á bɔ geren bii, bɛ lɛ barka nɛ. 11#Loe 118.22 A nə n pii Yezu lɛ wɔ gɔn la kɛnɛn: «Kion-dɔlen nə n piã ka kɔlɔ mɛn nɛ, a din na á wusoo á kɛ-gùrù dɔ ǹ kɔlɔ baa»; ka dinin man bɛa kion-dɔlen kɛn lɛn lɛa, Yezu n kɔlɔ lɛ lɛa. 12Kirisibaa ba yii bǎã kɔn nɛ wa yǎa Yezu din ni. A giala, kanaa gɔ́ɔ̃ nɛ, bɛ̀ á n bɔ a din tɔ nɛ, Lawa tɔ kɔsɔ kɔ minbuiinin la, màn mɛn bɛ́ boe la a wɔ kirisibaa wa.
13Zuifun sii yɔrɔ-bɔlen lɛn bɛ́ ǹ nə́ Piɛrɛ laanka Zaã a foo doa kɛ yɛ, ǹ yiri gisĩ a nɛ, mà ǹ ba màn kɔ́n lɛa wa, mà ǹ daraa gole dɔ din wɔ wa, bɛ kaãbaa da ǹ-a parsiini. Maǹ nə́ goã ǹ doɛ̃ Yezu a koa-kun wolen lɛa. 14Bɛ̀ ǹ nə́ ga giĩ kɛ-a golee ne ǹ li, a n kaka, boo ba ǹ lɛ-n ǹ tá ǹ lɛ sii-n wa. 15Ǹ nə́ tɔ́n pɛ mà ǹ nə ǹ kũ ǹ soo ǹ ne, ǹ nə ǹ bɔ kiri wɔ ǹ bǎã lɛ nɛ. Bɛ kio, ǹ dinin nə́ tɔ́n nɔ̀n da kɔn la: 16«Wɔ ǹ die wàa zɛnɛɛ minin kɛn manɛ? Sonbore, a n foaãnɛ Zeruzalɛmu min tumaa yɔrɔ-a, mà man nə́ kaãbaa ǹ sii gole zɛnaa, wɔsɛn nə́ wɔ ba boe la wɔ màn mɛn liere kɔ wa. 17Sɛnɛ, màn mɛn bɛ́ toɛ, boo kɛ baran n daa wɔlɔ la a wo nyɛɛn zaman bii wa, wɔsɛn man die ǹ kurii ǹ baran Yezu kɛ boo da min kɔ́n nɛ doo wa.»
18Ǹ nə́ minin dia, mà ǹ wusoo ǹ da Piɛrɛ laanka Zaã lɛ nɛ ǹsɛn yɔrɔ-a. Ǹ nə́ pɛ ǹ nə́ laa ǹ ganaa taãn-taãnɛ: «Ka baran Yezu tɔ laakalaa min ni doo wa, ka baran min dɔ daraa-a wa.»
19Sɛnɛ, Piɛrɛ laanka Zaã nə́ ǹ lɛ si: «Ka dinin nə ga sii màn paa kɛ bii, ǹ mɛn a zɛnaa n pepere Lawa yɔrɔ-a: Wɔsɛn nə ka bɔlɔ si, hinlaa wɔ Lawa bɔlɔ si? Ka dinin nə màn pɛ.»
20Piɛrɛ laanka Zaã pɛ: «Sonbore, wɔsɛn yii bɛ́ á màn mɛn yɛ, wɔsɛn too nə ǹ mɛn ma, wɔsɛn ba boe la wɔ n lɛ tã bɛ-a wa.»
21Ǹ nə́ wusoo doo ǹ nə́ n gòon pepere ǹ yii li, ǹ nə́ ǹ kaa. Ǹ dɔlɔ da ǹ mìi ni ǹ gòã kɔ́n yɛ wa. Ǹ nə́ nyɛ́ɛ baa zaman lɛ nɛ, a giala min tumaa na á goã Lawa tɔ boe sii kɛ a zɛnaa taman yii. 22Sonbore, giĩ kɛ lɛ kaãbaa ǹ sii nə́ n zɛnaa nɛ, a busu nya ke lɛn, á la lɛ̀ pusi ni.
Lawa a zaman nə pàã nyankoe Lawa lon
23Ǹ bɛ́ ǹ nə́ n gɔn bɔ Piɛrɛ laanka Zaã ganaa, ǹ nə́ woo ǹ miãn li, wúlu-bɔlen goledɛnan laanka min golen lɛn nə màn mɛn pɛ ǹ nɛ, ǹ ná a yii tumaa laakalaa ǹ nɛ. 24#BBN 20.11; Neh 9.6; Loe 146.6 Ǹ miãn lɛn nə́ n too kɔ ǹ lon, bɛ kio, ǹ tumaa nə́ n lɛ kaa kun, ǹ nə́ Lawa nyankɔ:
– Mìinaa, n din nə́ n lon zɛnaa, ka tán nɛ, ka yìsi mu laanka a gɔ́ɔ̃gɔ́ɔ̃ ǹ màn tumaa nɛ. 25#Loe 2.1-2 N din ni ń boon kɛn da ka n Yiri Fu barka nɛ, n din a dí-nyali Davida wɔsɛn digolo kɛ lɛ-n, á pɛ:
«Wàa na á baa tɔrɔn tá n gɔ́ɔ̃ tii kɛnɛn?
Wàa na á baa zaman tá sii kooron taasɛ,
mà maǹ nə ǹ zɛnɛɛ?
26 Kanaa a kiin nə́ n zɔ̃ ǹ nə́ dɔ kɔn li,
nyɛɛnaandɛnan nə́ kaa kun,
màn mɛn bɛ́ toɛ, ǹ nə n baa goon
ǹ nə n gòãn doa Dɛnaa Lawa ganaa
ka a Minin Nyin-sili kɛ nɛ.»
27 #
Mat 27.1,2; Mar 15.1; Luk 23.1,7-11; Zaã 18.28,29 Sonbore, maǹ nə́ n lɛ kaa kun taãn-taãnɛ, Zeruzalɛmu kiwi kɛ lɛ nɛ, kii Erɔdi laanka kii gole Pɔnsi Pilati ni, kun ka tɔrɔ kɔsɔn laanka Izirayeli minin ni, ǹ nə́ n gòãn doa Yezu-a, Lawa din a dí-nyali sonbore ke, á bɔ a dí a lɛa. 28Lawa din saa lɛlɛ, á siin mɛnɛn taasɛ, á ǹ yɔrɔ bɔ á ǹ koa, minin lɛn man nə́ bɛn lɛ pã ǹ siin dininsɔɔ̃nɔn zɛnaa. 29Dɛnaa Lawa, n din ga minin kɛn sisia a taasiɛ baraan kɛn ganaa. N dɔ wɔsɛn lɛ, wɔsɛn mɛnɛn bɛ́ n din a dí-nyalin lɛa, wɔsɛn nə n din a boo kɛ pɛ ka foo-doa gole ne. 30N din dí nya, màn mɛn bɛ́ toɛ busulən nə kaka kɔ, kaãbaa ǹ sii dadara kɔsɔn nə n zɛnaa ka n din a dí-nyali Yezu kɛ tɔ barka nɛ, bɛ mɛn bɛ́ n din wɔ lɛa.
31Ǹ bɛ́ ǹ nə́ Lawa nyankɔ ǹ nə́ nya, ǹ lɛ bɛ́ soe-n kɔn bǎã mɛn nɛ, bɛa bǎã lɛ bìn da, Lawa a Yiri Fu gisĩ ǹ tumaa la. Ǹ nə́ Lawa a boo da ka foo-doa nɛ.
Lawa a zaman bɛ́ á goã a gɔn màn gii lɔn
32 #
NDS 2.44-45
Minbuiin gigiã mɛn din tumaa golee Lawa li, bɛn gɔ́ɔ̃n laanka ǹ taasiɛn man nə́ goã goon, ǹ kɔ́n dɔ goã giɛ a din gɔn màn kɔn-a a din wɔ lɛa wa, sɛnɛ, ǹ tumaa na á goã ǹ gɔn màn yii kiɛ kun. 33Dia dí-a wolen lɛn man nə́ goã siéren biɛ ka ǹ da ǹ boon ne, ka kaãbaa ǹ siin ni, ǹ nə́ nyɛɛ mà Yezu n Dɛnaa lɛ lɛa, a yii kaa á n bɔ geren bii. Lawa a bǐɛ̃baa gole kɛ na á goã barka we ǹ tumaa nɛ. 34Min din goã ǹ bii a laadoo màn nə́ nyaabiɛ a ganaa wa. Sonbore, minin mɛnɛn bɛ́ wurun nə́ goã ǹ lon ka kionən ne, bɛn nə́ goã ǹ sisiɛ̃, ǹ nə́ die ǹ giɔ̀mɔn nɛ, 35ǹ nə́ ǹ koe dia dí-a wolen lɛn la. Ǹ nə́ goã gii, didie ná a wɔ gii yii á kɔnpii ka a laadoo ne.
36Bɛ lɛ nɛ, giĩ goon dɔ́ zɛnaa miɛ̃. Bɛa giĩ lɛ tɔ na á goã Zozɛfu, Siipri gána min ni, Levii tɔrɔ lɛa, dia dí-a wolen man nə́ goã bíi Barnabaasi, bɛ giala, mà "Minin foo-taãli". 37Wuru goon na á goã a lon. Á bɛa wuru lɛ sã, a ná a giɔ̀mɔ saa á daa kɔ dia dí-a wolen lɛn la.
දැනට තෝරාගෙන ඇත:
NDS 4: SBPE2011
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
San Bible Protestant Edition © Bible Society of Burkina Faso, 2011.